Ассотсиатсияи гурӯҳи дӯстии байнипарлумонии кишварҳои Осиёи Марказӣ ва Ҷопон таъсис ёфт

ДУШАНБЕ, 24.12.2022 /АМИТ «Ховар»/. Ассотсиатсияи гурӯҳи дӯстии  байнипарлумонии кишварҳои Осиёи Марказӣ ва Ҷопон таъсис ёфт, хабар медиҳад АМИТ «Ховар» бо истинод ба Вазорати корҳои хориҷии Ҷумҳурии Тоҷикистон.

23 декабр Вазири корҳои хориҷии мамлакат Сироҷиддин Муҳриддин дар мулоқоти муштараки вазирони корҳои хориҷии кишварҳои Осиёи Марказӣ бо Ассотсиатсияи гурӯҳи дӯстии байнипарлумонии кишварҳои Осиёи Марказӣ ва Ҷопон иштирок намуд.

Дар мулоқот таъсиси Ассосиатсияи гурӯҳи дӯстии байнипарлумонии кишварҳои Осиёи Марказӣ ва Ҷопон эълон гардида, оид ба таҳкиму тавсеаи робитаҳои муштараки парлумонҳо дар доираи Ассосиатсияи мазкур табодули афкор сурат гирифт.

Тавре қаблан АМИТ «Ховар» иттилоъ дода буд, 3 август дар Душанбе Сироҷиддин Муҳриддин бо Роҳбари Гурӯҳи дӯстии байнипарлумонии Тоҷикистон ва Ҷопон Кейҷи Фуруя мулоқот намуд.

Зимни мулоқот ҷонибҳо дастовардҳои  мусбати сӣ соли равобити дипломатии Тоҷикистон ва Ҷопонро таъкид намуда, нақши робитаҳои байнипарлумонӣ ва саҳми Гурӯҳи дӯстии байнипарлумониро дар рушди муносибатҳои дуҷониба миёни ду кишвар муҳим арзёбӣ карданд.

Ҷонибҳо сатҳи ҳамкории ду кишвар дар бахшҳои иқтисодиву иҷтимоӣ, омодасозии кадрҳо ва робитаҳои илмию фарҳангӣ, беҳтаргардонии зерсохтори нақлиётию логистикӣ, татбиқи санадҳои қаблан имзошудаи ҳамкорӣ, амалӣ кардани лоиҳаҳои муштарак ва ҳамчунин зарурати таҳкими минбаъдаи ҳамкории барои ҳарду кишвар судмандро таъкид намуданд.

Ҷонибҳо аҳамияти ҳамкорӣ дар доираи Муколамаи «Осиёи Марказӣ + Ҷопон»-ро ҳамчун заминаи эътимоднок ва воқеӣ дар роҳандозии ҳамкории амалӣ ва ҳамшарикии Ҷопон бо Осиёи Марказӣ зикр карданд.

Акс: ВКХ ҶТ