Бахшида ба Рӯзи пойтахт таҳти унвони «Ту қалби Тоҷикистонӣ — Душанбе» барномаи фарҳангӣ баргузор гардид

Апрель 16, 2022 17:00

ДУШАНБЕ, 16.04.2022 /АМИТ «Ховар»/. Шоми имрӯз бахшида ба Рӯзи пойтахти Ҷумҳурии Тоҷикистон дар «Кохи Суруш» барномаи фарҳангӣ таҳти унвони «Ту қалби Тоҷикистонӣ — Душанбе» ва маросими ҷоизасупорӣ ба ғолибони озмунҳои шаҳрӣ баргузор гардид. Дар ин ҷамъомади идона озмунҳои касбии соҳаи тандурустӣ ва маорифи шаҳри Душанбе — «Беморхонаи сол», «Муассисаи кумаки аввалияи тиббию санитарии сол», «Табиби сол», «Табиби оилавии сол», «Корманди миёнаи тибби сол», «Мураббии сол», «Омӯзгори сол», «Хонандаи сол», «Гирандагони Стипендияи Раиси шаҳри Душанбе» ва дигар озмунҳои шаҳрӣ ҷамъбаст гардида, ғолибони он дар вазъияти тантанавӣ бо мукофотҳои мақомоти иҷроияи ҳокимияти шаҳри Душанбе сарфароз гардонида шуданд, хабар медиҳад мухбири АМИТ «Ховар».

Зимни ифтитоҳи барномаи фарҳангӣ-фароғатӣ муовини якуми Раиси шаҳри Душанбе Ҷамшед Табарзода суханронӣ намуда, иштирокчиёнро аз номи Раиси шаҳр муҳтарам Рустами Эмомалӣ хайрамақдам ва бо Рӯзи пойтахт муборакбод гуфт.

Зикр шуд, ки дар солҳои соҳибистиқлолӣ Душанбе ба таври бесобиқа рушд карда, ба яке аз шаҳрҳои зеботарини минтақа табдил ёфтааст. Бо шарофати сиёсати бунёдкоронаи Пешвои миллат муҳтарам Эмомалӣ Раҳмон ва иқдомҳои созандаи Раиси ҷавони шаҳри Душанбе Рустами Эмомалӣ пойтахти ватани мо рӯз ба рӯз ободу зебо гардида, макони писандидаи ҷаҳониён мегардад.

Дар барномаи фарҳангии «Ту қалби Тоҷикистонӣ – Душанбе» ҳаваскорони ҷавон ва устодони санъати тоҷик бо суруду таронаҳои ҷолиб ҳунарнамоӣ карда, фазои идонаи базмгоҳро пуршукӯҳтар гардониданд.

Ёдрас мешавем, ки бахшида ба Рӯзи пойтахти Ҷумҳурии Тоҷикистон чорабиниҳои гуногуни идона, аз ҷумла мусобиқаи варзишӣ — Ниммарафони XII байналмилалии Душанбе баргузор гардида, дар он варзишгарон аз минтақаҳои Ҷумҳурии Тоҷикистон, бародаршаҳрҳои Душанбе ва дигар хоҳишмандон ширкат намуданд.

Ҳамчунин бахшида ба ин ҷашн бо иқдоми Мақомоти иҷроияи ҳокимияти давлатии шаҳри Душанбе дар боғҳои фарҳангивю фароғатии пойтахт базмҳои пуршукӯҳи идона бо иштироки дастаҳои ҳунарӣ — ромишгарону мутрибон ташкил гардида, ҳамзамон маҳсули дастони ҳунармандони чирадасти пойтахт ба намоиш гузошта шуданд.

Бояд тазаккур дод, ки имрӯз шаҳри Душанбе узви Ассамблеяи байналхалқии пойтахтҳо ва бузургшаҳрҳо (МАГ), Ташкилоти байналхалқии бародаршаҳрҳо (МОГП), Ташкилоти Боулдер-Душанбе бародаршаҳрҳо (БДГП), Ташкилоти умумиҷаҳонии шаҳрҳои муттаҳида ва ҳокимиятҳои маҳаллӣ (ВО ОГМВ), узви Федератсияи умумиҷаҳонии шаҳрҳои туристӣ (WTCF) буда, айни замон бо 18 шаҳрҳои Осиё, Африқо, Аврупо, Амрико ва ИДМ муносибатҳои дӯстона ва бародарона барқарор намудааст. Ҳамчунин бо шаҳрҳои Москваи Федератсияи Россия ва Тошканди Ҷумҳурии Узбекистон дар соҳаҳои тиҷоратӣ-иқтисодӣ, илмӣ-техникӣ ва фарҳангӣ ҳамкорӣ менамояд.


Пойтахти азизамон — шаҳри Душанбе дар солҳои Истиқлоли давлатӣ тибқи Нақшаи генералии шаҳр рушд карда, дар шаҳр теъдоди биноҳои замонавии маъмурӣ, фарҳангӣ ва истиқоматӣ афзуда, таҳти роҳбарии бевоситаи Раиси шаҳри Душанбе муҳтарам Рустами Эмомалӣ инфрасохтори коммуналию маишӣ таҷдид гардида, таъмини босифати нақлиёти ҷамъиятӣ, роҳҳои замонавии сеқабата, обу барқ, систсемаи гармидиҳӣ, таъмиру тармими роҳҳои мошингард, бунёду навсозии роҳраву гулгаштҳо, беш аз 15 боғҳои фарҳангию истироҳатӣ, майдончаҳои варзишӣ дар муддати кӯтоҳ ба роҳ монда шуданд, ки мояи ифтихори ҳар сокини пойтахт мебошад.

Баландтарин парчам дар ҷаҳон бо баландии 165 метр маҳз дар шаҳри Душанбе қомат афрохта, дар китоби «Рекордҳои Гиннес» сабт гардидааст, ки яке аз мавзеъҳои истироҳативу сайёҳии сокинону меҳмонони пойтахт аст.

Душанбе дорои марказҳои зиёди ҷолибу диданӣ буда, муҳимтарини онҳо ин майдони Дӯстӣ бо маҷмааи Исмоили Сомонӣ, Майдони Парчами миллӣ, Қасри миллат, Вазорати корҳои хориҷӣ, Осорхонаи миллӣ, Кохи Наврӯз, Наврӯзгоҳ, Китобхонаи миллӣ, Театри опера ва балети ба номи устод Садриддин Айнӣ, Боғи устод Абӯабдуллои Рӯдакӣ, Боғи устод Садриддин Айнӣ, кӯли Душанбе, бозори Меҳргон, чандин театру амфитеатрҳо, Кохи Борбад, Осорхонаи миллӣ, инчунин муосиртарин меҳмонхонаҳои сатҳи байналмилалӣ ва даҳҳо иншооти бузурги фарҳангӣ, маъмурӣ, илмӣ, тандурустӣ ва корхонаҳои саноатӣ мебошанд.

Зарангези ЛАТИФ,
АМИТ «Ховар»

АКСҲО: АМИТ «Ховар»/манбаъҳои боз

Апрель 16, 2022 17:00

Хабарҳои дигари ин бахш

БОРИ АВВАЛ ДАР ТОҶИКИСТОН! Пагоҳ дар шаҳри Душанбе Олимпиадаи байналмилалии технологияҳои иттилоотии «ISI Junior-2022» оғоз мегардад
МАРҲАБО БА ПОЙТАХТИ МО! Душанбе моҳи июн ба феҳристи машҳуртарин маконҳо барои москвагиҳо шомил шуд
ҲАДИСИ МУСАВВАР. Имрӯз дар Душанбе Намоишгоҳи байналмилалии универсалии «Тоҷикистон-2022» ба кори худ шурӯъ намуд
24 июн дар Душанбе дуюмин Фестивали дӯстӣ таҳти унвони «Ҷавонон – дар масири Истиқлолият ва давлатдории миллӣ» баргузор мешавад
Дар Душанбе Фестивали II байналмилалии эҷодиёти бадеии кӯдакон ва наврасон «Шукуфаҳои пойтахт» ҷараён дорад
ДИҚҚАТ! Пагоҳ дар Душанбе Намоишгоҳи байналмилалии универсалии «Тоҷикистон-2022» оғоз мегардад
Раиси шаҳри Душанбе Рустами Эмомалӣ бо Сафири Чин дар Тоҷикистон Тсзи Шумин мулоқот намуданд
Дар Душанбе Фестивали II байналмилалии эҷодиёти кӯдакону наврасон «Шукуфаҳои пойтахт» баргузор мешавад
Дар басти якум 2588 нафар кӯдакону наврасони Душанбе ба истироҳат фаро гирифта мешаванд
Дар Душанбе бахшида ба Рӯзи Ваҳдати миллӣ ҳамоиши маърифатӣ баргузор гардид
Раиси шаҳри Душанбе Рустами Эмомалӣ ноиби Президенти Бонки аврупоии таҷдид ва рушд Марк Боуманро ба ҳузур пазируфтанд
Раиси шаҳри Душанбе Рустами Эмомалӣ бо Сафири Ҷопон дар Тоҷикистон Тосихиро Аики мулоқот анҷом доданд