Муовини Сарвазири Тоҷикистон Матлубахон Сатториён дар Мастчоҳ аз муассисаҳои соҳаҳои тандурустӣ, маориф ва фарҳанг дидан кард

ДУШАНБЕ, 07.04.2022. /АМИТ «Ховар»/. Дирӯз дар доираи сафари корӣ ба шаҳру ноҳияҳои вилояти Суғд муовини Сарвазири Ҷумҳурии Тоҷикистон Матлубахон Сатториён дар ноҳияи Мастчоҳ аз муассисаҳои соҳаҳои тандурустӣ, маориф ва фарҳанг дидан намуда, бо шароити хизматрасонӣ, таълиму тарбия ва баланд бардоштани маънавиёти мардум аз наздик шинос шуд. Дар ин бора АМИТ «Ховар» бо истинод ба дафтари матбуоти Раиси ноҳия хабар медиҳад.

Зимни боздид муовини Сарвазири мамлакат аз муассисаи таълимии №26 ва Маркази саломатии Ҷамоати деҳоти Оббурдон бо омӯзгорон ва табибон ҳамсуҳбат шуда, доир ба баланд бардоштани сатҳу сифати таълим, омӯзиши фанҳои дақиқ, забономӯзӣ, таъминот бо китобҳои дарсӣ ва беҳтар намудани хизматрасонии тиббӣ ба аҳолӣ, махсусан дар деҳот дастур ва маслиҳатҳои муфид дод.

Зикр карда шуд, ки Ҳукумати Ҷумҳурии Тоҷикистон соҳаи маориф ва тандурустиро яке аз самтҳои афзалиятноки сиёсати давлатӣ дониста, бо дастгирии пайвастаи Президенти кишвар муҳтарам Эмомалӣ Раҳмон дар деҳот сол аз сол бунёди як қатор муассисаҳои таълимӣ, марказҳои саломатӣ ва бунгоҳҳои тиббӣ ба роҳ монда мешавад ва бо ин мақсад хизматрасонии таббӣ ба аҳолӣ ва шароити таълиму тарбия беҳтар мегардад.

Матлубахон Сатториён ҳамчунин аз китобхонаи филиали №2-и ҷамоати деҳоти Мастчоҳ дидан карда, бо шароити хизматрасонии ин муассисаи фарҳангӣ шинос гардид.

Иттилоъ дода шуд, ки пас аз эълон гардидани Озмуни ҷумҳуриявии «Фурӯғи субҳи доноӣ китоб аст» таваҷҷуҳи аҳолӣ ба хондани китоб бештар гардида, муштариёни китобхона нисбат ба панҷ соли қабл ба маротиб афзудааст.

Муовини Сарвазири мамлакат бо таваҷҷуҳ ба баланд бардоштани маънавиёти мардум ба масъулини соҳа дастур дод, ки барои афзун намудани шумораи китобҳои бадеӣ ва адабиёти ҷаҳон тадбирҳои амалӣ андешида, аҳолиро ба китобхонӣ ҷалб намоянд.

АКС: Дафтари матбуоти Раиси ноҳияи Мастчоҳ