Сафири Арабистони Саудӣ дар Тоҷикистон хостори имзои санади ҳамкорӣ миёни китобхонаҳои ду кишвар шуд

Декабрь 9, 2022 14:31

ДУШАНБЕ, 09.12.2022 /АМИТ «Ховар»/. 8 декабр Сафири Фавқулода ва Мухтори Шоҳигарии Арабистони Саудӣ дар Ҷумҳурии Тоҷикистон Валид ибни Абдурраҳмон ар-Рушайдон аз Китобхонаи миллии Тоҷикистон дидан намуд, хабар доданд ба АМИТ «Ховар» дар Китобхонаи мазкур.

Ба меҳмон аз таърихи китобу китобдории миллат, бунёди Китобхонаи миллӣ, барномаҳои давлатии рушди китобу китобдорӣ дар Тоҷикистон, таваҷҷуҳи Ҳукумати мамлакат ва бахусус Пешвои миллат ба тавсеаи соҳа, таҳкими робитаҳои хориҷӣ, имзои якчанд санаду созишномаҳои ҳамкорӣ миёни мамлакатҳои мухталиф, ба роҳ мондани конференсияҳои дохиливу байналмилалӣ дар дохили китобхона, ҷараёни баргузории озмуни ҷумҳуриявии «Фурӯғи субҳи доноӣ китоб аст» ва фаъолияти гӯшаҳои китоби кишварҳои ҷаҳон маълумот дода шуд.

Директори Китобхонаи миллӣ Ҷумахон Файзализода зимни баршумурдани гӯшаҳои китоби мамолики хориҷӣ иброз дошт, ки ҳоло дар Китобхонаи миллӣ 22 гӯшаи китоби кишварҳои хориҷӣ амал мекунад, ки миёни онҳо гӯшаи китоби Арабистони Саудӣ низ мавҷуд аст.

Валид ибни Абдурраҳмон ар-Рушайдон бо изҳори ташаккур аз пазироии гарму истиқболи роҳбарияти Китобхонаи миллӣ иброз дошт, ки «ростӣ, диққати маро ду чиз, яке бинои муҳташами Китобхонаи миллӣ ва дигар ба роҳ мондани чунин озмуне бо номи «Фурӯғи субҳи доноӣ китоб аст» ба худ ҷалб намуд. Воқеан, Китобхонаи миллии Тоҷикистон бо шукӯҳу шаҳомат бунёд ёфта, фазои басо гуворои маърифату донишро дар худ ғунҷондааст. Ва чун шумо аз озмуни «Фурӯғи субҳи доноӣ китоб аст» ёдовар шудед, ростӣ чунин пешниҳоду ба роҳ мондани озмун барои бештар мутолиа намудани насли имрӯзи ҷомеа зарур ва ба манфиати ҳар мамлакат мебошад. Барои густариши минбаъдаи равобит месазад санади ҳамкорӣ миёни китобхонаҳои ду мамлакат тартиб дода шавад».

Меҳмонон аз мусаввараи таърихӣ, Осорхонаи китоб ва толори намоиши китоб, ки дар ошёнаи сеюми Китобхона ҷой гирифтаанд, дидан намуданд. Таваҷҷуҳи Сафирро бештар Осорхонаи китоб, ки он ҷо китобҳои қадимӣ ҷой доранд, бахусус китоби Мавлоно Ҷалолуддини Балхӣ, «Шоҳнома»-и безаволи Абулқосим Фирдавсӣ ва дастнавиштаҳо аз осори Ҳаким Умари Хайём ҷалб намуд. Ҳамзамон Сафир ба хатҳои қадимӣ, аз қабили хатти авастоӣ ва паҳлавӣ таваҷҷуҳи хосса намуд. Ҳамчунин меҳмонон аз шуъбаи дастхатҳои Шарқ ва китобҳои нодир дидан намуданд.

Ҳамзамон Сафири Арабистони Саудӣ ба узвияти Китобхонаи миллӣ пазируфта шуда, соҳиби корти ифтихории китобхона гардид.

АКС: Китобхонаи миллии Тоҷикистон

Декабрь 9, 2022 14:31

Хабарҳои дигари ин бахш

Дар Суғд 39 нафар ғолиби Озмуни вилоятии «Хомаи созанда-2022» гардид
6 феврал «Амонатбонк», Хадамоти иҷро, Маркази миллии тестӣ ва Иттифоқи «Тоҷикматлубот» нишасти матбуотӣ баргузор менамоянд
«ИЛМ-ФУРӮҒИ МАЪРИФАТ». Соли сеюм аст, ки озмуни мазкур бо мақсади дарёфти истеъдодҳои нав дар асоси амри Президенти Ҷумҳурии Тоҷикистон доир карда мешавад
«ТОҶИКИСТОН-ВАТАНИ АЗИЗИ МАН». Имсол дар ин озмуни ҷумҳуриявӣ рассомон ва дизайнерон иштирок мекунанд
««ТОҶИКОН» – ОИНАИ ТАЪРИХИ МИЛЛАТ». Шоҳҷоиза барои ғолибон дар ҳар гурӯҳи ин озмуни ҷумҳуриявӣ 70 ҳазор сомонӣ пешбинӣ шудааст
Пагоҳ Кумитаи дин, танзими анъана ва ҷашну маросим, Агентии назорати маводи нашъаовар, Агентии «Тоҷикстандарт», КВД «Хоҷагии манзилию коммуналӣ» ва КВД «Тоҷиксуғурта» нишасти матбуотӣ баргузор менамоянд
Хизматчиёни давлатии Тоҷикистон дар шаҳри Беппуи Ҷопон фарҳанги миллати тоҷикро муаррифӣ карданд
Дар озмуни ҷумҳуриявии ««Тоҷикон» – оинаи таърихи миллат» иштирок менамоем
«ТАВАҶҶУҲИ ҲАКАМОН» БА «ДОВ». Филми Тоҷикистон дар Кинофестивали байналмилалӣ соҳиби ҷоиза гардид
Соли 2022 беш аз 138 ҳазор нафар сайёҳон аз мавзеъҳои таърихию фарҳангии вилояти Суғд дидан карданд
АРҶ МЕГУЗОРЕМ. Дар Бохтар Осорхонаи Ҳунарпешаи халқии Тоҷикистон Аловуддин Абдуллозода таъсис меёбад
«КУРУШИ КАБИР»-ЛОИҲАИ НАВИ БАЛЕТ. Ба наздикӣ он дар Душанбе рӯнамоӣ мегардад