Ансамбли рақсии «Зебо» дар Фестивали байналмилалии «Рақси лазгӣ» сазовори ҷои дуюм шуд
ДУШАНБЕ, 03.05.2022 /АМИТ «Ховар»/. Гурӯҳи раққосони Ансамбли давлатии рақсии «Зебо» дар Фестивали байналмилалии «Рақси лазгӣ» миёни 30 давлати дунё бо рақсҳои ҷаззобу дилфиреби тоҷикона соҳиби ҷои дуюм гардид, иттилоъ доданд ба АМИТ «Ховар» дар маркази матбуоти Вазорати фарҳанги мамлакат.
Тавре қаблан иттилоъ дода будем, фестивали мазкур аз 25 то 30 апрел дар шаҳри Хеваи Ҷумҳурии Узбекистон баргузор гардид. Дар он 13 нафар раққос таҳти роҳбарии Артисти халқии СССР Зебо Аминзода ва Директори генералии Иттиҳодияи давлатии гурӯҳҳои эҷодию консертӣ Бахтовар Раҳмонзода Тоҷикистонро муаррифӣ намуданд.
Тибқи лоиҳаи мероси фарҳангии Узбекистон, фестивали мазкур дар ду сол як маротиба баргузор мешавад.
Ин фестивал бо мақсади ҳифз ва рушди анъанаҳои қадимии санъати «Рақси хоразмии лазгӣ», мустаҳкам намудани риштаҳои дӯстӣ ва бародарӣ миёни халқҳо тавассути санъати рақс, минбаъд васеъ намудани доираи ҳамкории эҷодӣ ва робитаҳои фарҳангӣ дар сатҳи байналмилалӣ доир мешавад.
Ҳамчунин дар доираи фестивал павилонҳои намоишӣ бахшида ба санъати рақс фаъолият намуданд, ки дар ин ҷо иштирокчиён асбоби мусиқӣ ва либосҳои миллӣ, ҳунарҳои дастӣ, осори санъати тасвирӣ ва амалӣ, ҳайкалтарошӣ, филмҳои бадеӣ ва ҳуҷҷатӣ, дискҳои аудио ва видео, китобҳо, албомҳо ва аксҳоро пешкаши тамошобинон намуданд.
«Рақси хоразмии лазгӣ», ки дар таърихи ғании санъати рақсии мамлакати мо ҷойгоҳи махсус ишғол мекунад, бо услуби хоси иҷро ва ҷаззобии худ на танҳо дар ҷумҳурӣ, балки дар кишварҳои хориҷӣ низ маъмул аст. Аз ҷониби ЮНЕСКО ба Рӯйхати мероси фарҳангии ғайримоддии башарият шомил шудани «Рақси хоразмии лазгӣ» низ аз беҳамтоии ин санъат шаҳодат медиҳад.
Ёдовар мешавем, ки моҳи сентябри соли 2019 дар Фестивали байналмилалии «Мӯъҷизаи рақс», ки дар шаҳри Хеваи Ҷумҳурии Узбекистон баргузор гардид, миёни намояндагони 20 давлати ҷаҳон ва гурӯҳҳои рақсӣ аз тамоми минтақаҳои Узбекистон Ансамбли рақсии «Зебо»-и шаҳри Хуҷанди Ҷумҳурии Тоҷикистон ҳунарнамоӣ намуда буд.
АКС: Вазорати фарҳанги ҶТ
Дар мавзеи Сари Майни ноҳияи Айнӣ корҳои омӯзишии бостоншиносӣ ва антропологӣ оғоз ёфт
Санъаткорони Қирғизистон Осорхонаи миллии Тоҷикистонро тамошо карданд
Дар Душанбе бо мақсади рушди ҳамкорӣ дар самти илмҳои яхшиносӣ вохӯрӣ баргузор гардид
Ба Маркази мероси хаттӣ беш аз 100 нусха китобҳои чопи сангӣ ва дастнависҳо тақдим гардид
«ШОҲНОМА». Фирдавсӣ дар сар то сари ин асари безавол дӯст доштани Ватанро таъкид мекунад
Беш аз 23 ҳазор нусха китобҳои Китобхонаи миллии Тоҷикистон ба шаҳру ноҳияҳои ҷумҳурӣ фиристода шуд
«ДӮСТИИ АБАДӢ». Таҳту чунин унвон барномаи фарҳангии Тоҷикистон ва Қирғизистон доир мегардад
Собиқ Вазири фарҳанги Ҷумҳурии Тоҷикистон Тамара Абдушукурова аз олам даргузашт
Ҷаласаи вазирони фарҳанги давлатҳои аъзои Созмони ҳамкории Шанхай доир гардид
Имсол дар Академияи миллии илмҳои Тоҷикистон 8 озмоишгоҳи замонавӣ ба истифода дода шуд
ҲАРГИЗ НАМИРАД ОН КИ ДИЛАШ ЗИНДА ШУД БА ИШҚ. Девони Ҳофиз дар Тоҷикистон беш аз сад маротиба ба нашр расидааст
КУЛОЛГАРӢ. Саразми бостон яке аз нахустин марказҳои кулолгарии Осиёи Марказӣ будааст
