Имрӯз дорандаи ҷоизаи тиллоии байналмилалии «Тоҷ барои сифат» — ТВ «Ҷаҳоннамо» 13-сола мешавад

Ноябрь 5, 2021 14:07

ДУШАНБЕ, 05.11.2021 /АМИТ «Ховар»/. Имрӯз ба таъсиси  Муассисаи давлатии «Ҷаҳоннамо» 13 сол пур мешавад. Муассисаи давлатии «Ҷаҳоннамо» бо Қарори Ҳукумати Ҷумҳурии Тоҷикистон  31 октябри соли 2008 таъсис ёфта, фаъолияти худро  5  ноябри соли 2008 оғоз кардааст.

Муассисаи  мазкур бо мақсади иҷрои дастуру супориш ва ҳидоёти Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва қарору санадҳои Ҳукумати Ҷумҳурии Тоҷикистон ҷиҳати таъмини сартосарии ҷумҳурӣ бо пахши намоишҳои телевизиони Тоҷикистон, беҳтар намудани сатҳ ва сифати барномаҳо, афзун намудани нуфузи иттилоотии Тоҷикистон дар арсаи ҷаҳон ва ғайра аз 31 январи соли 2018 ба пахши рақамӣ ва формати дақиқияти баланд (HD) гузашт.

Бо истифода аз ин фурсат мехоҳем дар бораи фаъолияти  шабакаи телевизиони «Ҷаҳоннамо»,  ки аз оғози таъсис то имрӯз муддати 24 соат бе таваққуф бо се забон: тоҷикӣ, русӣ ва англисӣ барномаҳои иттилоотӣ ва таҳлилӣ пахш менамояд, ба хонандагон маълумот диҳем.

Телевизиони «Ҷаҳоннамо» ба моҳвора пайваст буда, ҳудуди фарогирии он дар кишварҳои хориҷи дуру наздик тақрибан  65 фоизро дар бар мегирад. Муассисаи  мазкур бо шабакаи телевизионии «Ал-ҷазира»-и давлати Қатар, шабакаи телевизионии «Пресс-ТВ»-Ҷумҳурии  Исломии Эрон, «РашаТудей»-и Федератсияи Русия, шабакаҳои телевизионии «Нурин» ва «Тулу»-и Ҷумҳурии Исломии Афғонистон, бахши  форсии шабакаи «Би-Би-Си»-и  Британияи Кабир ва ғайра робитаҳои ҳамкорӣ ба роҳ мондааст.

Тавре  аз Муассисаи давлатии «Ҷаҳоннамо» ба хабарнигори АМИТ «Ховар» иттилоъ доданд, ин шабака моҳи марти соли 2015 барои  нишондоду дастовардҳо дар соҳаи идоракунӣ, баланд бардоштани сифати кору маҳсулот, ҷорӣ намудани технология ва инноватсияҳои ҷадид дар шаҳри Женеваи Швейтсария аз ҷониби ширкати байналмилалии «Би-Ай-Ди» ба дарёфти Ҷоизаи тиллоии байналмилалии «Тоҷ барои сифат» сазовор гардида буд.

«Ҷаҳоннамо» шабакаи иттилоотии саросарии  мамлакат  буда, мақсад  аз таъсиси он таъмини  аҳолӣ  бо иттилооти муфиду саривақтӣ, баланд бардоштани сифат ва фаврияти иттилоот дар соҳаҳои  сиёсат,  иқтисод, ҳаёти иҷтимоӣ, илму фарҳанг ва дигар ахбори муҳим аз мамолики хориҷи дуру наздик  маҳсуб мешавад.

Самтҳои асосии фаъолияти муассисаро таъмини  аҳолии  ҷумҳурӣ  бо иттилооти наву дақиқ,  сареъу  саҳеҳ аз дохил ва хориҷи он, таблиғи ғояҳои ваҳдати миллӣ, афзалият додан ба арзишҳои миллию умумибашарӣ, демократия, сулҳу субот ва  инсонпарварӣ  ташкил медиҳанд.

Телевизиони «Ҷаҳоннамо» дар маҷмӯъ аз 3 идораи эҷодӣ — «Хабар», «Барномаҳои таҳлилӣ», «Нашри барномаҳо» иборат буда, ҳамзамон дар он  бахши хабарҳои хориҷӣ бо номи  «Дунё» низ фаъолият мекунад. Ҳайати «Ҷаҳоннамо»-ро мутахассисони варзида, хатмкардагони донишгоҳҳои олӣ, номзадҳои илм, аспирантон, магистрони илмӣ ва иштирокчиёни семинару тренингҳои байналмилалӣ ташкил медиҳанд.

Дар шабакаи «Ҷаҳоннамо» дар баробари барномаҳои иттилооотӣ, ҳамзамон барномаҳои таҳлилӣ низ таҳия ва пахш мегарданд. Барномаҳои таҳлилии ин шабака бештар фарогири мавзӯъҳои сиёсӣ, иқтисодӣ ва иҷтимоиву фарҳангӣ буда, дар инъикос ва ошкорнамоии камбудиҳои иҷтимоӣ  саҳми босазо доранд.

Муассисаи давлатии «Ҷаҳоннамо» тибқи ҷадвали корбаст 140 басти корӣ дорад, ки аз ин 38 нафарашонро занҳо ташкил менамоянд. Синни кормандони муассиса аз 18 то 40 солро дар бар мегирад.

Мавриди зикр аст, ки 75 фоизи кормандон маълумоти олӣ, 25 фоиз – олии нопурра, миёнаи касбӣ ва миёнаи махсус доранд. Дар муассиса 90 фоизи кормандон аз рўи ихтисос фаъолият доранд. Ду нафар номзади илм ҳам ифои вазифа мекунанд.

Кормандони эҷодию фаннии «Ҷаҳоннамо» дар ҷустуҷӯ ва эҷоди тоза буда, дар барномаҳои сиёсӣ-таҳлилии «Геополитика», «Дидгоҳ», «Таҳқиқ», «Нуқтаи назар», «Масъулият», «Ҷомеа ва ҷаҳон», «Ҷаҳони иртибот», «Суҳбати муҳим», «Суҳбати рӯз», «Иқтисод+» рӯйдоду воқеаҳои кишвар ва ҷаҳонро ба риштаи таҳлил дароварда, афкору андешаи коршиносони масоили сиёсиро оид ба ин ва ё он рўйдоди муҳими олам ҷой додаанд. Барномаҳои «Рушди устувор», «Робита», «Амал», «Масири рушд», «Назари хос», «Бунёдкор», «Аз ҳар гӯшаи ҷаҳон», «Тандурустӣ»,  «Оё медонед?», «Шифои комил», «Фарҳанг», «Хати сабз», «Тозанашр», «Туризм», «Кишоварз», «Маориф ва илм», «Иқтисод», «Набзи сайёра»  ва «Сифат» фарогири навигариҳои соҳаҳои иҷтимоӣ, инкишофи бахшҳои гуногуни соҳаи илм, тағйирёбии иқлими сайёра ва дигар масъалаҳои рушди ҷомеа мебошанд.

Дар маҷмӯъ, тақрибан ҳудуди  80 дарсади барномаҳои телевизиони «Ҷаҳоннамо» иттилоотӣ мебошанд. Аз  24 соати вақти эфири шабака танҳо 4 соати онро барномаҳои хабарии англисиву русӣ ташкил додаанд, яъне аз шаш як ҳиссаи маҷмӯи барномаҳо бо забони хориҷӣ ва панҷ ҳиссаи боқимондаи он бо забони  давлатӣ пахш мегарданд. Инчунин агар аз 24 соати барномаҳо тақрибан 16 соати он аз  барномаҳои хабарӣ иборат бошад, 14 соати боқимондаро барномаҳои таҳлиливу сиёсӣ, фарҳангиву маърифатӣ  ва суҳбатҳо ташкил  медиҳанд.

Телевизиони «Ҷаҳоннамо» ягона шабакаи иттилоотӣ  дар ҷумҳурӣ  ба ҳисоб меравад, ки 24 соат ба пахши рӯйдоду навигарӣ, барномаҳои таҳлилию иттилоотӣ ва фарҳангиву фароғатӣ  машғул аст.

Ёдовар мешавем, ки аз нимаи дуюми асри XX телевизион ба ҷумлаи расонаҳои бонуфузе табдил ёфтааст, ки барои фароғат, таҳсил, гирифтани хабар ва таблиғ  ба одамон  хизмат мекунад.  Шабакаи иттилоотии «Ҷаҳоннамо» низ имрӯз  миёни мардум ҷойгоҳи муносибе пайдо намудааст.

София ШОИК,
АМИТ «Ховар»

 АКСҲО аз ТВ «Ҷаҳоннамо»

Ноябрь 5, 2021 14:07

Хабарҳои дигари ин бахш

Ғолибони озмуни «Шоҳин» муайян гардиданд
«БУНЁДИ МИЛЛАТ АЗ МАОРИФ ОҒОЗ МЕЁБАД». Ҷаласаи солонаи ҳайати мушовара дар Вазорати маориф ва илми мамлакат
Дар Душанбе ғолибони олимпиадаҳои байналмилалӣ қадрдонӣ гардиданд
«РУШДИ МАОРИФ ДАР МЕҲВАРИ ПАЁМИ ПРЕЗИДЕНТ». Таҳти ин унвон дар Душанбе ҳамоиши кормандони соҳа доир гардид
«САГВАФО». Имрӯз ба зодрӯзи муаллифи ин ҳикояи марғуб Шоири халқии Тоҷикистон Ғаффор Мирзо 93 сол пур мешавад
БАРНОМАИ ФУЛБРАЙТ. Омӯзгорони тоҷик метавонанд дар мактабҳои Амрико таҷриба омӯзанд, дарс гӯянд, маҳораташонро такмил дода, ба хонандагону донишҷӯёни ИМА давлати худро муаррифӣ кунанд
Соли 2021 олимони АМИТ 18 патент барои ихтироот ва 21 қарори мусбат оид ба додани патенти Тоҷикистон барои ихтироотро ба даст оварданд
Театри давлатии академии опера ва балети Тоҷикистон ва Театри давлатии академии калони Узбекистон Ёддошти тафоҳум ба имзо расониданд
БЛИНКЕН МУСИҚИИ ТОҶИКИРО ДӮСТ МЕДОРАД. Роҳбари Департаменти давлатии ИМА дар бораи сурудҳои дӯстдоштааш изҳори назар намуд
ИМРӮЗ- РӮЗИ ТАВАЛЛУДИ НЮТОН. Барои чӣ мо бояд дар ин бора донем ва чаро Президенти Ҷумҳурии Тоҷикистон солҳои 2020-2040-ро Бистсолаи омӯзиш ва рушди илмҳои табиатшиносӣ, дақиқ ва риёзӣ дар соҳаи илму маориф эълон карданд?
Дар давраи таътил дар Суғд озмуни вилоятии «Китобхони беҳтарин» гузаронида мешавад
«Донишномаи Донишгоҳи омӯзгорӣ» интишор шуд