Дар Кӯлоб оид ба таҳдидҳои ҷаҳони муосир ва таъсири онҳо ба суботи сиёсии Тоҷикистон машварати минтақавӣ доир шуд

ДУШАНБЕ, 28.11.2021. /АМИТ «Ховар»/. 26 ноябр дар шаҳри Кӯлоб дар мавзӯи «Таҳдидҳои ҷаҳони муосир ва таъсири онҳо ба суботи сиёсии Ҷумҳурии Тоҷикистон» машварати минтақавӣ доир шуд, хабар медиҳад мухбири минтақавии АМИТ «Ховар». 

Дар машварат мудири шуъбаи рушди иҷтимоӣ ва робита бо ҷомеаи дастгоҳи раиси вилояти Хатлон Рамазон Насриддинзода, мудири шуъбаи дин, танзими анъана ва ҷашну маросими мақомоти иҷроияи ҳокимияти давлатии вилояти Хатлон Муҳаммадӣ Шарифзода, ховаршинос, профессори фахрии Донишгоҳи давлатии Кӯлоб ба номи Абӯабдуллоҳи Рӯдакӣ Зафар Мирзоён, мудирони шуъбаҳои рушди иҷтимоӣ ва робита бо ҷомеа, дин, танзими анъана ва ҷашну маросим, маориф ва имомхатибони масҷидҳои ҷомеаи шаҳру ноҳияҳои минтақаи Кӯлоб иштирок намуданд.

Дар машварат Зафар Мирзоён дар мавзӯи «Суиистифодаи дини ислом аз тарафи гурӯҳҳои ифротӣ» маърӯза карда, оид ба аз номи дини ислом баромад кардану ба мардум паҳн кардани маълумоти дурӯғ аз тарафи баъзе гурӯҳҳои тундагаро, ки имрӯз мардумро бо зӯри силоҳ кор мефармоянд, ибрози ақида намуд.

Рамазон Насриддинзода дар мавзӯи «Нақши Пешвои миллат дар таҳкими истиқлолияти давлатӣ ва рушди давлатдории миллӣ» сухан гуфта, аз ҷумла зикр намуд, ки «имрӯз мардуми тоҷик дар фазои тинҷу ором умр ба сар мебаранд. Ин ҳама аз сиёсати хирадмандонаю дурандешонаи Пешвои миллат бармеояд. Дар кори ба Ваҳдати миллӣ расидани халқи мо, пеш аз ҳама, хизматҳои бузурги Сарвари давлатро бояд ёдовар шуд. Зеро маҳз бо саҳму талошҳои беназири он кас мамлакати мо дар муддати кӯтоҳ аз ҷанги таҳмилӣ баромада, рӯ ба инкишоф ниҳод».

Зикр шуд, ки зимни таҷлили 30-солагии Истиқлолияти давлатӣ мо шоҳид гардидем, ки садҳо иншооти гуногунсоҳаи хоҷагии халқи мамлакат ба истифода дода шуданд. Ин ҳама пешравӣ аз нақши созгори Пешвои миллати тоҷик ва бунёдкоррию талошҳояшон барои некуаҳволии мардуми тоҷик дарак медиҳад.

АКСҲО: МИҲД вилояти Хатлон