Нақшаи андозҳо ва дигар пардохтҳои ҳатмӣ ба андозаи 100,7% таъмин гардид

ДУШАНБЕ, 02.02.2022 /АМИТ «Ховар»/. Соли 2021 нақшаи андозҳо ва дигар пардохтҳои ҳатмӣ ба андозаи 100,7% таъмин гардида, ба ҷойи 13 млрд. 621,2 млн. сомонӣ ба буҷети давлатӣ 13 млрд. 722 млн. сомонӣ ворид карда шуд, ки нисбат ба нишондиҳандаҳои пешбинишуда 101 млн. сомонӣ зиёд мебошад. Иҷрои сифати қисми даромади буҷети давлатӣ нисбат ба солҳои қаблӣ беҳтар гардида, дар ин давра фақат нақшаи андоз аз арзиши иловашуда ва андоз аз истифодабарандагони роҳҳои автомобилгард таъмин нагардид, баён дошт Раиси Кумитаи андози назди Ҳукумати Ҷумҳурии Тоҷикистон Нусратулло Давлатзода имрӯз зимни нишасти матбуотӣ оид ба натиҷаи фаъолияти  Кумита дар  соли 2021.

Соли 2021 тибқи нақшаи тасдиқшуда ва дархостҳои мақомоти ҳифзи ҳуқуқ дар фаъолияти зиёда аз 1400 шахсони ҳуқуқӣ ва соҳибкорони инфиродӣ санҷиши риояи қонунгузории андоз гузаронида шуда, ба маблағи зиёда аз 1 млрд. сомонӣ кам ҳисоб кардан ва пинҳонкунии андозҳо ошкор гардида, аз ин ҳисоб ва аз ҳисоби маблағҳои солҳои қаблӣ ошкоршуда, дар маҷмӯъ ба буҷет 850 миллион сомонӣ ворид карда шуд.

Бо мақсади ба танзим даровардани корҳои назоратӣ, банақшагирӣ ва гузаронидани санҷишҳо дар фаъолияти субъектҳои хоҷагидор асосан тибқи системаи баҳисобгирии хавфҳо ба роҳ монда шуда, тартиби мазкур имконият фароҳам овардааст, ки маъмурикунонии андоз ва сифати гузаронидани корҳои назоратӣ, махсусан санҷишҳои андозӣ ва назоратҳои камералӣ беҳтар карда шавад.

Мутаассифона, новобаста аз фароҳам овардани шароити мусоид барои бақайдгирии субъектҳои хоҷагидор, рушди соҳибкорӣ, беҳтар намудани хизматрасониҳои давлатӣ, ташкили рақамикунонӣ ва амалӣ намудани доду гирифти маълумот миёни вазорату идораҳо дар шакли электронӣ ҳоло ҳам аз ҷониби субъектҳои хоҷагидор ба қонунвайронкуниҳо роҳ дода мешавад.

АКС аз бойгонӣ