Ҷалби сармоягузорони Русия ба соҳаҳои афзалиятноки иқтисоди Тоҷикистон ба манфиати ҳарду давлат аст

Апрель 16, 2022 09:02

ДУШАНБЕ, 16.04.2022. /АМИТ «Ховар»/. Ҳаҷми мубодилаи мол дар соли сипаригардида миёни Тоҷикистон ва Русия ҳудуди  беш аз 1,3 миллиард доллари амрикоиро  убур намуд, ки ин омор зарфи даҳ соли охир баландтарин  нишондиҳанда арзёбӣ мегардад. Чунин зикр шуд, дар ҳамоише, ки дирӯз дар Душанбе бо ҳузури доираҳои тиҷоратию сармоягузории  Федератсияи Русия  ва кормандони масъули вазорату идораҳои марбутаи мамлакат доир гардид, гузориш медиҳад хабарнигори АМИТ «Ховар» Марзия САИДЗОДА.

Кумитаи давлатии сармоягузорӣ ва идораи амволи давлатии Ҷумҳурии Тоҷикистон аз созмондиҳандагони ҳамоиш буда, ҳадафаш баррасии ҷалби бештари сармоягузорони Русия ба иқтисоди Тоҷикистон дар соҳаҳои афзалиятноки иқтисоди мамлакат, аз ҷумла саноат, инноватсия ва соҳаи кишоварзӣ мебошад.

Дар ҳамоиш муовини Раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон Хуршедаи Қодир, мушовири фиристодаи Сафорати Русия дар Тоҷикистон Шамил Шамсутдинов, муовини раиси Палатаи савдо ва саноати Тоҷикистон Ҳайдар Раҷабов, намояндаи тиҷоратии Русия дар Тоҷикистон Евгений Коренков, Раиси  Шӯро оид ба ҳамкории  тиҷоратии Ҷумҳурии Тоҷикистон бо Федератсияи Русия  Муҳаммад Сурхов ва дигар намояндагони вазорату идораҳои марбутаи кишвар доир ба роҳҳои таҳкими ҳамкории иқтисодию тиҷоратии Тоҷикистону Русия, ҷалби сармояи Русия ба иқтисоди Тоҷикистон дар шароити  буҳрони молиявӣ, имконият ва шароити мусоиди сармоягузорӣ дар Тоҷикистон ва дигар масъалаҳои муҳими тақвияти ҳамкории мутақобилан судманди ду кишвар дар самти иқтисоду тиҷорат ибрози назар намуданд.


Зикр шуд, ки Федератсияи Русия яке аз шарикони асосии стратегӣ ва иқтисодию тиҷоратии Тоҷикистон буда, ҳамкории иқтисодию тиҷоратӣ байни ду кишвар  дар партави иродаи сиёсии Сарони ҳарду давлат Эмомалӣ Раҳмон ва Владимир Путин беш аз пеш густариш меёбад.

Зарфи 30 соли барқарории муносибатҳои дипломатӣ  миёни Тоҷикистон ва Русия беш аз 290 созишномаи байнидавлатӣ, байни мақомот ва байниҳукуматие, ки ҳамкориро дар соҳаҳои сиёсӣ, иқтисодӣ, ҳарбӣ-техникӣ, фарҳангӣ-техникӣ ва дигар самтҳо ба танзим медароранд, ба имзо расонида шуданд.

Таъкид шуд, ки  Русия дар тиҷорати хориҷӣ бо Тоҷикистон  мавқеи пешсаф дорад. Ҳаҷми умумии сармоягузории Русия ба иқтисоди Тоҷикистон беш аз 1,7 миллиард долларро ташкил медиҳад.

Соли гузашта содироти  молу маҳсулот аз Тоҷикистон ба Русия афзоиш ёфта,  аз Тоҷикистон ба Русия ба маблағи  72,5 миллион доллар маҳсулот содирот  карда шуд.

Мавриди зикр аст, ки ҳамоиш бо иштироки доираҳои сармоягузории Русия  ба таҷлили 30-юмин солгарди барқарории муносибатҳои дипломатии Тоҷикистон ва Русия бахшида шудааст. Зимни баррасии масъалаҳои марбут ба таҳкими ҳамкории иқтисодию тиҷоратӣ миёни Тоҷикистон ва Русия иштирокдорони   ҳамоиш  пешниҳодоти муфид баён намуда, ба сатҳи ҳамкории иқтисодию тиҷоратии Тоҷикистон ва Русия баҳои баланд доданд.

Тавре дар суҳбат ба хабарнигори АМИТ «Ховар Раиси  Шӯро оид ба ҳамкории тиҷоратӣ миёни  Ҷумҳурии Тоҷикистон ва  Федератсияи Русия  Муҳаммад Сурхов иброз дошт, «бо мақсади ҷалби ҳарчӣ бештари сармояи Русия ба иқтисодиёти Тоҷикистон ҳайати калон ва бонуфузи  сармоягузорону тоҷирони Русия, ки аз минтақаҳои гуногуни ин кишвар  мебошанд,  зарфи се рӯз аст дар Тоҷикистон қарор доранд. Онҳо ба минтақаҳои гуногуни  Тоҷикистон-  Суғд, Хатлон, Бадахшон, навоҳии тобеи марказ  ва шаҳриДушанбе сафар карда, бо зарфияту имконоти сармоягузорӣ дар соҳаҳои кишоварзӣ, саноат, инноватсия ва дигар бахшҳои афзалиятноки иқтисоди Тоҷикистон шинос  мешаванд ва санадҳои ҳамкорӣ ба имзо мерасонанд.

АКСҲО: АМИТ «Ховар»

Апрель 16, 2022 09:02

Хабарҳои дигари ин бахш

НИШАСТИ МАТБУОТӢ. Ба иқтисодиёти Тоҷикистон беш аз 3,3 миллиард доллар сармояи хориҷӣ ворид гардидааст
НИШАСТИ МАТБУОТӢ. Дар шашмоҳаи якуми соли 2025 бо иштироки Сарвари давлат 16 корхонаи нави саноатӣ ба истифода дода шуд
НИШАСТИ МАТБУОТӢ. Агентии омор дар ҳамкорӣ бо шарикони рушд дар Тоҷикистон таҳқиқоти қувваҳои корӣ гузаронид
Дороиҳои умумии «Амонатбонк» 9,6 миллиард сомонӣ ва уҳдадориҳояш 8,6 миллиард сомониро ташкил дод
Дар Тоҷикистон 218 корхонаи нави саноатӣ бо 3429 ҷойи кор ба истифода дода шуд
Дар хоҷагии деҳқонии «Қалъача»-и ноҳияи Бобоҷон Ғафуров навъи беҳамтои помидор парвариш карда мешавад
НИШАСТИ МАТБУОТӢ. Суръати рушди иқтисоди миллӣ дар Тоҷикистон 8,1 фоизро ташкил дод
Ҳаҷми сармояи «Амонатбонк» афзуда, 1 миллиард сомониро ташкил медиҳад
Дар Тоҷикистон беш аз 19 ҳазор тонна гӯшти паранда истеҳсол гардидааст
Дар ноҳияи Ҷалолиддини Балхӣ пахтачинӣ оғоз ёфт
Дороиҳои «Саноатсодиротбонк» дар нимсолаи якуми соли 2025 афзоиш ёфтааст
Муовини Сарвазири Тоҷикистон дар ноҳияи Мастчоҳ бо кишти такрорӣ ва нашъунамои пахта шинос шуд