Дар чор минтақаи вилояти Суғд ярмарка-фурӯши ангишт ҷараён дорад

 ДУШАНБЕ, 24.12.2021 /АМИТ «Ховар»/. Ду рӯз аст, ки дар шаҳрҳои Хуҷанд, Конибодом, Истаравшан ва ноҳияи Бобоҷон Ғафурови вилояти Суғд ярмарка-фурӯши ангишт доир гардида истодааст. 23 декабр дар микроноҳияи 34-и шаҳри Хуҷанд, назди саристгоҳи мусофиркашонии «Абрешим», инчунин дар шаҳрҳои Конибодому Истаравшан ва ноҳияи Бобоҷон Ғафуров чунин ярмарка-фурӯши ангишт доир гардида, сокинон аз он бо нархи нисбатан арзонтар ангишт хариданд. Дар ин бора АМИТ “Ховар” бо истинод ба мақомоти иҷроияи ҳокимияти  давлатии вилояти Суғд хабар медиҳад.

Тайи ду рӯз корхонаҳои истеҳсоли ангишти КФ Шахтаи «Фон-Яғноб», КФ «КА Зиддӣ», ҶСК «Ангишт» ва ғайраҳо дар ярмарка-фурӯши ангишт дар шаҳрҳои Хуҷанд, Конибодом, Истаравшан ва ноҳияи Бобоҷон Ғафурови вилояти Суғд маҳсулоти худро бо нархи хеле арзон- аз 70 дирам то 1 сомонӣ барои як кило пешниҳоди сокинон менамоянд.

Бояд зикр кард, ки Вазорати саноат ва технологияҳои нав бо мақсади иҷрои дастуру супоришҳои Президенти Ҷумҳурии Тоҷикистон муҳтарам Эмомалӣ Раҳмон оид ба таъмини талаботи аҳолии мамлакат бо ангишт дар давраи зимистони солҳои 2021-2022, инчунин ҷиҳати ба танзим даровардани нархи ин намуди маводи сӯхт дар бозори истеъмолӣ ярмарка-фурӯши ин маҳсулотро ба роҳ мондааст.

Чунин ярмаркаҳо имконият медиҳанд, ки сокинон барои сипарӣ намудани фасли зимистони имсола миқдори зарурии маводи сӯхтро бо нархи чанд маротиба арзон харидорӣ намуда, захира намоянд.

Ёдовар мешавем, ки ярмарка-фурӯши ангишт имрӯз низ идома меёбад.

АКС: МИҲД-и в. Суғд