Сафири Тоҷикистон дар Ӯзбекистон бо ҳайати кормандони рӯзномаи «Овози тоҷик» мулоқот намуд

Декабрь 22, 2021 14:03

ДУШАНБЕ, 22.12.2021 /АМИТ «Ховар»/. 14 декабр Сафири Фавқулода ва  Мухтори Ҷумҳурии Тоҷикистон дар Ҷумҳурии Узбекистон Абдуҷаббор Раҳмонзода бо ҳайати кормандони рӯзномаи «Овози тоҷик» вохӯрӣ намуд. Дар ин бора АМИТ «Ховар» бо истинод ба Сафорати Тоҷикистон дар Тошканд хабар медиҳад.

Дар аввал сармуҳаррири рӯзнома Шерпӯлод Вакилов ташрифи меҳмонро хайрамақдам гуфта, омадани Сафири Ҷумҳурии Тоҷикистон дар Ҷумҳурии Узбекистонро ба идораи рӯзнома дар сӣ соли охир аввалин номид.

Ҳамзамон мавсуф дар мавриди робитаҳои дӯстонаи ду кишвар, нақши сарони давлатҳо дар таҳкими дӯстии ду халқ ва масъалаи омода кардани кадрҳои рӯзноманигорӣ барои матбуоти тоҷикии Узбекистон изҳори назар кард.

Сафири Ҷумҳурии Тоҷикистон дар Ҷумҳурии Узбекистон академик Абдуҷаббор Раҳмонзода аз муносибати дӯстона ва бародаронаи Тоҷикистону Узбекистон дар ҳама самтҳо суҳбати муфассал анҷом дод.

Ӯ нақши рӯзномаи «Овози тоҷик»-ро дар инъикоси густурдаи робитаҳо махсус таъкид карда, талошу заҳматҳои қаҳрамононаи устод Садриддин Айниро, ки яке аз аввалин  муассисони  рӯзномаи «Овози тоҷик» мебошад, зикр намуд.  Гуфта шуд, ки  бо «Овози тоҷик» ба ҷуз устод Айнӣ, ки   дар катори муассисон ба ҳайати таҳририяи ин рӯзнома дохил буд,  дигар адибону олимони маъруфи тоҷик  Абулқосим Лоҳутӣ, Бобоҷон Ғафуров, Ҷалол Икромӣ, Сотим Улуғзода ҳамкорӣ кардаанд.   Аввалин муҳаррири «Овози тоҷик» Абдулқайюм Қурбӣ ва котиби масъули он Сайидризо Ализода буданд. Ғайр аз ин дар  идораи рӯзнома Нисормуҳаммади Афғон, Фахруддини Роҷӣ, Маъруф Расулӣ, Н. Бектош, Ҳоҷӣ Муин, Қозимзода ва дигар кор мекарданд.

Дар ин замина Абдуҷаббор Раҳмонзода ҷиҳати тақвият додани  муносибатҳо пешниҳод намуд, ки дар оянда байни рӯзномаи «Овози тоҷик» ва рӯзномаи «Ҷумҳурият» Ёддошти тафоҳум оид ба ҳамкорӣ ба имзо расонида шавад.

Зимни вохӯрӣ кормандони нашрия фикру андешаҳои худро нисбат ба робитаҳои неки ду кишвар баён доштанд.

Сафир дар охири вохӯрӣ бастаи китобҳои бадеии адибони тоҷикро ба идораи рӯзномаи «Овози тоҷик» туҳфа кард.

Донишмандону таърихшиносон  «Овози тоҷик»-ро  «поягузори матбуоти точик» ном бурдаанд, ки ин беваҷҳ нест.  «Овози тоҷик»  аввалин нашрияе буд, ки забони худро на форсӣ, балки тоҷикӣ эълон кард. Ғайр аз ин рӯзномаи мазкур журналистону адибони зиёдеро тарбия намуда, ба таъсиси як қатор рӯзномаву маҷаллаҳо асос гузоштааст.

Ёдовар мешавем, ки рӯзномаи «Овози тоҷик» 25 августи соли 1924 бори аввал дар шаҳри Самарқанд нашр шудааст. Баъд идораи он ба шаҳри Тошканд кӯчида, тайи 95 сол бо номҳои гуногун нашр гардидааст. Аз соли 1991 рӯзнома номи аввалаи худ — «Овози тоҷик»-ро гирифта, нашрияи муштараки Парлумон ва Девони Вазирони Ҷумҳурии Узбекистон мебошад.

АКСҲО: Сафорати Тоҷикистон дар Тошканд

Декабрь 22, 2021 14:03

Хабарҳои дигари ин бахш

Сарвазири Тоҷикистон Қоҳир Расулзода дар ҷаласаи навбатии Шурои сарони ҳукуматҳои ИДМ дар Ашқобод иштирок намуд
Дар Исломобод конфронси байналмилалӣ марбут ба масъалаҳои обу иқлим баргузор шуд
Сарвазири Тоҷикистон Қоҳир Расулзода бо Президенти Туркманистон Сердар Бердимуҳамедов мулоқот анҷом дод
АРЗҲОИ ДӮСТӢ. 29 май аз барқарории муносибатҳои дипломатӣ байни Тоҷикистон ва Озарбойҷон 32 сол сипарӣ мегардад
Cафири Тоҷикистон бо ректори Донишгоҳи технологияҳои муҳандисии Туркманистон ба номи Оғузхон мулоқот намуд
Сироҷиддин Муҳриддин ва Мурат Нуртлеу масъалаҳои мубрами муносибатҳои Тоҷикистон ва Казоқистонро муҳокима намуданд
Сироҷиддин Муҳриддин ва Сергей Лавров омодагӣ ба музокироти дуюми байниидоравии Тоҷикистон ва Русияро баррасӣ намуданд
Дар Женева ҷаласаи ҳамоҳангсозони Барномаи махсуси Созмони Милали Муттаҳид барои иқтисодиёти Осиёи Марказӣ баргузор гардид
Ҳайати Тоҷикистон дар Конфронси байналмилалии амнияти ҳаставӣ дар Вена иштирок дорад
Вазири корҳои хориҷии Тоҷикистон дар ҷаласаи Шурои вазирони корҳои хориҷии Созмони ҳамкории Шанхай иштирок намуд
Шараф Шерализода бо Котиби иҷроияи Комиссияи иқтисодии Созмони Милали Муттаҳид мулоқот намуд
Тоҷикистон ва Покистон татбиқи мувофиқатҳои қаблан дар сатҳи олӣ бадастомадаро баррасӣ намуданд