Президенти мамлакат Эмомалӣ Раҳмон дар таҷлили Меҳргон дар ноҳияи Ҷалолиддини Балхӣ иштирок намуданд

Октябрь 28, 2021 14:10

ДУШАНБЕ, 28.10.2021 /АМИТ «Ховар»/. 28 октябр Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ноҳияи Ҷалолиддини Балхӣ дар таҷлили ҷашни Меҳргон иштирок карданд.

Зимни боздид Сарвари давлат муҳтарам Эмомалӣ Раҳмон бо заҳматкашони ноҳия суҳбати самимӣ анҷом дода, барои баланд бардоштани маҳсулнокии заминҳои корам маслиҳатҳои муфид доданд.

Иттилоъ дода шуд, ки тибқи нишондиҳандаҳои нуҳмоҳаи соли ҷорӣ, дар тамоми бахшҳои кишоварзии ноҳия пешравиҳои назаррас ба қайд гирифта шудаанд. Дар ин давра истеҳсоли пахта, ғалла, картошка, полезиҳо, пилла ва ширу тухм зиёд шуда, тибқи маълумоти оморӣ, ҳаҷми истеҳсоли маҳсулоти кишоварзӣ 110,2 фоизро ташкил додааст.

Дар намоиши мазкур ҳамчунин меваҳои шаҳдбор, сабзавоту полезӣ, асал,  зироати хӯроки чорво ба маъраз гузошта шуд.

Иттилоъ дода шуд, ки соли 2021 дар хоҷагиҳои ҷамъиятӣ ва деҳқонии ноҳияи Ҷалолиддини Балхӣ дар майдони 791 гектар кишти барвақтии зироат гузаронида шуд, ки ин нишондиҳанда нисбат ба соли гузашта 46 гектар зиёд мебошад.

Тибқи натиҷагирӣ аз моҳи январ то моҳи сентябр, аз хоҷагиҳои ноҳия 81 ҳазору 385 тонна сабзавот, 39 ҳазору 319 тонна полезӣ ва 11 ҳазору 483 тонна мевагӣ ҷамъоварӣ ва ба бозорҳои мамлакат ба фурӯш бароварда шудааст. Дар ин давра истеҳсоли асал ба 38 тонна баробар гардид.

Аҳли заҳмат рушди соҳаи кишоварзиро натиҷаи амалишавии саривақтии барномаҳои давлатӣ, дастгирии пайвастаи Ҳукумати Ҷумҳурии Тоҷикистон ва фароҳам овардани имтиёзҳои соҳавӣ арзёбӣ намуданд.

Дар чорабинии имрӯза ҳамчунин бонувони ноҳия гӯшаи ҳунарҳои мардумӣ ва таомҳои миллӣ ташкил карданд.

Бонувони ҳунарманд бо пешниҳоди хӯрокҳои гуногуни миллӣ, навъҳои нон, кулчақандҳои болаззат ҳар гуна кашидадӯзиву гулдӯзиҳоро низ пешкаш намуданд.

Сесолаи Солҳои рушди деҳот, сайёҳӣ ва ҳунарҳои мардумиро иштирокчиён омили асосии эҳё гардидани ҳунарҳои миллӣ ва рушди омӯзиши он миёни ҷавонон арзёбӣ намуданд.

Зимни суҳбатҳои самимӣ кишоварзону ҳанармандон ба Пешвои муаззами миллат муҳтарам Эмомалӣ Раҳмон барои ғамхории пайваста, дастгирии ҳунармандон ва эҳёи оину суннатҳои бостонӣ, аз ҷумла, баланд бардоштани мақоми ҷашни Меҳргон изҳори миннатдорӣ карданд.
Иштирок дар таҷлили ҷашни Меҳргон дар ноҳияи Ҷалолиддини Балхӣ 28.10.2021

Октябрь 28, 2021 14:10

Хабарҳои дигари ин бахш

35-СОЛАГИ ИСТИҚЛОЛИ ДАВЛАТӢ. Дар Ховалинг таъмиру навсозии беш аз 200 иншоот ба нақша гирифта шудааст
Сокинони маҳаллаи Наврӯзи шаҳри Бӯстон бо оби нӯшокӣ таъмин гардиданд
Дар ҳудуди шаҳри Гулистон сохтмони меҳмонхона ва осоишгоҳу марказҳои солимгардонӣ идома доранд
Қитъаи муҳими роҳи Душанбе – Хоруғ – Қалъаихумб бо пулу нақб мавриди истифода қарор гирифт
Пешвои миллат Эмомалӣ Раҳмон пас аз анҷоми сафари корӣ дар Вилояти Мухтори Кӯҳистони Бадахшон ба шаҳри Душанбе баргаштанд
Дар ВМКБ беш аз 1000 иншоот ба истиқболи 35-солагии Истиқлоли давлатӣ мавриди истифода қарор гирифт
Президенти Ҷумҳурии Тоҷикистон Эмомалӣ Раҳмон бо роҳбарон ва фаъолони Вилояти Мухтори Кӯҳистони Бадахшон мулоқот намуданд
Суханронии Президенти Ҷумҳурии Тоҷикистон, Пешвои миллат Эмомалӣ Раҳмон дар мулоқот бо роҳбарон ва фаъолони Вилояти Мухтори Кӯҳистони Бадахшон
Президенти Ҷумҳурии Тоҷикистон Эмомалӣ Раҳмон дар шаҳри Хоруғ дар тантанаҳои идона ба ифтихори 28-солагии Рӯзи ваҳдати миллӣ иштирок намуданд
Суханронии Президенти Ҷумҳурии Тоҷикистон, Пешвои миллат Эмомалӣ Раҳмон ба ифтихори 28-солагии Рӯзи ваҳдати миллӣ
Сарвари давлат Эмомалӣ Раҳмон дар шаҳри Хоруғ бинои нави истиқоматии 5-ошёна барои хизматчиёни давлатиро мавриди истифода қарор доданд
Пешвои миллат Эмомалӣ Раҳмон дар ҳудуди Парки технологии шаҳри Хоруғ коргоҳҳои истеҳсолии маҳсулоти гӯштӣ ва обҳои табиии ташнашиканро ифтитоҳ намуданд