ИЗҲОРОТИ ВКХ оид ба идома ёфтани сиёсати таъқибкоронаи Қирғизистон нисбат ба тоҷиктаборон ва шаҳрвандони Тоҷикистон

Сентябрь 22, 2022 14:10

ДУШАНБЕ, 22.09.2022 /АМИТ «Ховар»/. Вазорати корҳои хориҷии Ҷумҳурии Тоҷикистон доир ба ҳолатҳои дар қаламрави Қирғизистон мавриди таъқибу таҳдид ва табъизу зулм қарор гирифтани тоҷиктаборон ва шаҳрвандони Тоҷикистон, ки рӯзҳои охир тамоюли афзоиш пайдо кардааст, изҳори нигаронӣ менамояд. Дар ин бора АМИТ «Ховар» бо истинод ба Вазорати корҳои хориҷии Ҷумҳурии Тоҷикистон хабар медиҳад.

14 сентябри соли 2022 мағозаҳои тоҷикони муқими ноҳияи Қадамҷойи вилояти Бодканд аз ҷониби мақомоти маҳаллӣ баста шуданд. Ҳамчунин шарҳвандоне, ки аз минтақаҳои наздисарҳадии Қирғизистон кӯчонида шуда буданд, бадқасдона, дар хонаҳои истиқоматии тоҷиктаборони ноҳияи мазкур ҷой карда шуданд.

18 сентябри соли 2022 кормандони Раёсати КДАМ-и ноҳияи Ленини ш.Бишкек бо баҳонаи санҷиши нақшавии ҳуҷҷатҳо шиносномаҳои оилаи Негматовҳо – шаҳрвандони Ҷумҳурии Тоҷикистонро бо мақсади иҷборан аз қаламрави Қирғизистон берун кардан тасарруф намуданд.

18 сентябри соли 2022 шахсони номаълум оинаҳои мошини шаҳрванди Ҷумҳурии Точикистон Ҳамдамов Амонбойро, ки муваққатан дар шаҳри Бишкек истиқомат мекунад, шикаста, ба он ранг пошиданд.

Тибқи маълумоти дастрас, аз сӯи мақомоти қудратии Қирғизистон аз кишвар берун намудани зиёда аз 500 донишҷӯ – шаҳрвандони Ҷумҳурии Тоҷикистон, ки дар мактабҳои олии вилояти Ӯш таҳсил мекунанд, ба нақша гирифта шудааст.

Гузашта аз ин, аз шаҳрвандони Тоҷикистон, ки муваққатан дар ҳудуди Қирғизистон фаъолият менамоянд, бо фишору таҳдид талаб карда мешавад, ки барои “кумак ба қурбониёни Бодканд” маблағҳои пулӣ ва маводи ғизоӣ супоранд.

Боиси нигаронист, ки шоми 18 сентябри соли 2022 шахси номаълуми тахминан 35-сола бо роҳи зӯрӣ ва ибрози таҳдиду таҳқир нисбат ба Тоҷикистон кӯшиш намуд, ки ба қароргоҳи Сафири Тоҷикистон дар Қирғизистон ворид шавад.

Чунин табъиз нисбат ба тоҷикон дар ҳоле амалӣ мегардад, ки 20 сентябри соли ҷорӣ ВКД Қирғизистон бардурӯғ изҳороти паҳннамудаи ҷониби Тоҷикистонро дар ин бора беасос арзёбӣ намуд.

Ҳодисаҳои дар Қирғизистон бавуқӯъомада ба муқаррароти Изҳороти муштараки Вохӯрии машваратии сарони давлатҳои Осиёи Марказӣ (Чолпон-Ота 21 июли соли 2022), аз ҷумла ба банди 25-уми санади мазкур, ки дар он “зарурати таъмини ҳифзи ҳуқуқ ва манфиатҳои шаҳрвандон, аз қабили нафароне, ки муваққатан ба фаъолияти меҳнатӣ машғуланд ва таъмини кумаки ҳуқуқӣ, иҷтимоӣ ва машваратӣ ба онҳо” дарҷ шуда, аз ҷониби Президенти Қирғизистон низ қабул гардидааст, қатъиян мухолифат мекунанд.

Ҷониби Тоҷикистон сиёсати таъқибкоронаро нисбат ба шаҳрвандони Тоҷикистон ва тоҷиктаборон натиҷаи дар Қирғизистон ҳукмрон будани маъракаи таблиғотӣ ҷиҳати дар симои Тоҷикистон тасвир намудани душман арзёбӣ намуда, аз Ҳукумати Қирғизистон талаб мекунад, ки барои роҳ надодан ба табъиз нисбат ба тоҷиктабарон ва шаҳрвандони Тоҷикистон, ки дар қаламрави Қирғизистон қарор доранд, тадбирҳои таъхирнопазир андешад.

Тоҷикистон ҳамчунин аз Қирғизистон даъват ба амал меорад, ки амнияти Сафорати Тоҷикистон дар Бишкек, кормандон ва аъзои оилаи онҳо тибқи уҳдадориҳои кишвари маҳалли иқомат, ки аз меъёрҳои ҳуқуқи байналмилалӣ бармеоянд, таъмин карда шавад.

Акс: ВКХ ҶТ

Сентябрь 22, 2022 14:10

Хабарҳои дигари ин бахш

Дар Теҳрон Ҷашни Наврӯзи байналмилалиро таҷлил намуданд
РАВАНДИ ОБИ ДУШАНБЕ. Сироҷиддин Муҳриддин: «Ба инсоният тақрибан 50 сол зарур омад, то талошҳоро дар масоили об муттаҳид намояд»
Дар Москва ҷаласаи Шӯрои иқтисодии Иттиҳоди Давлатҳои Мустақил баргузор шуд
Тоҷикистон ҳамкорӣ бо давлатҳои минтақаро муҳимтарин воситаи рушди муштарак ва таъмини сулҳу субот мешуморад
Ҳайати Тоҷикистон дар иҷлосияи Шӯрои вазирони корҳои хориҷии СҲИ дар Мавритания иштирок намуд
РАВАНДИ ОБИ ДУШАНБЕ. Дар Марокаш нишасти матбуотӣ оид ба Конфронси оби СММ баргузор гардид
РАВАНДИ ОБИ ДУШАНБЕ. Дар Қоҳира тадбирҳои муштарак ва ҳамоҳангӣ дар доираи Эътилофи ҷаҳонии обу иқлим баррасӣ шуд
Дар Душанбе вохӯрии панҷуми ҷашнии машваратии сарони давлатҳои Осиёи Марказӣ доир мегардад
Дар Душанбе ҷаласаи гурӯҳҳои корӣ оид ба делимитатсияи сарҳади давлатии Тоҷикистон ва Қирғизистон баргузор шуд
РАВАНДИ ОБИ ДУШАНБЕ. Дар Теҳрон бахшида ба Конфронси оби СММ-2023 нишаст баргузор гардид
Намояндаи Тоҷикистон дар нишасти сеюми вазирони энергетикаи Созмони ҳамкории Шанхай иштирок намуд
Дар қароргоҳи ЮНЕСКО дар Париж бахшида ба Ҷашни байналмилалии Наврӯз ҳамоиш баргузор шуд