Нашриёти «Адиб» якчанд китобчаҳои бачагонаро ба нашр расонид

Апрель 29, 2022 10:25

ДУШАНБЕ, 29.04.2021. /АМИТ «Ховар»/. Нашриёти «Адиб» якчанд китобчаҳои бачагона, аз ҷумла «Офтобак хандид»-и Абдулҳамид Самад, «Меҳмони кайҳонӣ»-и Гулчеҳра Муҳаммадиева, «Куҷо шудӣ, офтобак?»-и Сафар Амирхон, «Бахти осмонӣ» — афсонаҳои кореягӣ ва «Афсонаҳои молиявӣ барои бачаҳо» -ро ба нашр расонид, хабар доданд ба АМИТ «Ховар» дар Вазорати фарҳанги Ҷумҳурии Тоҷикистон.

Адабиёти бачагона ҷузъи муҳими адабиёт аст, зеро донишу ҷаҳонбинӣ, завқи зебоипарастӣ ва афкори кӯдак маҳз дар натиҷаи мутолиаи асаре, ки мувофиқи завқи ӯст, ба вуҷуд меояд.

Мояи хушнудист, ки солҳои охир дар мамлакат китобҳои кӯдакона бо забони ноби тоҷикӣ бениҳоят хуб ва бо дизайни ҳозиразамон, диққатҷалбкунанда ва хонданибоб ба нашр мерасанд. Хушбахтона, имрӯзҳо теъдоди ин гуна китобҳо афзудааст. Дар баробари ин, тарҷумаи китобҳои кӯдаконаи дигар миллатҳо низ бо забони тоҷикӣ ба роҳ монда шуда, дастраси хонандагони хурдсол гардидааст.

Бино ба маълумоти расмӣ, дар айни замон дар ҷумҳурӣ 79 китобхонаи бачагона бо хазинаи умумии зиёда 8 миллиону 535 ҳазору 824 нусхаи чопӣ ва маводи иттилоотӣ фаъолият менамоянд. Теъдоди аъзои хурдсоли шуъбаи кӯдакон ва наврасони Китобхонаи миллии Тоҷикистон, ки бо китобҳои «Мунтахаби осор»- и Убайди Зоконӣ, «Бӯстон»-и Саъдии Шерозӣ, «Рубоиёт»-и Умари Хайём, панду андарзи Мавлоно Ҷалолуддини Балхӣ, «Олуча гули бодом»-и Убайди Зоконӣ, «Харгӯшак»-и Гулниссо Ризвоншоева, «Баррача»-и Холбегим Давлатова, «Рӯд ва қатра»-и Нозирҷон Боҳирӣ ва ғайра диққати ҳар хонандаи хурдсолро ба худ ҷалб мекунад, ба беш аз 10 ҳазор нафар мерасад.

Ёдовар мешавем, ки соли 13-ум аст, ки дар Ҷумҳурии Тоҷикистон ҳамасола аз 2 то 7 апрел Фестивали ҷумҳуриявии «Ҳафтаи китоби кӯдакону наврасони Тоҷикистон» доир мегардад. Ҳадафи асосии баргузории фестивал- ин ҷалби насли наврас ба мутолиаи китоб, ташаккул ва такомули беҳтарин малакаҳои хониш, боз ҳам баланд бардоштани сатҳи фарҳанги иттилоотии кӯдакону наврасон, ҷавонон ва ба ин васила дар замири онҳо тарбия намудани ҳисси ифтихори миллӣ, ватандӯстӣ, гиромидошти арзишҳои милливу умумибашарӣ мебошад.

АКС: Нашриёти «Адиб»

Апрель 29, 2022 10:25

Хабарҳои дигари ин бахш

ЭЙ ВАТАН, ЭЙ ТОҶИКИСТОН, ЭЙ БИҲИШТИ МАН! Шеъри тозаэҷоди Шоири халқии Тоҷикистон Камол Насрулло ба шарафи Рўзи Ваҳдати миллӣ
«САДОИ АДИБОНИ ДУНЁ ДАР ВАСФИ ТОҶИКИСТОН». Таҳти ин ном маҷмӯаи хотироти адибони ҷаҳон бо забони асл ва дар тарҷумаи тоҷикӣ ба нашр расид
«Сулҳ ройгон ба даст наомадааст, бояд ба қадраш бирасем!»,- шарҳи матбуоти даврии Тоҷикистон
Дар Осорхонаи миллии Тоҷикистон мусаввараҳои рассомони рус ба намоиш гузошта шуданд
Дар Ҳисор маҳфили эҷодии Нависандаи халқии Тоҷикистон Кароматуллоҳи Мирзо доир гардид
ШЕЪРИ ТОҶИК ДАР СУРИЯ. Дар Димишқ маҷмӯаи ашъори панҷ шоири шинохтаи Тоҷикистон ба забони арабӣ таҳти унвони «Ҳамосаи панҷгона» ба табъ расид
Пагоҳ дар саҳни Театри опера ва балети шаҳри Душанбе намоиш-фурӯши китоби «Маснавии маънавӣ»-и Ҷалолуддини Балхӣ доир мегардад
Китоби «Насими дӯстӣ»-и Абдуҷаббор Раҳмонзода аз таърихи дӯстию бародарии халқҳои тоҷику узбек ҳикоят мекунад
27 июн дар «Наврӯзгоҳ»-и шаҳри Душанбе бахшида ба Рӯзи Ваҳдати миллӣ барномаи фарҳангӣ-фароғатӣ доир мегардад
Дар Донишкадаи давлатии фарҳанг ва санъати Тоҷикистон дар мавзўи аҳамияти сулҳу ваҳдати миллӣ ҳамоиш доир карданд
«Маснавии маънавӣ» дар ду шакл бо теъдоди 10 ҳазор нусха ба нашр расид
Китобхонаи миллии Тоҷикистон ва Китобхонаи давлатии кӯдакони Русия озмуни байналмилалии адабии муштарак баргузор мекунанд