«НАВРӮЗ — ПАЙВАНДГАРИ НАСЛИ ИМРӮЗУ ФАРДО». Дар Маҷлиси намояндагон таҳти ин унвон конференсияи илмию-амалӣ баргузор гардид

Март 20, 2022 10:50

ДУШАНБЕ, 20.03.2022 /АМИТ «Ховар»/. Дирӯз, 19 март таҳти раёсати Раиси Маҷлиси намояндагони Маҷлиси Олии Ҷумҳурии Тоҷикистон Маҳмадтоир Зокирзода бо иштироки вакилон ва кормандони Дастгоҳи Маҷлиси намояндагон конференсияи илмию-амалӣ оид ба мавзӯи «Наврӯз — пайвандгари насли имрӯзу фардо» баргузор гардид. Дар ин бора ба АМИТ «Ховар» котиби матбуоти Маҷлиси намояндагон Муҳаммадато Султонов хабар дод.

Раиси Маҷлиси намояндагон Маҳмадтоир Зокирзода иброз намуд, ки дар таърихи фарҳанги мардуми тоҷик ҳеч як анъана ва расму ойине чун ҷашни хуҷастапай ва фархундаи Наврӯз азизу арҷманд нест. Наврӯз пайвандгари насли имрӯз бо расму ойин, арзишҳои эстетики, меҳру садоқат ва анъаноти ниёгон мебошад.

«Боиси ифтихору сарфарозист, ки ба шарофати истиқлолияти давлатӣ ҳамасола моҳи март фарорасии соли нави аҷдодиамон — Наврӯз якҷо бо айёми эҳёи табиат ва оғози корҳои кишоварзӣ дар сатҳи давлатӣ ва бо шукӯҳу шаҳомати хоса таҷлил мегардад», — тазаккур дод ӯ.

Маҳмадтоир Зокирзода ҳамчунин иброз намуд, ки Наврӯз ҳамчун қадимтарин ва зеботарин ҷашни мардумӣ дар домони табиати зебои куҳандиёри мо беш аз шаш ҳазор сол бо рангу рўйи тоза ва накҳати накҳатбораш зуҳур кардааст.

Раиси Маҷлиси намояндагон ҳамчунин таъкид дошт, ки ҷаҳонишавии Наврӯз бо ибтикори Пешвои муаззами миллат муҳтарам Эмомалӣ Раҳмон ба вуқуъ павастааст, ки воқеияти таърихии ба асолати худ баргаштану дар сатҳи ҷаҳонӣ эътироф шудани ин сунати аҷдодиро барқарор намуд.


Тавре зикр гардид, Ҳукумати Ҷумҳурии Тоҷикистон таҳти роҳбарии бевоситаи Пешвои миллат дар даврони соҳибистиқлолӣ ба хотири арҷгузорӣ ба арзишҳои милливу фарҳангӣ, аз ҷумла ҷиҳати боло бурдани эътибору мартабаи Наврӯз тадбирҳои мушаххас анҷом дода истодааст.

Бахусус дар моњи нахустини фасли баҳори муаттару тозапайкар дар сатҳи давлатӣ баргузор намудани Рӯзи Модар, Иди байналмилалии Наврӯз ва дар ростову остонаи ин санаҳои муқаддаси фарҳанги миллӣ вусъат додани корҳои ободонӣ, шинонидани дарахту бунёди боғҳо аз ҷумлаи иқдому амалҳои неки наврӯзӣ мебошанд.

«Дар ин раванд, бояд ҳар як фарди бонангу номус ва ватандӯсту ватанпарвар ҷиьати ободии Тољикистони азизамон содиқонаву софдилона заҳмат кашида, кӯшиш намояд, ки диёри аљдодию соҳибистиқлоли мо аз Наврӯз то Наврӯз боз ҳам ободу зебо ва нерӯманду пешрафта гардад», — гуфт дар интиҳо Раиси Маҷлиси намояндагон Маҳмадтоир Зокирзода.

Ҳамчунин Раиси Комиссияи одоби вакилони Маҷлиси намояндагон Файзулло Баротзода, вакилони мардумӣ Гавҳар Шарофзода, Шариф Ҳакимзода, Абдуҳалим Ғаффорзода ва Муҷибахон Ҷавҳарӣ суханронӣ намуда, роҷеъ ба таърих ва аҳамияти ҷашни Наврӯзӣ байналмилалӣ ахбороти муфассал доданд.

 

АКСҲО: Маҷлиси намояндагони Маҷлиси Олии ҶТ

Март 20, 2022 10:50

Хабарҳои дигари ин бахш

Дар Душанбе дурнамо ва рушди қонунгузории шаҳрак ва деҳот дар шароити ҷаҳонишавӣ баррасӣ карда шуд
Қонуни Ҷумҳурии Тоҷикистон «Дар бораи мақоми омӯзгор» қабул карда шуд
Ҳайати вакилони Тоҷикистон дар Муколамаи дуюми минтақавии парламентӣ оид ба рушди технологияҳои «сабз» иштирок намуд
Дар Маҷлиси намояндагон лоиҳаи Қонуни Ҷумҳурии Тоҷикистон «Дар бораи мақоми омӯзгор» мавриди баррасӣ қарор гирифт
Дар Русия ҷаласаҳои навбатии Ассамблеяи байнипарламентии давлатҳои ИДМ баргузор гардиданд
Файзалӣ Идизода бо ваколатдор оид ба ҳуқуқи инсон дар Федератсияи Русия вохӯрӣ намуд
Раиси Маҷлиси миллии Маҷлиси Олии Ҷумҳурии Тоҷикистон Рустами Эмомалӣ бо муовини Раиси Ҳукумати Федератсияи Русия Марат Ҳуснуллин мулоқот намуданд
Файзалӣ Идизода дар ҷаласаи маҷозии роҳбарони парламентҳои кишварҳо иштирок намуд
Иҷлосияи дуюми Маҷлиси намояндагони Маҷлиси Олии Ҷумҳурии Тоҷикистон, даъвати ҳафтум баргузор гардид
Ҳайати Гурӯҳи дӯстӣ ва ҳамкории Маҷлиси намояндагони Тоҷикистон бо Палатаи намояндагони Маҷлиси миллии Беларус мулоқот намуд
Намояндаи Тоҷикистон дар Конфронси умумиҷаҳонии парламентӣ оид ба мубориза бо терроризм ва пешгирии ифротгароӣ иштирок намуд
Вакили Маҷлиси намояндагон: «Парлумони Тоҷикистон иштирокчии фаъол ва шарики муътамади Форуми осиёии ҳамкории парламентӣ мебошад»