«Пиряхҳо — ҳамчун манбаи обҳои мусаффои Тоҷикистон»- таҳти ин унвон дар Осорхонаи миллӣ намоиш оғоз гардид

Апрель 2, 2022 11:06

ДУШАНБЕ, 02.04.2022 /АМИТ «Ховар»/. Осорхонаи миллии  Тоҷикистон дар ҳамкорӣ бо Муассисаи давлатии илмии «Маркази омӯзиши пиряхҳои Академияи миллии илмҳои Тоҷикистон» бахшида ба Даҳсолаи нави байналмилалии амал «Об барои рушди устувор (солҳои 2018-2028)» таҳти унвони «Пиряхҳоҳамчун манбаи обҳои мусаффои Тоҷикистон» намоиш ташкил  намуд, ки он  то 14 апрел идома меёбад. Дар ин бора ба АМИТ «Ховар» дар  Осорхонаи миллии Тоҷикистон хабар доданд.

Дар намоиш аз фонди Осорхонаи миллӣ 15 адад беҳтарин мусаввараҳои рассомони машҳури тоҷик,  аз ҷумла офаридаҳои Х. Хушвахтов — «НБО-и Норак», «Манзараҳои Помир», З. Ҳабибуллоев -«Кӯли кабуд», Қ. Шарипов — «Манзараи об», «Оби мусаффо», Ф.Салманов — «Баҳри Норак» ва ғайра  ба тамошо гузошта шудаанд.

Аз ҷониби МДИ «Маркази омӯзиши пиряхҳои Академияи миллии илмҳои Тоҷикистон» зиёда аз 20 адад китобҳо марбут ба омӯзиши пиряхҳо, тағйирёбии иқлим ва захираҳои обии кишвар, инчунин 30 адад  либос ва асбобу дастгоҳҳои махсус, ки дар раванди баргузории экспедитсияҳо доир ба омӯзиши пиряхҳо аз ҷониби мутахассисон истифода мегарданд, манзури  тамошобинон шудаанд. Яке аз дигар экспонатҳои ҷолиби  намоиши мазкур -ин Парчами давлатии Тоҷикистон мебошад, ки бори нахуст 6 январи соли 2009 дар қитъаи 6 олам Антарктида расман барафрохта шуда буд.

Дар ифтитоҳи намоиш роҳбарият ва кормандони Осорхонаи миллӣ, Муассисаи давлатии илмии «Маркази омӯзиши пиряхҳои Академияи миллии илмҳои Тоҷикистон», устодону донишҷӯёни Донишгоҳи миллии Тоҷикистон ва Донишкадаи давлатии санъати тасвирӣ ва дизайни Тоҷикистон иштирок ва суханронӣ намуданд.


Директори Осорхонаи миллӣ Аҳлиддин Ибодуллозода зикр кард, ки Тоҷикистон яке аз мамлакатҳои аз ҷиҳати захираҳои обӣ бойи минтақаи Осиёи Марказӣ маҳсуб шуда, дар ҳудуди он беш аз 13 000 пирях мавҷуданд, ки дар ташаккули обу дарёҳои минтақа нақши назаррас доранд.

«Пешниҳодҳои Тоҷикистон оид ба эълон намудани соли 2025 ҳамчун «Соли байналмилалии ҳифзи пиряхҳо», мушаххас сохтани санаи «Рӯзи умумиҷаҳонии ҳифзи пиряхҳо» ва таъсиси «Бунёди байналмилалии ҳифзи пиряхҳо» баёнгари таваҷҷуҳи Ҳукумати кишвар, хосатан Пешвои миллат муҳтарам Эмомалӣ Раҳмон ба ҳифзу омӯзиши пиряхҳо — ҳамчун манбаи асосии обҳои мусаффо дар ҷумҳурӣ маҳсуб мешавад. Тоҷикистон бо мақсади омӯзиш ва ҳифзи пиряхҳо аз соли 2018 дар назди АМИТ Маркази омӯзиши пиряхҳо таъсис дода шудааст. Таъсиси ин ниҳод дар кишвар дар самти омӯзиши пиряхҳо дар шароити тағйирёбии иқлим ва гармшавии ҳарорат  дар сайёра саривақтӣ ва муҳим арзёбӣ мегардад»,- афзуд Аҳлиддин Ибодуллозода.

Ёдовар мешавем, ки Тоҷикистон  барои мушаххас намудани омилҳои таъсиррасон ба тағйирёбии иқлим дар мамлакат ва тавсеаи ҳамкорӣ дар масъалаи тағйирёбии иқлим се Паёми миллӣ оид ба Конвенсияи қолабии СММ доир ба тағйирёбии иқлим (солҳои 2002, 2008 ва 2014) — ро қабул намуд. Тоҷикистон ҳамчунин дар арсаи байналмилалӣ дар масъалаи тағйирёбии иқлим фаъолияти мунтазам дорад.

АКСҲО: Осорхонаи миллӣ

Апрель 2, 2022 11:06

Хабарҳои дигари ин бахш

ДАР ПАРТАВИ ҲИДОЯТҲОИ ПЕШВОИ МИЛЛАТ. Адибони тоҷик ба се ноҳияи вилояти Хатлон сафар намуданд
«ҲИФЗИ МЕРОСИ ТАЪРИХӢ-ВАЗИФАИ ҲАР ЯКИ МОСТ!». Таҳти чунин унвон озмуни ҷумҳуриявӣ доир мешавад
«САЙРИ ГУЛИ ЛОЛА». Дар шаҳри Бохтар беш аз 1 млн бех гулу бутта шинонида шуд
ТАСВИРИ ПИРЯХҲО ВА ОБҲО ДАР АСАРҲОИ РАССОМОНИ ТОҶИКИСТОН. Дар Осорхонаи миллӣ намоиш ифтитоҳ ёфт
ИМРӮЗ — РӮЗИ УМУМИҶАҲОНИИ ТЕАТР. Дар Тоҷикистон 22 театри халқӣ амал менамояд
Дар назди Театри мусиқӣ-мазҳакавии шаҳри Хоруғ студияи нави сабти суруд таъсис ёфт
«АЗ НАВРӮЗ ТО НАВРӮЗ». Таҳти чунин унвон дар Донишкадаи давлатии санъати тасвирӣ ва дизайн намоиши асарҳо ифтитоҳ гардид
Дар Наврӯз барои солимии бадан ғизои зарурӣ пешниҳод мегардад, ки оши бурида яке аз онҳост
ШОГУН БАҲОР МУБОРАК! Дар Бадахшон базми наврӯзии ҷавонон доир карда шуд
НАВРӮЗ — ҚИМАТТАРИН МЕРОСИ НИЁГОН. Мулоҳизаҳои мардумшинос дар бораи таҷлили он аз давраи Сосониён то соҳибистиқлолии Тоҷикистон
НАВРӮЗ БАРОБАРИ ҶАШНИ ИСТИҚЛОЛ АЗИЗ АСТ. Дар шаҳри Хоруғ базми пуршукуҳи наврӯзӣ доир гардид
Дар шаҳри Бохтар Наврӯз — ҷашни қадимии миллати тоҷикро хотирмон таҷлил намуданд