ДАРАХТ БИНШОН! Дар ноҳияи Ҳамадонӣ зиёда аз 1500 бех дарахтони тут ва мевадиҳандаю ороишӣ шинонида шуданд

ДУШАНБЕ, 30.01.2022. /АМИТ «Ховар»/. Мақомоти иҷроияи ҳокимияти давлатии ноҳияи Мир Саид Алии Ҳамадонӣ бо мақсади иҷрои    «Барномаи давлатии маҷмӯи рушди тарбия ва маърифати экологии аҳолии Ҷумҳурии Тоҷикистон барои солҳои 2021-2025» мавсими ниҳолшинониро идома дода, дар ҷамоатҳои деҳоти Чубек ва Ҷамоати деҳоти Меҳнатобод зиёда аз 1500 бех  дарахтони тут ва ниҳолони мевадиҳандаю ороишӣ шинонида шуданд. Дар ин бора аз маркази матбуоти Раиси ноҳияи  Мир Саид Алии Ҳамадонӣ хабар доданд.

Бо ташаббуси бахши ҳифзи муҳити зисти ноҳия инчунин дар хоҷагиҳои деҳқонии «Абдулфайз», «Давлаталӣ-2005»-и Ҷамоати деҳоти Чубек зиёда аз 600 адад ва дар хоҷагиҳои деҳқонии «Самар», «Зарафшони панҷ», «Аҳмадбой» ва «Умед»-и Ҷамоати деҳоти Меҳнатобод зиёда аз 900 адад ниҳолони сояафкану мевадиҳанда шинониданд.

Ҳар сол дар ҳудуди ноҳия бо қувваи ҳашарчиён садҳо бех дарахтони гуногун шинонда мешаванд, ки онҳо ба ҳусни ноҳия таровати тоза мебахшанд.

Бино ба иттилои бахши ҳифзи муҳити зисти ноҳия, аз аввали мавсими ниҳолшинонӣ дар ҳудуди Ҷамоати деҳоти Чубек 1510 бех ва Ҷамоати деҳоти Меҳнатобод 1560 бех дарахтони гуногун шинонида шудаанд.

АКС аз МИҲД Ҳамадонӣ