Сафирони Русия, Тоҷикистон ва якчанд давлати дигар дар ИМА собиқадорони эътилофи зиддигитлериро бо Рӯзи Ғалаба табрик намуданд
ДУШАНБЕ, 10.05.2022 /АМИТ «Ховар»/. Нигоҳ доштан ва расонидани ҳақиқат дар бораи Ҷанги Бузурги Ватанӣ вазифаи муқаддас маҳсуб мешавад, зеро ҷанговари озодихоҳи шӯравӣ аҳли оламро аз «вабои қаҳваранг» наҷот бахшида, садҳо ҳазор асирони конслагерҳоро аз асорат наҷот дод. Дар ин бора дар изҳороти муштараки роҳбарони намояндагиҳои дипломатии Русия, Тоҷикистон ва якчанд ҷумҳуриҳои дигари собиқ Иттиҳоди Шӯравӣ, ки рӯзи душанбеи 9 май дар Telegram нашр гардид, гуфта шудааст.
«Имсол ҷаҳон солгарди 77-уми ҷашни муқаддас — Рӯзи Ғалабаи Бузургро таҷлил менамояд. Баҳори соли 1945 халқи сермиллати ИҶШС ҳамроҳ бо иттифоқчиёни эътилофи зиддигитлерӣ сайёраро аз зулми фашистӣ наҷот дод. Қаҳрамонии бемислу монанди насли бузург имкон дод, то идеологияи инсонбадбинӣ аз миён бардошта шавад»,-гуфта мешавад дар изҳорот.
«Дар муҳорибаҳои назди Москва ва доираи Курск, дар Ленингради муҳосирашуда ва дар кӯчаҳои Сталинград намояндагони ҳамаи миллатҳои ИҶШС паҳлӯ ба паҳлӯ истода, Ватани умумиашонро муҳофизат мекарданд. Далерӣ ва фидокории онҳо дар фронт ва ақибгоҳ, инчунин дар дастаҳои партизанӣ имкон дод, ки пеши роҳи армияи фашистӣ аввал гирифта шуда, баъдан он торумор гардад, — таъкид карданд роҳбарони намояндагиҳои дипломатӣ. Гузаштагони мо на танҳо истиқлоли Ватанро ҳифз кардаанд, балки ҷаҳонро аз «вабои қаҳваранг» наҷот додаанд. Ҷанговари озодгари шӯравӣ садҳо ҳазор асирони конслагерҳоро аз асорат наҷот дод».
«Ғалаба бо арзиши гарон ба даст омад. 27 миллион ҳамватанони мо ҳалок гардиданд. Қариб нисфи қурбониён шаҳрвандони осоишта буданд. Қотилони гитлерӣ ва думравони онҳо барои тамоман несту нобуд кардани халқҳои ИҶШС мубориза бурда, ба ҷони на занон, на пиронсолон ва на бачагон раҳм накарданд»,- омадааст дар мақола.
Ба Муроҷиатнома Сафири Русия Анатолий Антонов, Сафири Тоҷикистон Фаррух Ҳамрализода, Сафири Қазоқистон Ержан Ашикбоев, Сафири Қирғизистон Бактибек Аманбоев, кордори муваққатии Беларус Дмитрий Басик, Сафири Узбекистон Ҷавлон Ваҳобов ва Сафири Туркманистон Меред Оразов имзо кардаанд.
Ёдовар мешавем, ки беш аз 300 ҳазор тоҷикистонӣ дар ҷабҳаҳои Ҷанги Бузурги Ватанӣ ҷангида, 45 ҳазор нафар ба корхонаҳои низомӣ сафарбар шудаанд. Беш аз 50 ҳазор тоҷикистонӣ бо ордену медалҳо мукофотонида шуда, 65 нафар Қаҳрамони Иттифоқи Советӣ, 15 нафар дорандаи ордени «Шараф» гардидаанд.
ДАР АКС: Сафорати Тоҷикистон дар ИМА. Акс аз бойгонии АМИТ «Ховар»
Ҳоким Холиқзода бо муовини якуми Дабири кулли Созмони Милали Муттаҳид Амина Муҳаммад мулоқот намуд
Ҳамкории Тоҷикистон ва Созмони Милали Муттаҳид дар соҳаи обу энергетика ва ҳифзи пиряхҳо баррасӣ гардид
Муовини якуми Сарвазири мамлакат Ҳоким Холиқзода дар чорабинии канории Тоҷикистон дар қароргоҳи СММ иштирок намуд
ВКХ ҶТ: «Хабарҳои бархе аз расонаҳо дар бораи гӯё таъсис додани пойгоҳи низомӣ аз ҷониби Чин дар қаламрави Тоҷикистон асос надоранд»
Тоҷикистон ва Қатар татбиқи Созишномаи байниҳукуматӣ оид ба ҳамкорӣ дар соҳаи амниятро баррасӣ намуданд
Дурнамои тавсеаи ҳамкории иқтисодӣ байни Тоҷикистону Олмон баррасӣ гардид
Намояндагони бахшҳои давлатӣ ва хусусии Арабистони Саудӣ ба Тоҷикистон меоянд
Дар Қатар инъикоси мавзеъҳои сайёҳии Тоҷикистон дар шабакаи иттилоотии «Ал-Ҷазира» баррасӣ шуд
Дар Риёз ҳамкории байнипарлумонии Тоҷикистон ва Арабистони Саудӣ баррасӣ гардид
Сарвазири Ҷумҳурии Тоҷикистон Қоҳир Расулзода бо Раиси Ҳукумати Федератсияи Русия Михаил Мишустин мулоқот анҷом дод
Сафири Тоҷикистон бо ректори Донишгоҳи давлатии иқтисодии Урал ва тоҷикони муқими вилояти Свердловск мулоқот намуд
Сарвазири Тоҷикистон бо Раиси Ҷумҳурии Тотористон мулоқот намуд
