Наргис Шарифзода: «Вақте дар мусобиқаҳои сатҳи ҷаҳонӣ Парчами Тоҷикистон барафрохта мешавад, аз ифтихори зиёд ашк аз чашмонам ҷорӣ мегардад»

Ноябрь 22, 2022 14:54

ДУШАНБЕ, 22.11.2022. /АМИТ «Ховар»/. Ба ифтихори Рӯзи Парчами давлатии Ҷумҳурии Тоҷикистон, ки ҳамасола 24 ноябр таҷлил мегардад, дар ноҳияи Исмоили Сомонии шаҳри Душанбе бо иштироки васеи хонандагон, донишҷўён ва кормандони мақомотҳои гуногун баргузории барномаҳои фарҳагию маърифатӣ ва варзишӣ ба нақша гирифта шудааст. Ҳамчунин намояндагони мақомоти иҷроияи ҳокимияти давлатии ноҳияи Исмоили Сомонӣ дар мулоқоту суҳбатҳое, ки дар муассисаҳои олии ҳудуди ноҳия баргузор мегарданд, иштирок намуда, оид ба моҳияти Парчами давлатӣ дар сарҷамъ намудани миллат маърўзаҳо менамоянд. Чунин иброз дошт муовини Раиси ноҳияи Исмоили Сомонӣ Наргис ШАРИФЗОДА дар суҳбат бо хабарнигори АМИТ «Ховар» дар арафаи Рўзи Парчами давлатӣ.

«Ҳар вақте варзишгарони тоҷик дар мусобиқаҳои сатҳи ҷаҳонӣ ғолибият ба даст меоранд, ба ифтихорашон Суруди миллӣ садо дода, Парчами давлатӣ барафрохта мешавад. Ман ин манзараро тариқи оинаи нилгун тамошо карда, ифтихор, ғурури милливу худшиносиям боло гирифта, ҳатто ашк аз чашмонам ҷорӣ мешавад, ки мо имрӯз давлату миллат ва муқаддасоти худро дорем. Аз ин рў, ман ба варзишгарони баору номус ва боғайратамон, ки парчамбардорони Ватан ҳастанд, изҳори ташаккур менамоям»,- гуфт дар идомаи суҳбат Наргис Шарифзода.

Ў тазаккур дод, ки моҳи сентябри соли 2011 дар Душанбе бахшида ба 20-солагии Истиқлолияти давлатӣ баландтарин парчами ҷаҳон бо пояи 165 метр (рекорди қаблӣ 162 метр ба Озарбойҷон тааллуқ дошт) барафрохта шуд. Парчам 60 ба 30 метр буда, ҳадди ақал 700 кило вазн дорад. Ҳоло дар ҳамаи шаҳру ноҳияҳои мамлакат майдонҳои Парчам сохта мавриди истифода қарор дода шудаанд, ки онҳо ба макони баргузории чорабиниҳои фарҳангӣ ва ҳамоишҳои ватандӯстонаи шаҳрвандони кишвар, аз ҷумла ҷавонон табдил ёфтаанд.

Наргис Шарифзода зикр кард, ки “имрӯз сайёҳони зиёд ба хотири аз наздик дидани парчами баландтарин ба Тоҷикистон меоянд. Онҳо аз шаҳомату зебоии парчами мо ба ваҷд омада, дар назди он ба нишони ёдоварӣ акс мегиранд ва онро ба дӯстону пайвандонашон мефиристанд. Ин магар мояи ифтихор нест?!”.

Ҳамсуҳбати мо аз Паёми шодбошии Пешвои миллат муҳтарам Эмомалӣ Раҳмон ба муносибати Рўзи Парчами давлатӣ, ки соли 2021 ироа гардид, чунин иқтибос овард: «Хотиррасон менамоям, ки Парчами миллӣ ҳамчун рамзи муқаддаси давлати соҳибистиқлолу соҳибихтиёри тоҷикон бояд нишони сарисинагии ҳар як фарди ватандӯсту ватанпарвар ва бонангу номуси ҷомеа бошад».

“Ҳар яки мо бояд зери Парчами давлатӣ, ки онро парчами нангу номус ном мебарем, сарҷамъу муттаҳид гардида, баҳри ободию шукуфоии сарзаминамон — Тоҷикистон саъю талош намоем”,-изҳор дошт ў.

Рухсораи НУР,
АМИТ «Ховар»

АКС: манбаъҳои боз

Ноябрь 22, 2022 14:54

Хабарҳои дигари ин бахш

Эмомалӣ Раҳмон: «Қаҳрамонони сулҳу субот ва ваҳдати миллӣ танҳо мардуми шарифу сарбаланди Тоҷикистон мебошанд»
10 АМАЛИ ЗАМИНАСОЗИ СУЛҲУ ВАҲДАТ. Ба истиқболи 28-солагии Рӯзи Ваҳдати миллӣ
ВАҲДАТИ МИЛЛӢ – КАФОЛАТИ ПОЙДОРИИ ДАВЛАТ. Мулоҳизаҳои Прокурори генералии Ҷумҳурии Тоҷикистон дар ин мавзуъ
Эмомалӣ Раҳмон ва Си Ҷинпин оғози парвозҳои мустақими мусофирбарӣ байни Душанбе ва Пекинро рӯйдоди муҳим номиданд
Ҷашни Тиргон бо баргузории иди зардолу ва намоиши «Хушкмеваҳои Тоҷикистон» таҷлил мегардад
Каролин Глейч: «Тоҷикистон сарзамине бо табиати нотакрор аст ва мебояд, ин зебоиро ба тамоми ҷаҳон нишон дод!»
Кирти Вардхан Сингҳ: «Ҳифзи пиряхҳо ҳамбастагӣ, ҳамкории байналмилалӣ ва фаҳмиши муштараки илмиро талаб мекунад»
Кэтрин Рассел, директори иҷроияи ЮНИСЕФ: «Мо мехоҳем, ки садои кӯдакон ва ҷавонон дар сиёсати иқлимӣ шунида шавад»
Ясмин Сиддиқӣ: «Обшавии пиряхҳо танҳо як мушкили муҳити зист нест, ин буҳрони об, ғизо ва рӯзгор аст»
Қоҳир Расулзода Конфронси байналмилалии сатҳи баланд оид ба ҳифзи пиряхҳоро натиҷагирӣ намуд
Шамс Аббосӣ: «Таҳти роҳбарии Эмомалӣ Раҳмон мардуми тоҷик дар самти мубориза бо тағйирёбии иқлим ва пешбурди донишҳои экологӣ қадамҳои бузург мегузоранд»
Султон Ҷамшед: «ВАО-и Тоҷикистон дар инъикоси кори конфронси сатҳи баланд муваффақ буд»