Имрӯз — Рӯзи байналмилалии коҳиши хатари офатҳои табиӣ. Иштирокдорони барномаи варзишӣ дар бораи кори наҷотдиҳандагон тасаввурот ҳосил карданд

Октябрь 13, 2021 11:45

ДУШАНБЕ, 13.10.2021 /АМИТ «Ховар/. 13 октябр дар саросари  ҷаҳон Рӯзи байналмилалии коҳиши хатари офатҳои табиӣ таҷлил мегардад. Бахшида ба ин сана аз 28 сентябр то 5 октябр бо ташаббуси Раёсати Кумитаи ҳолатҳои фавқулода ва мудофиаи гражданӣ дар шаҳри Душанбе  дар муассисаҳои таҳсилоти миёни умумии ноҳияҳои пойтахт сислсилачорабиниҳо баргузор шуданд. Ҳамчунин 12 октябр  дар Маркази ҷумҳуриявии таълимӣ — методии Кумитаи ҳолатҳои фавқулода ва мудофиаи гражданӣ бо иштироки донишҷӯёни шаҳри Душанбе ва кӯдакони имконияташон маҳдуд барномаи варзишӣ доир  гардид, хабар медиҳад АМИТ «Ховар» бо истинод ба маркази матбуоти Кумитаи ҳолатҳои фавқулода ва мудофиаи гражданӣ.

Сардори маркази матбуоти  Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон Умеда Юсуфӣ иброз намуд, ки ин чорабинӣ аз ҷониби Кумита  дар якҷоягӣ бо созмони «Ирода» – ташаббуси волидони фарзандонашон гирифтори бемории аутизм, Литсеи №1 барои бачаҳои болаёқати шаҳри Душанбе бо дастгирии молиявии Хазинаи кӯдакони СММ (ЮНИСЕФ) дар Ҷумҳурии Тоҷикистон баргузор карда шуд.

Ба кӯдакон оид ба фаъолияти Кумитаи ҳолатҳои фавқулода маълумоти  муфассал дода шуда, техникаи махсус ва воситаҳои гуногуни наҷот, инчунин  баъзе амалҳои наҷоти офатрасидагон амалан нишон дода шуданд. Ба онҳо дар бораи кумакҳои аввалини тиббӣ маълумот доданд ва воситаҳои ёриҳои фаврии тиббиро низ аз бемористони КҲФ намоиш доданд.

«Ба бачаҳо, бахусус амали дастгоҳҳои паррони бесарнишин, ки имдодгарон ҳангоми муайян кардани минтақаҳои хатарноки табиӣ ҳангоми ҳолатҳои фавқулода истифода мекунанд, хуш омад»,-афзуд Умеда Юсуфӣ.

Сипас иштирокчиён бо қоидаҳо ва талаботи чорабинии варзишӣ шинос шуданд. Онҳо якҷоя дар бозиҳои варзишии зерин: гузаштани роҳ бо монеаҳо, кашидани арғамчин, партоби тӯб ба сабад, давидан, ҳамчунин расонидани кумак  ва интиқоли «зарардида» дар занбарҳо, дар вақти муайян ва босуръат пӯшидани камзӯлҳои ҳимояи фардӣ ширкат варзиданд.

Дар рафти чорабинӣ бачаҳо чусту чолокӣ, омодагиҳои хуби ҷисмонӣ ва маҳорати кор дар дастаҳоро нишон доданд. Аммо муҳимтар аз ҳама, онҳо дар бораи кори наҷотдиҳандагон тасаввурот ҳосил карданд ва амалҳои онҳоро иҷро намуданд, ки ин хеле таассурот бахшид. Бисёриҳо ҳатто изҳор доштанд, ки оянда мехоҳанд аз ҷумлаи наҷотдиҳандагон бошанд.

Дар хатми чорабинӣ ба ҳамаи ширкаткунандагон дипломҳо ва туҳфаҳои хотиравӣ тақдим шуданд.

Ёдовар мешавем, ки Ассамблеяи генералии СММ 13 октябрро Рӯзи ҷаҳонии коҳиши хатари офатҳо эълон кардааст, ки ҳадафи он мусоидат ба фарҳанги ҷаҳонии коҳиши хатари офатҳои табиӣ мебошад. Ин имконест, ки пешрафтҳои ба дастомада дар масъалаҳои коҳиши хатари офатҳо ва талафоти ҷонӣ, воситаҳои зиндагӣ мутобиқ ба Барномаи қолабии Сендай оид ба коҳиши хатари офатҳо дар солҳои 2015-2030, ки дар Сеюмин конфронси ҷаҳонии коҳиши хатари офатҳои СММ дар Ҷопон моҳи марти соли 2015 қабул шудааст, эътироф карда шаванд.

Соли 2016 Дабири кулли СММ «Маъракаи Сендай ҳафт»-ро барои ҳар хонавода дар муддати ҳафт сол роҳандозӣ намуд. Ҳадаф: «Афзоиши чашмгири ҳамкории байналмилалӣ бо кишварҳои дар ҳоли рушд бо ироаи ҳимояти кофӣ ва пойдор аз онҳо барои ҳимоят аз иқдомоти миллии онҳо барои иҷрои ин барнома барои то соли 2030» мебошад.

АКСҲО: КҲФ ва МГ

Октябрь 13, 2021 11:45

Хабарҳои дигари ин бахш

ОГОҲИИ АГЕНТИИ ОБУҲАВОШИНОСӢ: 21-22 октябр дар Тоҷикистон ҳаво номусоид шуда, борон ва дар доманакӯҳҳо барф меборад
Маликшо Неъматзода зимни сафар ба Бадахшон бо татбиқи ҷамъиятии қонунгузории меҳнат шинос шуд
Вазорати тандурустии Тоҷикистон аз татбиқи муваффақонаи ислоҳоти маблағгузорӣ дар соҳаи тандурустӣ хабар дод
Татбиқи «Лоиҳаи фавқулодаи муқовимат ба вируси COVID-19 дар Тоҷикистон» мавриди баррасӣ қарор гирифт
Мушкилоти муҳоҷирони тоҷик дар деҳаи Шубини шаҳри Воронежи Федератсияи Русия ҳал гардид
15 октябр — Рӯзи умумиҷаҳонии мубориза бо саратони ғадуди ширӣ. 90 фоизи гирифторони ин бемориро занҳои аз 40-сола боло ташкил медиҳанд
Дар Тоҷикистон мехоҳанд Шӯрои ҷамъиятӣ оид ба ҳуқуқи маъюбон таъсис диҳанд
Риояи тозагӣ зиндагии мардумро бароҳат, гуворо ва бехатар мегардонад. 15 октябр — Рӯзи умумиҷаҳонии дастони тоза
Ваколатдор оид ба ҳуқуқи инсон аз муассисаи ислоҳии ЯС 3/1-и Сарраёсати иҷрои ҷазои ҷиноятии Вазорати адлия дидан намуд
Дар ноҳияи Кӯшониён бинои анбори маҳсулоти ғайриозуқа барои аҳолии аз офати табиӣ зарардида ифтитоҳ ёфт
Ҳазорон нафар шаҳрвандони Тоҷикистон дар Русия ба «афви муҳоҷиратӣ» дохил шудаанд
Дар Муассисаи давлатии «Пажуҳишгоҳи меҳнат, муҳоҷират ва шуғли аҳолӣ» Маркази таълимӣ-илмии демографӣ фаъол гардид