«ИН ЭЪТИРОФ НЕСТ». Дар Кобул намояндагии Иттиҳодияи Аврупо ифтитоҳ меёбад

Декабрь 8, 2021 12:35

ДУШАНБЕ, 08.12.2021 /АМИТ «Ховар»/. Намояндагии Иттиҳодияи Аврупо ҳафтаҳои наздик дар Кобул ифтитоҳ меёбад, аммо ин маънои аз ҷониби Брюссел эътироф кардани ҳаракати радикалии «Толибон»-ро дар Афғонистон (мамнуъ дар Тоҷикистон) надорад. Дар ин бора рӯзи сешанбе зимни нишасти матбуотӣ дар Комиссияи Аврупо намояндаи хадамоти сиёсати хориҷии Иттиҳоди Аврупо Набил Массралӣ изҳорот дод, хабар медиҳад АМИТ «Ховар» бо истинод ба ТАСС.

«Мо барои таъмини ҳузури ҳадди ақалли Иттиҳоди Аврупо дар Кобул кор карда истодаем. Барои ин масъала ҳафтаҳо лозим аст, на моҳҳо. Ва ин нишонаи эътироф нест (ҳукумати «Толибон», — тавзеҳи АМИТ «Ховар»)»,- гуфт ӯ ва таъкид кард, ки феълан ҷузъиёташро ифшо карда наметавонад.

Ба иттилои Массралӣ, ҳузури ҳадди ақалли Иттиҳоди Аврупо дар Кобул барои расонидани кумак ба мардуми Афғонистон зарур аст. «Мо бояд тамоми кори аз дастамон меомадаро анҷом диҳем, то ба мардуми Афғонистон кумак расонем», — илова намуд ӯ.

Дар Афғонистон вазъи иқтисодӣ босуръат бад мегардад: нархи озуқа ва сӯзишворӣ баланд мешавад, садҳо ҳазор нафар одамон бе кор ва манзил мондаанд, фаъолияти молиявӣ бисёр паст шуд. Дар соҳаи тандурустӣ вазъи ниҳоят душвор ба амал омадааст: нарасидани мутахассисон, доруворӣ ва таҷҳизоти тиббӣ мушоҳида мегардад.

Ёдовар мешавем, ки қаблан Президенти Ҷумҳурии Тоҷикистон муҳтарам Эмомалӣ Раҳмон борҳо аз ҷомеаи ҷаҳонӣ, бахусус, СММ ва Кумитаи Байналмилалии Салиби Сурх даъват карда буданд, ки ба мардуми Афғонистон кумаки изтирорӣ расонанд.

Тибқи арзёбии СММ, дар Афғонистон 3,5 миллион нафар паноҳандагони дохилӣ ба сар бурда, дар баробари ин соли 2021 700 000 нафар гуреза шудаанд.

Гуфта мешавад, паноҳандагон ба сарулибоси гарм, сӯзишворӣ барои гарм кардани манзил, манзили гарм, ғизо ва дору ниёз доранд.

«Вақте ҳарорат аз сифр паст мешавад, афғонҳо ба душвориҳои ғайричашмдошт дучор мегарданд. Интизор меравад, ки ҳарорати ҳаво то 25 дараҷа паст шавад. Ва бисёре аз оилаҳои паноҳанда манзили дуруст – чизи муҳиме, ки дар сардиҳои шадид зарур аст, надоранд», — гуфта мешавад дар сомонаи СММ.

Тибқи маълумоти созмон, буҳрони гуманитарӣ дар Афғонистон рӯз аз рӯз бадтар мешавад: тақрибан 23 миллион нафар (55 дарсади аҳолӣ) аз норасоии шадиди ғизо азият мекашанд ва тақрибан 9 миллион нафари онҳо бо хатари гуруснагӣ рӯбарӯ ҳастанд.

Аввали моҳи ноябр Президенти Ҷумҳурии Тоҷикистон муҳтарам Эмомалӣ Раҳмон дар мулоқот бо сафирони навтаъйини якчанд кишварҳо изҳор доштанд, ки Тоҷикистон омода аст «имконияти густурдаи моддию техникӣ»-и худро барои ироаи кумакҳои байналмилалӣ ба Афғонистон, ки дар он бузургтарин буҳрони гуманитарӣ дар ҷаҳон авҷ гирифта истодааст, фароҳам орад.

Раёсати Комиссари Олии СММ оид ба паноҳандагон (UNHCR) ахиран ба ҷомеаи ҷаҳонӣ муроҷиат карда, даъват намуд, ки барои расонидани кумакҳои байналмилалӣ ба паноҳандагони дохилӣ дар Афғонистон 374,9 миллион доллар ҷудо намоянд, хабар медиҳад АМИТ «Ховар» бо истинод ба сомонаи созмон.

                                                      АКС аз бойгонӣ

Декабрь 8, 2021 12:35

Хабарҳои дигари ин бахш

Хадамоти иҷро дар арафаи Соли нави мелодӣ ба пиронсолону маъюбон кумак расонид
Ҳавои ду рӯзи охири соли 2021 дар Тоҷикистон чӣ гуна мешавад?
Дар Душанбе доир ба амнияти иҷтимоӣ ҳамчун омили муҳими рушди устувор конфронси илмиву амалӣ доир гардид
Тарбиятгирандагони Мактаб-интернати ҷумҳуриявии низомаш махсуси шаҳри Ҳисор дар вазъияти тантанавӣ соҳиби туҳфаҳои Пешвои миллат шуданд
Ба сарбозони қисмҳои ҳарбӣ, хизматчиён ва нафақагирони КҲФ ва МГ аз номи Сарвари давлат туҳфаҳои солинавӣ тақдим шуданд
Дар Раёсати Вазорати корҳои дохилӣ дар шаҳри Душанбе ярмарка-фурӯши маҳсулоти мавриди ниёзи аввал ташкил гардид
Ба иштирокчиёни ҷанг ва собиқадорони меҳнати ноҳияи Шаҳринав туҳфаҳо ва маводи хӯрокворӣ тақдим шуданд
Кумакҳои Пешвои миллат ба Мактаб-интернати ҷумҳуриявии кӯдакони ятим дар шаҳри Кӯлоб расонида шуданд
Аз номи Пешвои миллат ба хонандагони Мактаб-интернати ҷумҳуриявии сустшунавоёни ноҳияи Рӯдакӣ туҳфаҳои идона тақдим шуданд
Баландтарин афзоиши аҳолӣ пас аз пошхӯрии СССР дар Тоҷикистон ба қайд гирифта шуд
ОГОҲИИ АГЕНТИИ ОБУҲАВОШИНОСӢ. 28-29 декабр дар минтақаҳои алоҳидаи кӯҳии Тоҷикистон эҳтимоли фаромадани тарма дар назар аст
Бинои асосии Беморхонаи клиникавии шаҳрии ҷарроҳию табобатии №1-и Хуҷанд навсозӣ мегардад