«ОБ — САРЧАШМАИ АСОСИИ ИМКОНИЯТҲОИ САЙЁҲИИ ТОҶИКИСТОН». Дар Душанбе таҳти ин унвон ҳамоиши илмӣ баргузор гардид

Декабрь 28, 2021 14:11

ДУШАНБЕ, 28.12.2021. /АМИТ «Ховар»/. Имрӯз бо иқдоми Кумитаи рушди сайёҳии назди Ҳукумати Ҷумҳурии Тоҷикистон дар якҷоягӣ бо Агентии миллии иттилоотии Тоҷикистон «Ховар» дар ҳошияи татбиқи ташаббуси Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон оид ба Даҳсолаи байналмилалии амал “Об барои рушди устувор, солҳои 2018-2028” таҳти унвони «Об — сарчашмаи асосии имкониятҳои сайёҳии Тоҷикистон» ҳамоиши илмӣ баргузор гардид.

Дар ҳамоиши мазкур намояндагони Дастгоҳи иҷроияи Президенти Ҷумҳурии Тоҷикистон, Кумитаи рушди сайёҳӣ, АМИТ «Ховар», вазорату идораҳо, коршиносон ва мутахассисони соҳаи об, ширкатҳои сайёҳӣ, осоишгоҳҳо ва муассисаҳои таълимӣ, ки дар риштаи сайёҳӣ мутахассис омода менамоянд, иштирок доштанд.

Зикр гардид, ки маҳз бо талошҳои созандаву бунёдкоронаи Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон захира ва имконияти обиву сайёҳии кишвар ба таври шоиста дар сатҳи байналмилалӣ муаррифӣ ва масъалагузорӣ карда мешаванд.

Тоҷикистон дорои неъматҳои бойи табиӣ буда, кӯҳистони он пур аз чашмаву обҳои мусаффо мебошад ва аксарияти онҳо хусусияти табобатӣ доранд. Об манбаи ҳаёт ва ҷузъи асосии рушди устувори инсонӣ ба ҳисоб рафта, дар бисёр кишварҳои олам мардум аз норасоии оби тоза ва ошомиданӣ танқисӣ мекашанд. Бесабаб нест, ки Сарвари давлат борҳо аз минбари баланди Созмони Милали Муттаҳид оид ба мушкилоти вобаста ба об суханронӣ карда, ҷомеаи ҷаҳониро ба ҳамкории зич даъват намуданд.

Дар идомаи ҳамоиш аз ҷониби мутахассисону коршиносони соҳаи об дар мавзӯъҳои идоракунии захираҳои обию энергетикӣ, рушди сайёҳӣ ва пиряхҳо, арзишҳои экологӣ ва нақши меҳварии онҳо, обҳои шифобахш- омили ҷалби сайёҳон маърӯзаҳо хонда шуданд.

Қабл аз ҳамоиш  намоиши аксҳо доир ба об, мавзеъҳои ҷолиби сайёҳӣ ва табиати нотакрори Тоҷикистон доир шуд, ки иштирокдорон аз он дидан намуданд.

Дар анҷоми кори ҳамоиш миёни иштирокдорон доир ба мавзӯъҳои матраҳгашта ва ҷанбаҳои муҳими ташаббусҳои Пешвои миллат оид ба «Даҳсолаи байналмилалии амал «Об барои рушди устувор», солҳои 2018-2028» ва саҳми он дар рушди соҳаи сайёҳии мамлакат мубодилаи афкор сурат гирифт.

Ҳамчунин дар доираи ҳамоиши мазкур озмуни ҷумҳурияӣ барои беҳтарин очеркҳо ва мақолаҳои публисистӣ таҳти унвони «Об – гарави рушди деҳот ва сайёҳӣ», ки Кумитаи рушди сайёҳии назди Ҳукумати Ҷумҳурии Тоҷикистон ва Агентии миллии иттилоотии Тоҷикистон «Ховар» бахшида ба 30-солагии Истиқлолияти давлатии Ҷумҳурии Тоҷикистон, Солҳои рушди деҳот, сайёҳӣ ва ҳунарҳои мардумӣ (2019-2021) ва Даҳсолаи байналмилалии амал «Об барои рушди устувор, солҳои 2018-2028» эълон намуда буданд, ҷамъбаст гардид. Дар озмун аз тамоми минтақаҳои ҷумҳурӣ олимону коршиносон ва рӯзноманигорон иштирок намуданд. Ғолибони озмун, ки аз пойтахти мамлакат – шаҳри Душанбе, шаҳрҳои Хоруғ, Кӯлоб ва Исфара буданд, бо диплом ва маблағҳои пулӣ, инчунин иштирокдорони фаъол бо сипоснома ва маблағҳои пулӣ сарфароз гардонида шуданд.

АКСҲО: АМИТ «Ховар»

Декабрь 28, 2021 14:11

Хабарҳои дигари ин бахш

САЙЁҲИИ МОҲИДОРӢ-САМТИ АФЗАЛИЯТНОК. Дар Тоҷикистон туризми шикори моҳӣ тавассути хатсайрҳо ба роҳ монда мешавад
Дар Намоишгоҳи байналмилалии «ИНОПРОМ» дар Тошканд Тоҷикистонро 28 корхонаи саноатӣ намояндагӣ менамоянд
Раиси вилояти Хатлон аз коргоҳҳои саноатии ноҳияи Восеъ боздид намуд
Дар шаҳри Кӯлоб ярмарка-фурӯши маҳсулоти мавриди ниёзи аввал оғоз гардид
Имсол дар ноҳияи Мастчоҳ дар 12 500 гектар чигит кишт мешавад
Ҳайати Тоҷикистон барои иштирок дар ҷаласаи баҳории Хазинаи Байналмилалии Асъор дар ИМА қарор дорад
Дар Тоҷикистон низоми миллии ҷустуҷӯии монанд ба Яндекси русӣ ва Google-и амрикоиро таҳия намудаанд
Тоҷикистон аз вусъати ҳамкорӣ бо Ҷопон дар таҷдид ва таъмири роҳҳои мошингард қаноатманд аст
«Барномаи рушди нақлиёти барқӣ дар Тоҷикистон барои солҳои 2022-2026» қабул мегардад
«СУҒД-2022». Дар шаҳри Хуҷанд Ярмаркаи VIII байналмилалии савдо доир мегардад
Миёни Тоҷикистон ва Чин ҳамкории тиҷоратию иқтисодӣ густариш меёбад
Дар Душанбе бо иштироки роҳбарону намояндагони ширкатҳои сайёҳии Тоҷикистон ҳамоиш доир гардид