Дар машқгоҳи Лоҳур бо ҷалби афсарони ҷузъу томи муҳандисии қисмҳои ҳарбӣ ҷамъомад доир шуд

ДУШАНБЕ, 19.01.2023. /АМИТ «Ховар»/. Зимни ҷамъомади методӣ-таълимӣ дар пойгоҳи Маркази таълимии минтақавӣ оид ба хавфҳои воситаҳои хатарноки тарканда ва машқгоҳи низомии Лоҳур роҳу воситаҳои нави фаъолияти касбии низомӣ мавриди таҳлилу омӯзиш қарор дода шуданд. Дар ин бора ба АМИТ «Ховар» дар Вазорати мудофиаи Тоҷикистон хабар доданд.

Дар қисмати аввали ҷамъомад, ки ба таври назариявӣ ҷараён гирифт, масъулини Раёсати қӯшунҳои муҳандисии Ситоди генералии Қувваҳои Мусаллаҳи Ҷумҳурии Тоҷикистон дар мавзӯъҳои гуногуни соҳавӣ, аз ҷумла тартиби таҷҳизонидани истеҳкомҳои мудофиавӣ дар маҳали ҷанг, тавсифи тактикӣ-техникӣ, тарзи васлкунӣ ва кори борутҳои хандақӣ ва вобаста ба сохту таркиб ва қисмҳои асосии техникаҳои махсуси муҳандисӣ маърӯзаҳо пешниҳод намуданд. Баромадкунандагон бо дарназардошти хизмати масъулиятнок дар сафи ҷузъу томи Қӯшунҳои муҳандисӣ таъкид карданд, ки пешбурди фаъолияти муҳандисӣ-минаҷӯйӣ аз ҳар афсари соҳа маҳорати баланди касбӣ ва омӯзиши техникаву таҷҳизоти ҳозиразамони соҳавӣ тақозо менамояд.

Ҳамзамон дар ҷамъомади таълимии навбатӣ ҳайати шахсӣ воситаҳои гуногуни фаъолияти муҳандисӣ, аз қабили ҳамвору барқарор намудани роҳҳо, сохтани гузаргоҳҳо барои техникаҳои низомӣ дар минтақаҳои душворгузар, ошкору безарар ва нобуд сохтани минаҳои тарканда, иктишофи муҳандисӣ, корҳои таркишиву безараргардонӣ ва дигар амалҳоро вобаста ба самти фаъолияти хизматӣ мавриди омӯзиш қарор доданд.

Зимнан, ба афсарони соҳа таъкид карда шуд, ки дар фаъолияти касбии хеш, ки асосан  корҳои таркишиву безараргардонии минаҳо мебошад, масъулиятшинос бошанду ҷиҳати таълими дарусти сарбозон доир ба минаҷӯйӣ ва дарёфту безараргардонии он аз роҳу воситаҳои ҳозирамон истифода баранд.

АКС: Вазорати мудофиаи ҶТ