Президенти Ҷумҳурии Тоҷикистон Эмомалӣ Раҳмон бо Президенти Шӯрои Аврупо Шарл Мишел суҳбати телефонӣ доир намуданд

ДУШАНБЕ, 26.08.2021 /АМИТ «Ховар»/. Имрӯз бо ташаббуси Президенти Шӯрои Аврупо Шарл Мишел суҳбати телефонии он ҷониб бо Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон доир гардид.

Дар оғози суҳбат Пешвои миллат ба ҷаноби Шарл Мишел барои ташаббуси баррасии мушкилоти Афғонистон изҳори сипос намуданд.

Ҷонибҳо бо нигаронӣ рушди кунунии вазъи буҳронӣ дар ин кишварро зикр карданд.

Сарвари давлати мо иброз доштанд, ки бинобар хуруҷи босуръати неруҳои эътилофи байналмилалӣ, Афғонистони азияткашида дар остонаи фалокати гуманитарӣ ва оғози мавҷи нави муқовимати тӯлонии шаҳрвандӣ, ки бо мушкилот ва таҳдидҳои нав барои тамоми минтақаи Осиёи Марказӣ оқибатҳои ногувор меорад, қарор дорад.

Аз эҳтимоли дар минбаъда ба пойгоҳи террористони байналмилалӣ табдил ёфтани қаламрави Афғонистон изҳори нигаронӣ карда шуд.

Бо таассуф зикр карда шуд, ки Толибон, сарфи назар аз итминони чандинбораи оммавии худ, аз таъсиси ҳукумати муваққатии интиқолӣ бо ҷалби дигар неруҳои сиёсии кишвар даст кашиданд.

Тоҷикистон ҳамчун ҳамсояи наздиктарин ҷонибдори таъсиси низоми сулҳомез ва устувори давлатӣ дар Афғонистон бо нақши марказии ҳамоҳангсозии СММ мебошад, — гуфтанд Президенти Тоҷикистон.

Тоҷикистон ҳеҷ гуна ҳукумати дигарро, ки бе дарназардошти мавқеъи кулли мардуми Афғонистон ва доираи васеи намояндагии ҳамаи миллатҳо, аз ҷумла тоҷикони этникӣ, инчунин узбекҳо, ҳазораҳо, туркманҳо ва дигар ақаллиятҳои миллӣ, ки дар он зиндагӣ мекунанд, таъсис дода мешавад, эътироф нахоҳад кард, — зикр намуданд дар ин маврид Сарвари давлати мо.

Дар ин замина аҳамияти таъсиси ҳарчи зудтари ҳукумати фарогир таъкид карда шуд.

Инчунин дар бораи пурзӯр кардани расонидани кӯмаки башардӯстонаи ҷомеаи ҷаҳонӣ ба мардуми Афғонистон, ки бо бӯҳрони амиқи иҷтимоию иқтисодӣ рӯбарӯ ҳастанд, ибрози андеша карда шуд.

Зимни суҳбат ҳамчунин масъалаҳои таҳкими амнияти сарҳади Тоҷикистону Афғонистон дар робита ба якбора бад шудани вазъ дар Афғонистон мавриди назар қарор гирифтанд.

Ҷонибҳо мавқеи якдигарро оид ба мубориза бо терроризм, экстремизм, қочоқи маводи мухаддир, ҷиноятҳои фаромиллӣ ва дигар хатару таҳдидҳо ҷонибдорӣ намуданд.

Дар бораи идомаи тамосҳо ва машваратҳои ҷонибҳо дар ҳама сатҳҳо оид ба мушкилоти Афғонистон ва масъалаҳои мубрами ҳамкории Тоҷикистону Иттиҳоди Аврупо мувофиқа ҳосил шуд.

Дар фарҷоми суҳбат Шарл Мишел аз Президенти Ҷумҳурии Тоҷикистон муҳтарам Эмомалӣ Раҳмон барои суҳбати пурмуҳтаво изҳори сипос намуда, ҷиҳати анҷом додани сафар ба Брюссел дар моҳи октябри соли равон даъват ба амал овард.