БОРИ КАҶ БА МАНЗИЛ НАМЕРАСАД. Дар ҳудуди Хатлон тақрибан 15 кг метамфетамин бозёфт ва мусодира карда шуд

Ноябрь 18, 2021 11:22

ДУШАНБЕ, 18.11.2021 /АМИТ «Ховар»/. Зимни гузаронидани  чорабиниҳои фаврӣ-ҷустуҷӯӣ кормандони Агентии назорати маводи нашъаовари назди Президенти Ҷумурии Тоҷикистон дар ҳудуди вилояти Хатлон аз ду нафар шаҳрвандони Афғонистон тақрибан 15 кг моддаи психотропии навъи метамфетаминро, ки мехостанд онро аз ҳудуди ноҳияҳои наздисарҳадӣ ба Душанбе ва дигар шаҳру ноҳияҳои кишвар интиқол диҳанд, бозёфт ва мусодира намуданд, хабар медиҳад АМИТ «Ховар» бо истинод ба маркази матбуоти Агентӣ.

Тавре дар иттилоия омадааст, кормандони Агентӣ маълумоти фаврӣ гирифтанд, ки як гурӯҳи ҷиноятии машғул ба муомилоти ғайриқонуни маводи нашъаовар ният дорад маводи нашъаоварро аз ҳудуди ноҳияҳои наздисарҳадӣ ба Душанбе ва дигар шаҳру ноҳияҳои кишвар интиқол диҳад.

«Барои ҷилавгирӣ аз ин нияти нопок аз тарафи кормандони Агентӣ  қарор қабул шуд, ки нашъаҷалобонро бо далели шайъӣ дастгир намоянд. Ҳамин тавр, 7 ноябр зимни гузаронидани  чорабиниҳои фаврӣ-ҷустуҷӯӣ дар шоҳроҳи Ҷайҳун — Панҷи поён, ҳудуди деҳаи Шоликорони ноҳияи Ҷайҳуни вилояти Хатлон аз ҷониби кормандони Агентӣ ду нафар зода ва истиқоматкунандагони вулусволии Имом-Соҳиби  вилояти Қундузи Ҷумҳурии Исломии Афғонистон Салоҳиддин валади Боймад ва Маҳмадсахӣ валади Холмуҳаммад бо гумони даст доштан дар қочоқи маводи нашъадор ба миқдори махсусан калон дастгир гардиданд», — хабар доданд аз Агентӣ.

Ҳангоми кофтукови шахсӣ аз номбурдагон як адад халтаи полимерии рангаш сафед, ки дар дохили он  15 адад  зарфҳои пластмасии дар дохилашон бастаҳои селофанӣ бо маводи кристалии рангашон сафед мавҷуд буданд, бозёфт ва мусодира карда шуд.

Мутобиқи маълумотномаи шуъбаи эспертизаи судии Агентӣ маводи мусодирагардида  14 кг 850 гр  моддаи психотропии навъи метамфетаминро ташкил дод.

«Тафтишот муайян намуд, ки дастгиршудагон ин маводи психотропии навъи метамфетаминро аз рӯи маслиҳати пешакӣ бо як нафар шахси ба тафтишот номаълум- шаҳрванди Афғонистон бо лақаби «Мавлавӣ» ва тахаллуси «Ҳоҷӣ мулло» бо мақсади ба каси дигар додан содир намудаанд, — тазаккур доданд аз Агентӣ. — Аз рӯи ҳодисаи мазкур парвандаи ҷиноятӣ бо моддаҳои 200 қисми 4  банди «д», 335 қисми 2 ва 289 қисми 3 Кодекси ҷиноятии Ҷумҳурии Тоҷикистон оғоз гардида, тафтиш идома дорад».

Бояд зикр намуд, ки метамфетамин яке аз намудҳои синтетикии маводи нашъадор буда, намуди тағйирдодашудаи амфетамин мебошад, ки шиддатнокии қавитар ва зудтаъсиркунандаро нисбат ба дигар маводи нашъаовар дорад.

Истеъмоли ин гуна мавод ҷавононро гумроҳу фирефта намуда, ба солимии ҷомеа ва генофонди миллат зарбаи манфӣ мерасонад.

Бинобар ин, ҳар шаҳрванди ҷумҳуриро зарур аст, ки аз солимӣ ва оромии давлати худ дифоъ намояд.

Синтез, фурӯш ва интиқоли  моддаҳои синтетикии нашъадор тибқи Конвенсияи СММ дар бисёре аз давлатҳои ҷаҳон, аз ҷумла Тоҷикистон ҷиноят мебошад.

АКС: Агентии назорати маводи нашъаовари назди Президенти ҶТ

Ноябрь 18, 2021 11:22

Хабарҳои дигари ин бахш

Дар Тоҷикистон бар асари 564 ҳодисаи сӯхтор 14 нафар ҳалок гардидааст
Сари вақт напардохтани маблағ ва дуздии барқ яке аз сабабҳои норасоии барқ дар зимистон аст
Давлатҳои Осиёи Марказӣ ҳамкориро барои пешгирӣ ва бартарафсозии ҳолатҳои фавқулода тақвият медиҳанд
НИШАСТИ МАТБУОТӢ. Аз ҷониби мақомоти прокуратураи Тоҷикистон беш аз 4 ҳазор санҷиш гузаронида шудааст
НИШАСТИ МАТБУОТӢ. Дар Тоҷикистон шумораи ҷиноятҳои қаллобӣ, дуздӣ ва авбошӣ зиёд гардидааст
НИШАСТИ МАТБУОТӢ. Дар Тоҷикистон 222 ҳодиса ва ҳолатҳои фавқулода ба қайд гирифта шуд
Хадамоти давлатии оташнишонӣ кафили бехатарии мардуми Тоҷикистон аст. Ба ифтихори иди касбии кормандони соҳа
Аз 26 то 29 июл дар баъзе кӯчаҳо ва хиёбони Рӯдакии пойтахт ҳаракати воситаҳои нақлиёт маҳдуд карда мешавад
НИШАСТИ МАТБУОТӢ. Дар бозорҳои истеъмолии Тоҷикистон беш аз 107 ҳазор килограмм маҳсулоти бесифат ва хавфнок нобуд карда шуд
Бо иштироки ҳайати роҳбарикунандаи Вазорати мудофиаи Тоҷикистон ҷамъомадӣ таълимӣ-методӣ доир гардид
Маркази матбуоти Қӯшунҳои сарҳадии Кумитаи давлатии амнияти миллии Ҷумҳурии Тоҷикистон хабар медиҳад
Дар вилояти Суғд кӯшиши интиқоли 70 кг маводи нашъадор пешгирӣ гардид