Дар Душанбе сохтмони 17 муассисаи таҳсилоти миёнаи умумӣ ҷараён дорад

Январь 5, 2023 15:00

ДУШАНБЕ, 05.01.2023. /АМИТ «Ховар»/. Дар шаҳри Душанбе соли 2022 7 адад муассисаи таҳсилоти томактабӣ барои 924 ҷой ва 10 адад муассисаи таълимӣ барои 9090 нафар хонанда дар як баст мавриди истифода қарор дода шуданд. Ин матлаб 4 январ зимни баргузории ҷаласаи мушовараи Сарраёсати маорифи шаҳри Душанбе баён гардид, иттилоъ доданд дар Сарраёсати мазкур.

Соли 2023 низ ин иқдом идома ёфта, айни замон сохтмони 17 муассисаи таҳсилоти миёнаи умумӣ барои 17 ҳазору 16 ҷой дар як баст идома дорад.

Ҷаласаи мазкур дар муассисаи таҳсилоти миёнаи умумии №31-и ноҳияи Шоҳмансури шаҳри Душанбе бо иштироки муовини Вазири маориф ва илм Зиёдулло Абдулзода, сардори Сарраёсати маорифи шаҳри Душанбе Баҳром Исмоилзода, Директори КВД «Шаҳри ҳушманд (Smart city)»-и Мақомоти иҷроияи ҳокимияти давлатии шаҳри Душанбе Саъдӣ Самадзода, аъзои ҳайати мушовара, кормандони дастгоҳи марказии Сарраёсати маориф, мудирони шуъбаҳои маориф ва роҳбарони муассисаҳои таҳсилоти томактабӣ ва миёнаи умумӣ баргузор гардид.

Ҳоло дар шаҳри Душанбе 161 муассисаи таҳсилоти томактабӣ бо теъдоди 31469 нафар тарбиягирандагон фаъолият менамоянд, ки аз ин шумора 96 ададаш буҷетӣ, 12 адад тобеи ташкилоту корхонаҳо ва 53 адади дигар хусусӣ ба ҳисоб рафта, дар онҳо 1825 нафар мураббиён ва омўзгорон фаъолият доранд.

Зикр шуд, ки шумораи муассисаи таҳсилоти умумӣ дар айни замон дар шаҳри Душанбе 199 ададро ташкил дода, ин нишондиҳанда нисбат ба ҳамин давраи соли гузашта 6 адад зиёд мебошад.

Дар муассисаҳои таълимии пойтахт 274920 нафар хонанда ба таълиму тарбия фаро гирифта шудаанд, ки ин нишондиҳанда нисбат ба соли гузашта (соли 2022 — 268402) 6518 нафар зиёд мебошад.

Шумораи омӯзгорон дар муассисаҳои таълимии шаҳри Душанбе 11479 нафарро ташкил медиҳад, ки ин нисбат ба соли гузашта 266 нафар зиёд мебошад.

Дар идома барои хизматҳои бисёрсолаи бенуқсон дар соҳаи маориф, саҳми арзанда дар таълиму тарбияи насли наврас ва иштироки фаъолона дар корҳои ҷамъиятӣ мутахассиси пешбари раёсати таъминоти методии Сарраёсати маорифи шаҳри Душанбе Гулчеҳра Файзиева бо нишони “Аълочии маориф ва илми Тоҷикистон” сарфароз гардид.

Инчунин аз ҷониби КВД «Шаҳри ҳушманд (Smart city)»-и Мақомоти иҷроияи ҳокимияти давлатии шаҳри Душанбе Сарраёсати маорифи шаҳри Душанбе, Муассисаи давлатии «Маркази таҳсилӣ-иттилоотии назди Сарраёсати маорифи шаҳри Душанбе», ҶДММ «Ватан ИКТ» ва ҶДММ «Симин» барои ҳамкории самарабахш дар амалӣ намудани барномаи электронии «eDonish» дар муассисаҳои таҳсилоти миёнаи умумии шаҳри Душанбе бо сипоснома қадрдонӣ карда шуданд.

Ба 9 нафар хонандагони фаъол ифтихорнома ва маблағи пулӣ дар ҳаҷми 500 сомонигӣ тақдим карда шуд.

АКС: Сарраёсати маорифи шаҳри Душанбе

Январь 5, 2023 15:00

Хабарҳои дигари ин бахш

Масъалаи омода намудани мутахассисони соҳаи роҳи оҳан дар Тоҷикистон бо намояндагони Корея баррасӣ гардид
НИШАСТИ МАТБУОТӢ. Дар Тоҷикистон 6505 нафар дорои дараҷаи илмӣ мебошанд
НИШАСТИ МАТБУОТӢ. Дар Донишгоҳи техникии Тоҷикистон 8 ихтисоси нав таъсис дода шуд
Байни Литсейи №2-и барои хонандагони болаёқати шаҳри Душанбе ва Мактаби байналмилалии «Paragon» Шартномаи ҳамкорӣ ба тасвиб расид
НИШАСТИ МАТБУОТӢ. Дар Донишгоҳи давлатии омӯзгорӣ бо мақсади омӯзиши забонҳои хориҷӣ 3 марказ бунёд гардид
Дар деҳаи Деваштичи шаҳри Панҷакент мактаби нав сохта мешавад
НИШАСТИ МАТБУОТӢ. Дар Донишгоҳи давлатии тиббии Тоҷикистон 799 нафар тавассути квотаи президентӣ таҳсил менамоянд
Дар Душанбе озмуни «Беҳтарин ровии наврас-2025» оғоз мегардад
IMO-2025. Хонандагони тоҷик дар Олимпиадаи байналмилалии математика сазовори медалҳои нуқра шуданд
НИШАСТИ МАТБУОТӢ. Дар Академияи идоракунии давлатӣ бахшида ба Солҳои рушди иқтисоди рақамӣ ва инноватсия ду ихтисоси нав таъсис ёфт
То 23 июл аризаҳои апеллятсионӣ дар бораи норозӣ будан аз холҳои дар ИМД гузошташуда қабул карда мешаванд
Тоҷикистон ва ЮНИСЕФ дар Ню-Йорк оид ба ҳуқуқи кӯдак ва инноватсия чорабинӣ доир намуданд