Муассисаҳои таълимии ҷумҳурӣ ба давраи зимистон омодаанд? Шарҳи Вазорати маориф ва илми Тоҷикистон дар ин бора

Октябрь 23, 2021 09:14

ДУШАНБЕ, 23.10.2021. /АМИТ «Ховар»/. Талаботи муассисаҳои таълимии ҷумҳурӣ ба давраи тирамоҳу зимистони солҳои 2021-2022 дар маҷмӯъ 53 ҳазору 825 тонна ангишт, 53 ҳазору 208 метри мураббаъ ҳезум ва 137 ҳазору 104 литр сӯзишвории дизелӣ муайян гардида, ба ҳолати 8 октябр 37 ҳазору 809,6 тонна ангишт, 26 ҳазору 456 метри мураббаъ ҳезум ва 24 ҳазору 650 литр сӯзишвории дизелӣ захира карда шудааст. Ҳамчунин 1010 дегхона, 21 ҳазору 679 адад гармкунаки барқӣ ва 47 ҳазору 97 печи аловӣ дар муассисаҳои таълимии ҷумҳурӣ ба мавсими зимистонгузаронӣ омода карда шудаанд. Дар ин бора сардори маркази матбуоти Вазорати маориф ва илми Ҷумҳурии Тоҷикистон Эҳсони Хушбахт ба АМИТ «Ховар» иттилоъ дод.

Ба иттилои Эҳсони Хушбахт, Вазорати маориф ва илми Ҷумҳурии Тоҷикистон вобаста ба иҷрои қарори Ҳукумати Ҷумҳурии Тоҷикистон аз 3 апрели соли 2021 «Дар бораи сари вақт омода намудани соҳаҳои иқтисодиёт ва иҷтимоиёти ҷумҳурӣ барои фаъолияти мунтазам ва самарабахш дар давраи тирамоҳу зимистони солҳои 2021-2022» дар муассисаҳои соҳаи маориф корҳои назаррас ба анҷом расонидааст.

Тибқи маълумоти пешниҳоднамудаи шаҳру ноҳияҳо, нақшаи захиранамоии маводи асосии гармидиҳӣ дар муассисаҳои таҳсилоти миёнаи умумии шаҳри Душанбе барзиёд иҷро гардида, дар вилояти Суғд низ захираи ангишту ҳезум пурра иҷро шуда, захираи сӯзишвории дизелӣ 79 фоизро ташкил медиҳад.

Вазъи  омодагӣ  ба зимистон махсусан дар шаҳру навоҳии вилояти Хатлон нигаронкунанда буда, дар шаҳру ноҳияҳои Вахш, Дӯстӣ, Панҷ, Балҷувон, Ҳамадонӣ, Муъминобод ва Кӯлоб бо сабабҳои гуногун захираи маводи сӯхт ба таъхир афтодааст. Дар шаҳру ноҳияҳои дигари вилояти Хатлон захираи ангишт 55,4 фоиз, ҳезум 31 фоизро ташкил медиҳад.

Дар муассисаҳои таълимии Вилояти Мухтори Кӯҳистони Бадахшон ба давраи тирамоҳу зимистон 75 фоиз ангишт, 60 фоиз ҳезум захира карда шудааст. Маводи сӯзишвории дизелӣ вобаста ба талабот дар вақти муайян харидорӣ ва истифода карда мешавад.

Инчунин дар шаҳру ноҳияҳои тобеи марказ захираи ангишт 52 фоиз, ҳезум 42 фоиз ва сӯзишвории дизелӣ 13 фоизро ташкил медиҳад. Аммо дар шаҳри Турсунзода, ноҳияҳои Тоҷикобод, Рашт ва Лахш захираи маводи сӯхт ҳоло оғоз нагардидааст.

Дар муассисаҳои миёнаи умумии дорои мақоми ҷумҳуриявӣ захираи маводи асосии гармидиҳӣ, аз ҷумла ангишт 58 фоиз, ҳезум 52 фоиз, сӯзишвории дизелӣ 39 фоиз, дар муассисаҳои таҳсилоти ибтидоӣ ва миёнаи касбӣ ангишт 33 фоиз, дар муассисаҳои таҳсилоти олии касбӣ ва баъдидипломӣ ангишт  13 фоизро ташкил медиҳад.

Барои  гузаронидани мавсими тирамоҳу зимистони солҳои 2021-2022 23 ҳазору 222 метри мураббаъ шишабандии дару тирезаҳои муассисаҳои таълимии ҷумҳурӣ ба нақша гирифта шудааст, ки аз он ба ҳолати 8 октябр   95 фоиз иҷро шудааст.

Зарангези ЛАТИФ,
АМИТ «Ховар»

Акс аз бойгонии АМИТ «Ховар»

Октябрь 23, 2021 09:14

Хабарҳои дигари ин бахш

«ПРЕЗИДЕНТ – ҲОМИИ МИЛЛАТ». Таҳти чунин унвон дар Китобхонаи миллии Тоҷикистон ҳамоиш доир шуд
Аз номи Сергей Лебедев барои дар сатҳи баланд баргузор намудани Анҷумани VI омӯзгорон ва кормандони маорифи кишварҳои ИДМ дар Душанбе номаи сипос расид
ХАБАРИ ХУШ! Номинаҳои 2500-солагии шаҳраки қадимаи Тахти Сангин ва 1050-солагии Абурайҳони Берунӣ ба Феҳристи ҷашнвораҳои ЮНЕСКО барои солҳои 2022-2023 шомил гардиданд
ТАСС: Вазорати маориф ва илми Тоҷикистон ба Русия пешниҳод намудааст, ки китобҳои дарсии забони русиро ба мактабҳо мутобиқ созад
«Пешвои миллат ва таҳкими нуфузи байналмилалии Тоҷикистон», — шарҳи матбуоти даврии Тоҷикистон
ЁДГОРИИ МЕЪМОРИИ МАНСУБ БА ДАВРАИ АНТИҚА. Бостоншиносони Тоҷикистон ва Фаронса аз пойсутун ва ҷузъи сутуни деҳаи Пушинги Данғара дидан намуданд
Гулчеҳра Қоҳирова: Астероиди 4660 Nereus барои Замин ягон хатар надорад
РУСИЯ ҚОИДАҲОИ НАВИ ИМЛОИ ЗАБОНИ РУСИРО ТАҲИЯ НАМУД. Қаблан ба қоидаҳои имлои забони тоҷикӣ низ тағйирот ворид шуда буд
Мактаб-интернати ҷумҳуриявии кӯдакони ятим дар шаҳри Кӯлоб ба давраи зимистон омода мебошад
Рустам Ҷабборов барои таҳия ва эҷоди филмномаи «Ҷомӣ ва Навоӣ» ба Душанбе омад
39 хонандаи шаҳри Душанбе дар Олимпиадаи байналмилалии Анталия соҳиби ҷойҳои ифтихорӣ шуданд
Китоби «Пешвои миллат ва сиёсати давлатии забон» ба нашр расид