ЧҶ-2022: ҲАМАИ НИМФИНАЛИСТОН МАЪЛУМ ШУДАНД. Мухлисони футбол дар Тоҷикистон дар куҷо ва кай пахши бозиҳои ½-финалиро тамошо мекунанд?

ДУШАНБЕ, 13.12.2022 /АМИТ «Ховар»/. Рӯзи шанбе, 10 декабр бозиҳои охирини марҳалаи ¼-финалии Чемпионати ҷаҳон оид ба футбол дар Қатар баргузор гардиданд. Дар натиҷаи ин бозиҳо ҳамаи нимфиналистони ЧҶ-2022 маъмул шуданд. Инҳо дастаҳои мунтахаби Аргентина, Марокаш, Фаронса ва Хорватия мебошанд.

Дастаи мунтахаби Марокаш бар тими Португалия ба таври ҳангомавӣ ғалаба кард. Голи ягонаро дар дақиқаи 42-юм Юсуф Ан-Носирӣ ба ҳадаф расонд, ки ба ӯ Яҳё Аттиёт-Аллоҳ партофти головар дод. Дар дақиқаи 90+3 Валид Ҳеддира корти сурх гирифт (огоҳии дуюм), вале марокашиҳо ҳисоби бозиро нигоҳ доштанд – 1:0. Криштиану Роналду ин бор низ натавонист чемпиони ҷаҳон шавад.

Дастаи мунтахаби Фаронса тими Англияро бо ҳисоби 2:1 мағлуб кард. Дар дақиқаи 17-ум Аурелен Тчуамени бо партофти Антуан Гризман гол зада, ҳисоби бозиро кушод. Дар дақиқаи 54-ум Ҳарри Кейн аз ҷаримаи ёздаҳметра ҳисобро баробар кард. Дар дақиқаи 78-ум Оливйе Жиру гол зад ва ҳисоб 2 бар 1 ба фоидаи Фаронса шуд. Пас аз шаш дақиқа Кейн метавонист ҳисобро баробар кунад, аммо аз зарбаи 11-метра гол зада натавонист.

Ҳамин тавр, ҳамаи иштирокчиёни нимфинал ва ҷадвали мусобиқа муайян гардиданд.

13 декабр
23:59. Аргентина — Хорватия.

14 декабр
23:59. Фаронса — Марокаш.

Мухлисони футбол дар Тоҷикистон метавонанд ҳарду бозии нимфинали Чемпионати ҷаҳон-2022 оид ба футболро дар Қатар мустақим тамошо кунанд. Соат дар тақвим бо вақти Душанбест.

Ёдовар мешавем, ки дастаи мунтахаби Фаронса чемпиони кунунии ҷаҳон ва Хорватия — барандаи медали нуқра мебошад.

Акс: GETTY IMAGES