7 паҳлавони шинохтаи тоҷик дар Чемпионати ҷаҳон оид ба самбо дар Узбекистон иштирок мекунанд

Ноябрь 10, 2021 08:50

ДУШАНБЕ, 10.11.2021 /АМИТ «Ховар»/. Аз 12 то 14 ноябр дар шаҳри Тошканди Ҷумҳурии Узбекистон  Чемпионати ҷаҳон оид ба самбо сурат мегирад, ки дар он Ҷумҳурии Тоҷикистонро 7 паҳлавони шинохта  намояндагӣ хоҳанд кард. Ин нахустин Чемпионати ҷаҳон оид ба самбо хоҳад буд, ки дар 7 вазн ғолибон муайян мешаванд, хабар дод ба  шореҳи варзиши  АМИТ «Ховар» Меҳрони Қурбон корманди Кумитаи кор бо ҷавонон ва варзиши назди Ҳукумати Ҷумҳурии Тоҷикистон Ҳалимҷон Набизода.

Ҳайати дастаи  мунтахаби  Тоҷикистон оид ба самбо дар чемпионати ҷаҳон аз инҳо иборат аст:

 

  1. Акмалиддин Каримов (58кг)
  2. Хушқадам Хусравов (64кг)
  3. Муҳаммадисо Раҷабов (71 кг)
  4. Ҳамроз Раҷабов (79кг)
  5. Зафар Олимшоев (88кг)
  6. Фирдавс Насимзода (-98кг)
  7. Хуршед Маҷидов (+100кг)

Ёдовар  мешавем, ки  аз 5 то  8 ноябри соли 2020  Чемпионати ҷаҳон оид ба самбо миёни ҷавонон ва калонсолон  дар Сербистон баргузор шуда буд. Дар  он 4 варзишгари тоҷик иштирок карда, соҳиби медал шуданд.  Дар чемпионати соли гузашта  бо сабаби маҳдудияти сафар дар бисёр кишварҳо 400 варзишгар аз 30 давлат иштирок карданд.

Дар мусобиқаи ҷаҳонии самбои соли гузашта паҳлавони маъруфи ҷумҳурӣ Акмалиддин Каримов дар вазни -57кг медали нуқра ба даст овард. Ӯ нахуст рақибаш Нгуен Рубинро аз Франсия, баъдан Бектош Назарови узбекистонӣ ва Андрей Лашичуки украиниро мағлуб карда, ба даври ниҳоӣ роҳ ёфт. Акмалиддин дар финал аз Владимир Гладкихи россиягӣ бо ҳисоби 0:1 ноком шуда, барои ҷойи дуюм бо медали нуқра сарфароз гашт.

Медалҳои биринҷиро Комроншоҳ Устопириён дар вазни-90 кг, Хушқадам Хусравов дар вазни-62 кг миёни мардҳо ва Самеъҷон Абдушукуров дар вазни-87 кг миёни ҷавонон сазовор шуданд.

Комроншоҳ дар даври аввал рақибаш Шокирӣ Ал-Ҳаюниро аз Марокаш шикаст дод. Вале баъдан аз қаҳрамони бисёркаратаи ҷаҳон Сергей Рябови русиягӣ мағлуб гашт. Сипас, ӯ барои ҷойи сеюм бар Ярослав Давядчук аз Украина дастболо шуда, бо медали биринҷӣ сарфароз гардид.

Хушқадам Хусравов дар даври аввал аз намояндаи Русия Александр Матаис мағлуб гардид. Ӯ баъдан дар қувваозмоиҳо барои ҷои сеюм Небойса Николичи сербӣ ва Фарҳод Абжалиеви қирғизистониро шикаст дода, соҳиби медали биринҷӣ гардид.

                                                                                  АКС аз КМО Тоҷикистон

Ноябрь 10, 2021 08:50

Хабарҳои дигари ин бахш

Дастаи «Хуҷанд» бо медалҳои нуқраи Лигаи олии Тоҷикистон-2021 сарфароз гардонида шуд
Сокинони Ҷамоати деҳоти Рӯдакии ноҳияи Восеъ соҳиби майдончаи варзишӣ мегарданд
Хуршед Назаров бо камарбанди чемпионӣ аз Русия ба Ватан баргашт
Пешвои миллат Эмомалӣ Раҳмон Президенти Кумитаи миллии олимпии Тоҷикистон интихоб шуданд
25 варзишгари тоҷик дар Чемпионати ҷаҳон оид ба намуди ҷиу-ҷитсу иштирок мекунанд
АҲСАН! Алишер, Файзалӣ, Далер, Лайло ва Эҳсон — беҳтарин бозингарони соли 2021 эътироф гардиданд
Дар Душанбе маросими ҷоизасупорӣ ба беҳтаринҳо дар соҳаи кор бо ҷавонон дар соли 2021 доир мегардад
Дар қуръакашии Ҷоми Осиё-2022 мунтахаби Тоҷикистон (U-23) шомили сабади чорум шуд
ФУТБОЛ. Беҳтаринҳои Лигаи олӣ дар соли 2021 соҳиби ҷоиза мегарданд
Ассотсиатсияи журналистони риштаи варзиши Тоҷикистон даҳ варзишгари беҳтарини соли 2021-ро эълон намуд
Қуръакашии мусобиқаи интихобии Ҷоми Осиё-2022 оид ба футзал 6 январ баргузор мегардад
Дар Душанбе Конгресси шашуми КАФА баргузор гардид