ДУШАНБЕ, 28.01.2022 /АМИТ «Ховар»/. 27 январ дар гулбоғи Қаҳрамони Тоҷикистон устод Мирзо Турсунзода дар ноҳияи Шаҳринав ҷашни Сада бо шукӯҳу шаҳомати хосса баргузор шуд, ки дар он кишоварзон, ҳунармандон ва доираи васеи сокинон иштирок намуданд, хабар доданд ба АМИТ «Ховар» аз мақомоти иҷроияи ҳокимияти давлатии ноҳияи Шаҳринав.

Дар ҷашни Сада дастовардҳои даврони соҳибистиқлолии мамлакат ба маърази  намоиш гузошта шуданд. Дар ин радиф боғдорон гӯшаеро бо намудҳои зиёди ниҳолҳои дарахтони мевадиҳандаю ороишӣ, гулу буттаҳои ҳархела ва тухмиҳои зироат ба намоиш гузошта, аз ҳосили фаровони сол мужда расониданд.

Дар гӯшаи дигар тамоми намудҳои техника ва мошинолоти кишоварзӣ гузошта шуданд. Ҷашни Сада омодагӣ ба кишту кори баҳорӣ аст, дар ин замина воситаҳои техникии кишоварзӣ таъмир гардида, ба мавсими кишту кор омода карда мешаванд.

Аз тарафи ҳунармандон гӯшаҳои ҳунармандӣ, аз ҷумла оҳангарӣ, рассомӣ, пазандагию дӯзандагӣ, ҳунарҳои мардумӣ ва  сайёҳӣ ба намоиш гузошта шуда, диққати ҳамагонро ҷалб намуданд.

Раиси ноҳия Ҷаббор Носирзода сокинони ноҳияро ба фарорасии ҷашни аҷдодии Сада самимона табрик гуфта, дар корҳои ободонӣ ва оғози мавсими нави фаъолият барору комёбиҳо орзу намуд.

8 нафар кишоварзони ноҳия барои хизматҳои арзанда дар рушду пешрафти соҳаи кишоварзӣ бо сипосномаи мақомоти иҷроияи ҳокимияти давлатии ноҳияи Шаҳринав сарфароз гардиданд.
Дар фарҷоми ҳамоиш ҳунармандони шуъбаи фарҳанги ноҳия барномаи ҳунарӣ манзур намуданд.

Ёдовар мешавем, ки Сада табиатан пирӯзии рӯшноиро бар торикӣ ифода намуда, бо тантанаи оташафрӯзӣ омадани фасли баҳору муждаи пешакии Наврӯзро мерасонад. Оташи афрӯхтаи марди деҳқон бахшандаи нур ба чеҳраҳо ва  сурур ба қалбҳост.

АКСҲО: мақомоти иҷроияи ҳокимияти давлатии ноҳияи Шаҳринав