Прокуратураи ҳарбии гарнизони Душанбе прапоршики Кумитаи ҳолатҳои фавқулода ва мудофиаи гражданӣ Ш. Сангалиевро гунаҳгор донист

ДУШАНБЕ, 21.01.2022. /АМИТ «Ховар»/. Прокуратураи ҳарбии  гарнизони Душанбе тафтиши парвандаи ҷиноятиро бо моддаи 110,  қисми 1-и Кодекси ҷиноятии Ҷумҳурии Тоҷикистон (қасдан ба саломатӣ расонидани зарари вазнине, ки барои ҳаёти инсон хавфнок) нисбат ба  сардори нуқтаи алоқаи қисми ҳарбии Кумитаи ҳолатои фавқулода ва мудофиаи граждании назди Ҳукумати Ҷумҳурии Тоҷикистон, прапоршик Сангалиев Шоҳрух Рустамович, соли таваллудаш 02.02.1999 ба итмом расонида, барои моҳиятан баррасӣ намудан ба суд ирсол намуд.

Тавре АМИТ «Ховар» бо истинод ба Прокуратураи генералии Ҷумҳурии Тоҷикистон хабар медиҳад, тафтишоти пешакии парвандаи ҷиноятӣ муқаррар намуд, ки Сангалиев Шоҳрух Рустамович зимни иҷрои вазифаҳои хизмати ҳарбӣ 22 июни соли 2021 ба сафари хизматӣ ба қисми ҳарбии КҲФ ва МГ назди Ҳукумати Ҷумҳурии Тоҷикистон фиристонида шуда, дар ин давом даст ба содир намудани ҷинояти вазнини қасдона задааст.

Чунончӣ 16 августи  соли 2021,  тахминан соати 19:30 дақиқа дар деҳаи Сароби ҷамоати деҳоти Зайнабободи ноҳияи Рӯдакӣ байни хизматчиёни ҳарбии қисми ҳарбии номбурда  прапоршик Сангалиев Шоҳрух Рустамович ва лейтенанти калон Ҳофизи Саймурод муноқиша cap задааст. Дар ҷараёни  муноқиша прапоршик Сангалиев Ш. Р. бо мақсади расонидани зарари вазнин ба саломатӣ бо корди бо худ доштааш ба тарафи чапи мавзеи камари лейтенанти  калон Ҳофизи Саймурод як зарба зада, ба ӯ ҷароҳати вазнини ҷисмонӣ барои ҳаёт хавфнок расонидааст.

«Суди ҳарбии гарнизони шаҳри Душанбе судшаванда Сангалиев Шоҳрух Рустамовичро дар содир намудани ҷинояти бо моддаи 110,  қисми 1-и КҶ Ҷумҳурии Тоҷикистон гунаҳгор дониста, номбурдаро маҳкум кард»,- омадааст дар хабари  Прокуратураи генералии Ҷумҳурии Тоҷикистон.    

АКС аз манбаи боз