ДУШАНБЕ, 17.12.2021 /АМИТ «Ховар»/. 16 декабр дар ҳудуди Раёсат оид ба масоили кӯли Сарези Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон рӯнамоии низоми нави огоҳии бармаҳал ва мониторинги кӯли Сарез баргузор шуд, хабар медиҳад АМИТ «Ховар» бо истинод ба КҲФ ва МГ.

 Низоми нав дар марз бо Афғонистон то ноҳияи Шаҳритӯси вилояти Хатлон, ҳаммарз бо вилояти Сурхондарёи Ҷумҳурии Узбекистон мегузарад. Пештар аз ин то ноҳияи Рӯшони ВМКБ системаи мавҷудаи огоҳии пешакӣ (алоқаи радио) гузошта шуда буд.

Таҷҳизоти нав аз низомҳои интиқоли маълумоти моҳвораӣ,  пешгӯӣ, назорат ва огоҳкунанда иборат мебошад.

 Ин таҷҳизот тобистони имсол дар доираи татбиқи лоиҳаи миллии идораи хатари офатҳои табиии КҲФ ва МГ ва Бонки осиёии рушд харидорӣ ва насб карда шуд.

Дар маросим Раиси Кумитаи ҳолатҳои фавқулода ва мудофиаи гражданӣ, генерал-полковники милитсия Рустам Назарзода, Директори кишварии Бонки осиёии Рушд дар Ҷумҳурии Тоҷикистон Шани Кэмпбелл, роҳбарон ва намояндагони созмонҳои ҷамъиятии муқими кишвар ширкат намуданд.

Раиси Кумитаи ҳолатҳои фавқулода ва мудофиаи гражданӣ маросимро ифтитоҳ намуда, ба Бонки Осиёии Рушд ва дигар шарикони байналмилалӣ барои ҳамкорӣ изҳори сипос намуда, гуфт, ки низоми нави насбшуда, ки ҳатто хурдтарин тағйиротро дар низоми онлайн ироа мекунад, имкон медиҳад вазъи кӯл беҳтар омӯхта ва бехатарии аҳолӣ дар сурати рух додани  ин ё он офати табиии эҳтимолӣ таъмин карда шавад.

Шанӣ Кэмпбелл аҳамияти татбиқи ин лоиҳаро зикр намуда, ба омодагии БОР барои идомаи ҳамкорӣ дар оянда таъкид намуд.

Дар анҷоми қисми расмӣ намоиши имконоти низоми нави мониторинг ва огоҳии бармаҳал дар кӯли Сарез сурат гирифт.

Мушовири байналмилалии Лоиҳаи идоракунии хатари офатҳои табиӣ Рассел Боулз тавонмандиҳои низоми навро ба тариқи онлайн намоиш дода, ба суолҳои мавриди таваҷҷуҳ посух гуфт.

 АКС: КҲФ ва МГ