Муҳаммадюсуф Имомзода ва Такасака Мунео тақвияти ҳамкорӣ дар соҳаи маориф ва илмро баррасӣ намуданд

Ноябрь 22, 2021 15:53

ДУШАНБЕ, 22.11.2021. /АМИТ «Ховар»/. Вазорати маориф ва илми Ҷумҳурии Тоҷикистон ҳамкориро дар соҳаи маориф ва илм бо Ҷумҳурии Ҷопон дар асоси Комиссияи байниҳукуматии Тоҷикистон ва Ҷопон оид ба ҳамкории иқтисодӣ, техникӣ ва илмӣ ба роҳ мондааст. Ин нукта имрӯз зимни мулоқоти Вазири маориф ва илми Ҷумҳурии Тоҷикистон Муҳаммадюсуф Имомзода бо  роҳбари Агентии ҳамкории байналмилалии Ҷопон дар Тоҷикистон (JICA) Такасака Мунео иброз гардид, иттилоъ дод сардори маркази матбуоти Вазорати маориф ва илми Ҷумҳурии Тоҷикистон Эҳсони Хушбахт.

Зимни вохӯрӣ Муҳаммадюсуф Имомзода аз ҳамкории ҷойдоштаи Вазорати маориф ва илм бо Агентии ҳамкории байналмилалии Ҷопон дар Тоҷикистон (JICA) дар соҳаи маориф ва илм изҳори сипос намуд.

Инчунин иттилоъ дода шуд, ки Вазорати маориф ва илми Ҷумҳурии Тоҷикистон ба тақвияти ҳамкорӣ дар соҳаи маориф ва илм бо Ҷопон диққати махсус дода, ҳавасманди ба сатҳи нав баровардани ин ҳамкорӣ мебошад.

«Таҷрибаи ҷаҳонӣ нишон медиҳад, ки дар марҳилаи гузариш давлатҳои рӯ ба тараққӣ ниёз ба ҳамкории судманд бо давлатҳои аз лиҳози иқтисод, технология, маориф ва илм пешрафта доранд ва дар ин самт Ҷопон метавонад барои соҳаи маориф ва илми Ҷумҳурии Тоҷикистон дар доираи барномаҳо, лоиҳаҳо саҳми арзанда»,-гуфт Вазири маориф ва илм.

Зикр шуд, ки муассисаҳои таҳсилоти олии касбии Ҷумҳурии Тоҷикистон бо муассисаҳои таҳсилоти олии касбии Япония, аз қабили Донишгоҳи Акитаи Ҷопон, Донишгоҳи Чиба, Донишгоҳи Васеда  ҳамкорӣ дошта, шаҳрвандони Тоҷикистон дар муассисаҳои таълимии Ҷопон дар зинаҳои гуногун ба таҳсил фаро гирифта шудаанд. Ҳамасола шаҳрвандони Ҷумҳурии Тоҷикистон тариқи бурсияи MEXT (МЕКСТ)-и Ҳукумати Ҷопон ба муассисаҳои таълимии он кишвар фиристода шуда, айни ҳол, дар муассисаҳои таҳсилоти олии касбии Ҷопон зиёда аз 50 шаҳрванди Ҷумҳурии Тоҷикистон дар зинаҳои гуногун таҳсил менамоянд.

Тазаккур дода шуд, ки айни ҳол дар Донишкадаи давлатии забонҳои Тоҷикистон ба номи С. Улуғзода ва Донишгоҳи славянии Русия-Тоҷикистон омӯзиши забони ҷопонӣ ба роҳ монда шуда, аз соли 2002 то соли 2021 119 нафар донишҷӯ Донишкадаи давлатии забонҳои Тоҷикистонро бо ихтисоси тарҷумони забони ҷопонӣ хатм намудаанд.

Соли 2019 бо ташаббуси Сафорати Ҷопон дар Душанбе ва маблағгузории ин кишвар дар Тоҷикистон  3 муассисаи таҳсилоти миёнаи умумӣ дар шаҳру ноҳияҳои Роғун, Турсунзода ва Файзобод сохта, ба истифода дода шудаанд.

Роҳбари Агентии ҳамкории байналмилалии Ҷопон дар Тоҷикистон (JICA) Такасака Мунео зикр кард, ки аз ҷониби агентии мазкур барномаи омӯзишии «Ҷопоншиносӣ» таҳия шудааст, ки мақсади он паҳн намудани таҷрибаи рушди тараққиёти Ҷопон тавассути омӯзиши роҳбарони ояндаи давлатҳои рӯ ба тараққӣ буда, ташаббускори барнома бевосита Президенти JICA Китаока Шиничи мебошад.

Таъкид гардид, ки айни ҳол барномаи мазкур бо номи «7 боби навсозии Ҷопон» дар 11 кишвари дунё амалӣ шуда, дар назар аст, ки дар 43 давлати дигар, аз ҷумла Ҷумҳурии Тоҷикистон амалӣ карда шавад.

Дар охир, ҷонибҳо вобаста ба зиёд намудани бурсияҳои таҳсилӣ барои шаҳрвандони Ҷумҳурии Тоҷикистон дар муассисаҳои касбии Ҷопон ва дар факултетҳои забони ҷопонии муассисаҳои таҳсилоти олии касбӣ ба роҳ мондани омӯзиши барномаи «Ҷопоншиносӣ» мубодилаи афкор намуда, таъкид доштанд, ки ҷиҳати вусъат бахшидани ҳамкорӣ тадбирҳои зарурӣ андешида мешаванд.

АКСҲО аз маркази матбуоти Вазорати маориф ва илми ҶТ

Ноябрь 22, 2021 15:53

Хабарҳои дигари ин бахш

МЕҲРГОН ОМАД, МУБОРАК, МЕҲРГОН ОМАД! Пагоҳ дар Душанбе Иди Меҳргон бо шукуҳу шаҳомати хосса таҷлил мегардад
СИТОРАИ ТОБНОК ДАР САМОИ СИНАМО. Офаридаҳои баландмазмун ба Бахтиёр Худойназаров шуҳрати ҷаҳонӣ бахшид
Коргардон Аҳмад Аминӣ: «Эрониҳо Тоҷикистонро дӯст медоранду орзуи тамошои манзараҳои нотакрори онро доранд»
Феҳристи муштараки шоҳкориҳо ва бозёфтҳои нодири осорхонаҳои миллии Осиёи Марказӣ нашр мегардад
ИДИ МЕҲРГОН-МЕРОСИ НИЁГОН. Давоми таърих дар фарҳанги мардум арзишҳои озмудашудаи миллат побарҷо мондаанд
Дар Академияи миллии илмҳо бо намояндагони Корпоратсияи «Синергия» рушди инфрасохтори рақамӣ баррасӣ шуд
СИНАМОҶАШНВОРАИ БАЙНАЛМИЛАЛИИ «ТОҶИ СОМОН». Дар кинотеатрҳои ҷумҳурӣ беш аз 40 филм намоиш дода мешавад
Дар доираи Рӯзҳои синамои Қирғизистон дар Душанбе филмҳои «Шамбала» ва «Эсимда» намоиш дода мешаванд
Котиби иҷроияи Комиссияи иқтисодии СММ барои Аврупо дар Осорхонаи миллӣ бо тамаддуни тоҷикон шинос гардид
Ҳамкории илмӣ дар самтҳои зеҳни сунъӣ ва рақамикунонӣ бо намояндагони Чин баррасӣ карда шуд
«ДУШАНБЕ ИНВЕСТ-2025». Иштирокдорони Форуми байналмилалии сармоягузорӣ «Қалъаи Ҳисор»-ро тамошо намуданд
«Бахтиёр Худойназаров намояндаи барҷастаи синамои тоҷик дар арсаи байналмилалӣ аст», — бардошт аз форум дар Душанбе