Дар хоҷагиҳои деҳоти Кӯлоб заминҳоро аз шудгори хушсифат бароварда, ғалладонагӣ мекоранд

КӮЛОБ, 12.12.2021  /АМИТ «Ховар»/. Деҳқонони хоҷагиҳои Ҷамоати деҳоти Зиракии шаҳри Кӯлоб то имрӯз беш аз 80 фоизи нақшаи дурнамои кишти зироати тирамоҳиро анҷом додаанд. Дар дигар ҷамоатҳои деҳот низ кишоварзон баъди ҷамъоварии ҳосили маҳсулоти парварида заминҳоро нарм намуда, ғалладонагӣ ва сабзавот мекоранд, хабар медиҳад мухбири минтақавии АМИТ «Ховар».

Дар чунин рӯзҳои мусоид гузаронидани корҳои саҳроӣ  мувофиқи мақсад мебошад, мегӯянд мутахассисон. Тавре сардори раёсати кишоварзии шаҳри Кӯлоб Дилшоди Давлаталӣ иттилоъ дод,  айни замон кишоварзон аз тамоми техникаи мавҷуда истифода бурда, ба маъракаи шудгору кишти тирамоҳӣ вусъат бахшидаанд ва мақсад доранд, ки рӯзҳои наздик нақшаи дурнамои кишти тирамоҳиро бо сифати баланд анҷом диҳанд.

Дар ин рӯзҳо кишоварзони мамлакат бо истифода аз техникаҳои муосири кишоварзӣ, мошинолот ва дастрасӣ ба тухмиҳои хушсифати ба шароити иқлими минтақаҳо мутобиқ дар асоси тавсияи мутахассисони соҳаи кишоварзӣ ба шудгору кишти ғалладонагӣ ва дигар намуди маҳсулоти кишоварзӣ вусъат бахшида истодаанд. Хусусан дар деҳоти Кӯлоб хоҷагиҳои деҳқонию инфиродӣ ва кооперативҳои истеҳсолӣ ҳамарӯза даҳҳо гектар заминҳоро аз шудгори хушсифат бароварда, ғалладонагӣ мекоранд.

АКС аз манбаъҳои боз