Беҳтарин шоҳмотбозони Тоҷикистон дар Турсунзода муайян гардиданд

ДУШАНБЕ, 23.05.2022 /АМИТ «Ховар»/. 16-21 май дар шаҳри Турсунзода Чемпионати Тоҷикистон оид ба шоҳмот баргузор гардид. Дар ин бора АМИТ «Ховар» бо истинод ба Кумитаи миллии олимпии Тоҷикистон хабар медиҳад.

Ба иттилои Федератсияи шоҳмоти Тоҷикистон, дар чемпионат 63 нафар, аз ҷумла 17 бону аз ҳамаи минтақаҳои ҷумҳурӣ ширкат карданд. Сабқатҳо миёни мардҳо, бонувон ва собиқадорон доир шуданд.

Ҳамин тариқ, миёни мардҳо зинаи аввал насиби намояндаи шаҳри Душанбе Меҳриддин Шарифов шуд. Намояндагони дигари шаҳри Душанбе Алишер Каримов ҷои дуюм, Сӯҳроб Ҳамдамов ҷои сеюмро гирифтанд.

Миёни бонувон Мутриба Ҳотамӣ (аз Душанбе) дубора беҳтарин бонуи шоҳмотбози кишвар буданашро нишон дод. Рухшона Саидова аз вилояти Суғд дар мақоми дуюм, Лидия Антонова (Душанбе) дар мақоми сеюм мавқеъ гирифтанд.

Миёни собиқадарон намояндаи дастаи «Хатлон-2» Ашӯр Ёрмадов унвони чемпиониро сазовор шуд. Ҳамдастааш Зурхон Ризвонов дар мақоми дуюм, намояндаи ВМКБ Олуча Ҷумъаев дар зинаи сеюм қарор гирифтанд.

Ғолибон бо медалу дипломҳои Кумитаи кор бо ҷавонон ва варзиши назди Ҳукумати Тоҷикистон ва ҷоизапулии Федератсияи шоҳмоти Тоҷикистон қадрдонӣ шуданд.

АКС: КМО Тоҷикистон