«ЗАБОН ВА ИСТИҚЛОЛ». Таҳти чунин унвон Конференсияи илмию амалии ҷумҳуриявӣ доир шуд

Октябрь 4, 2022 15:47

ДУШАНБЕ, 04.10.2022. /АМИТ «Ховар»/. Имрӯз дар шаҳри Душанбе бахшида ба Рӯзи забони давлатӣ таҳти унвони «Забон ва Истиқлол» Конференсияи илмию амалии ҷумҳуриявӣ доир гардид. Дар он забоншиносони варзидаи мамлакат, муҳаққиқони соҳа иштирок намуда, вобаста ба мавзӯъҳои пешниҳодгардида мулоҳизаҳои худро баён доштанд, иттилоъ медиҳад мухбири АМИТ «Ховар».

Зимни ҳамоиш Раиси Кумитаи забон ва истилоҳоти назди Ҳукумати Ҷумҳурии Тоҷикистон Олимҷон Муҳаммадҷонзода иброз дошт, ки забон ҳастии миллат ва нишони давлатдории миллист. Аз ин рӯ бояд аз он пуштибонӣ намуд ва барои покизагии он талош варзид. Чунин мавқеъро, пеш аз ҳама, Пешвои миллат содиқонаву пайгирона пеш гирифтаанд, ки мардуми кишварро дар роҳи ватандӯстиву ифтихори миллӣ илҳом мебахшанд.

«Маҳз ба шарофати суханрониҳои фасеҳу гуворои Пешвои миллат Эмомалӣ Раҳмон доманаи корбурди сиёсии забони тоҷикӣ фарох гардида, зарфияти он дар ифодаи муҳимтарин матлабҳои сиёсиву иҷтимоӣ ва фарҳангиву маънавӣ ба кор бурда шуд»,-гуфт Олимҷон Муҳаммадҷонзода.

Зикр шуд, ки қабули Қонуни Ҷумҳурии Тоҷикистон «Дар бораи забони давлатии Ҷумҳурии Тоҷикистон» санади муҳим ва саҳифаи нав дар рушди забони давлатӣ мебошад. Қонуни мазкур бо Конститутсияи кишвар комилан созгор буда, ба таъмини озодиҳои асосии инсон марбут аст. Он дастгирии на танҳо забони миллати асосии кишвар, балки рушду такомул ва амали забонҳои миллатҳои дигари сокини мамлакати моро кафолат медиҳад.

Қонуни Ҷумҳурии Тоҷикистон «Дар бораи забони давлатии Ҷумҳурии Тоҷикистон» ба густариши амалии забони тоҷикӣ дар ҷомеаи Тоҷикистон такони ҷиддӣ бахшида, онро аз муҳити хонавода берун баровард ва ба таври воқеиву иҷтимоӣ мавриди истифодаи умум қарор дод.

Давлату Ҳукумати Тоҷикистон ҳифзи арзишҳои миллии забониро аз вазифаю ҳадафҳои асосии худ барои насли имрӯзу фардои ҷомеа ҳисобида, моро вазифадор мекунад, ки барои рушду густариши забони давлатиамон чӣ дар дохил ва чӣ хориҷи кишвар камари ҳиммат бандем. Ҳамзамон иқдоми марбут ба ин масъаларо мунтазам миёни  тамоми қишрҳои ҷомеа амалӣ сохта, ба роҳ монем. Зеро забони мо баёнгари сарнавишти мо, мояи ифтихору сарфарозӣ ва пойдевори ваҳдати ҷовидонии миллати мост.

Иштирокдорон бо ифтихор иброз доштанд, ки бо забони тоҷикии форсӣ мардумони беш аз 29 кишвари ҷаҳон гуфтугӯ мекунанд. Забони тоҷикӣ аз ҷиҳати калимасозӣ ва ибораороӣ дар сархати забонҳои дунёст ва имкон дорад, ки дар ин радиф беш аз 225 миллион калима ва вожа бисозад. Ин ҳама аз тавонмандӣ, шаҳомат ва бузургиву нодирии забони ноби тоҷикӣ шаҳодат медиҳад.

Дар конференсия зиёда аз 54 маърӯзаи илмӣ аз ҷониби мутахассисони бахшҳои гуногуни забоншиносӣ дар самти сиёсати имрӯзаи Ҳукумати ҷумҳурӣ дар бораи забони давлатӣ мавриди баррасӣ қарор гирифтанд. Аз ҷумла, дар мавзӯи «Пешвои миллат ва масъалаҳои рушди забони давлатӣ» «Таъсири омилҳои фарозабонӣ ба забон», «Забони тоҷикӣ дар масири таърих», «Муассирии забони тоҷикӣ дар рушди забонҳои минтақа» ва ғайра маърӯзаҳо ироа гардиданд.

АКС: АМИТ «Ховар»

Октябрь 4, 2022 15:47

Хабарҳои дигари ин бахш

Муҳаммадҷон Қосимов — ҳунарманде, ки нақшҳои офаридааш дар дилу ёдҳо нақш бастааст
Озмуни ҷумҳуриявии «Беҳтарин тасвир» байни наврасон гузаронида мешавад
Дар Душанбе маросими ҷоизасупорӣ ба кормандони телевизион, радио ва соҳаи алоқа баргузор гардид
Дар Намоишгоҳи байналмилалии «Китоби Теҳрон» 400 номгӯй китобҳои тозанашр аз Тоҷикистон пешниҳод шуданд
Китоби «Театр дар назди микрофон» ба нашр расид
Телевизионҳои Тоҷикистон дар ҳифзи фазои расонаӣ мавқеи устувор доранд
ЭЪЛОНИ ОЗМУНИ АКСҲО. «Рамзи дӯстии Чин ва Тоҷикистон- бинои Ҳукумат ва бинои Парлумони Тоҷикистон»
Фестивали байналмилалии театрҳои касбӣ «Наврӯз» ҷамъбаст гардид
7 МАЙ — РӮЗИ ТЕЛЕВИЗИОН, РАДИО ВА КОРМАНДОНИ СОҲАИ АЛОҚА. Дар Тоҷикистон барномаи рушди соҳаи алоқа таҳия карда мешавад
«ХОТИРА АЗ ҲОФИЗ». Ин намоиши байналмилалӣ ба 700-солагии Ҳофизи Шерозӣ бахшида шудааст
Фестивали байналмилалии театрҳои касбӣ «Наврӯз» ҷамъбаст карда мешавад
Дар Осорхонаи миллии Тоҷикистон намоиши асарҳои рассом ва муҷассамасози олмонӣ Гюнтер Уэкер баргузор мегардад