Мария Ресса ва Дмитрий Муратов барандагони Ҷоизаи сулҳи Нобел дар соли 2021 гардиданд

ДУШАНБЕ, 08.10.2021 /АМИТ «Ховар»/. Сармуҳаррири «Новая газета» (Русия) Дмитрий Муратов ва журналисти филиппинӣ Мария Ресса барандагони Ҷоизаи сулҳи Нобел барои соли 2021гардиданд. Дар ин бора имрӯз, 8 октябр Кумитаи нобелӣ хабар дод.

Онҳо ба ин ҷоиза барои талошҳояшон дар ҳифзи озодии сухан сарфароз гардидаанд, зикр намуданд дар Кумитаи нобелӣ.

Ҷоизаи сулҳ, тибқи васияти Алфред Нобел, «ба шахсе дода мешавад, ки муваффақияти бузургтаринро ба даст овардааст ё нисбат ба дигарон дар муттаҳидсозии халқҳо ва кам кардани шумораи артишҳои фаъол, инчунин барои баргузории конгрессҳои сулҳ ва ҷалби таваҷҷуҳ ба онҳо” фаъолият намудааст. Мувофиқи васияти охирини олим, ин ҷоиза бар хилофи дигар ҷоизаҳое, ки мувофиқи васияти ӯ таъсис ёфтаанд, на дар Стокҳолм, балки дар Осло дода мешавад. Нобел навиштааст, ки тасмим дар бораи ҷоизаро бояд кумитаи иборат аз панҷ нафар, ки парлумони Норвегия таъйин кардааст, қабул кунад. Чун анъана, аъзои кумита асосан сиёсатмадорони бознишастаи Норвегия ва раҳбарони пешини ҳизб мебошанд.

Ҷоизаи сулҳи Нобел бори аввал соли 1901 дода шуд. Солҳое буданд, ки ғолиб дар ин бахш эълон намешуд, бори охир он соли 1972 рух дода буд. Сабабҳои он ҷангҳои якум ва дуюми ҷаҳонӣ, зиддият миёни аъзои кумита ва «набудани номзадҳои арзанда» буданд.

Дар маҷмӯъ, дар таърихи Ҷоизаи сулҳи Нобел 107 нафар (аз ҷумла 17 зан) ва 25 созмон ба он сазовор шудаанд.

Маросими ҷоизасупорӣ бояд дар Осло 10 декабр — дар солгарди марги Нобел баргузор шавад.

Ёдовар мешавем, ки ҳафтаи Нобел 4 октябр оғоз ёфт. Номи барандагони ҷоизаҳои физика, химия, тиб ва адабиёт аллакай маълум шуданд.

АКС: Кумитаи нобелии Академияи Шветсия