Дар соли хониши 2023-24 дар Тоҷикистон ҳунари иҷрои арфа* омӯзонида мешавад

Январь 23, 2023 16:32

ДУШАНБЕ, 23.01.2023 /АМИТ «Ховар»/. Бори аввал дар солҳои Истиқлолияти давлатии Тоҷикистон ба таълими ҳунари иҷрои арфа* шурӯъ карда мешавад, хабар медиҳад маркази матбуоти Театри давлатии академии опера ва балети Тоҷикистон ба номи С.Айнӣ.

Театри давлатии академии опера ва балети Тоҷикистон ба номи С.Айнӣ ва Консерваторияи миллии ба номи Т.Сатторов дар соли таҳсили 2023/24 синфи “Мусиқии арфа” мекушоянд. Бо ин донишҷӯён имкони навохтани арфаро, ки давоми се даҳсолаи охир дар мамлакат садо надодааст, пайдо мекунанд.

«Воқеияти муосир чунин аст, ки театр уҳдадориҳои нави начандон маъмулиро бар дӯш мегирад ва ба раванди таълим ворид мешавад. Мояи хушнудист, ки дар солҳои Истиқлолияти давлатӣ аз ҷониби Ҳукумати Ҷумҳурии Тоҷикистон ва шахсан Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон барои баланд бардоштани сатҳи дониши илмӣ дар мамлакат тадбирҳои муҳим ба амал бароварда шуданд», — гуфт директори театр Камолиддин Сайфиддинзода.

Ба иттилои манбаъ, самти афзалиятноки фаъолияти театрро ҷалби дастаҳои мусиқӣ ва тарбияи эҷодии мутахассисони миллӣ, инчунин таъмини омӯзгорони арзанда аз хориҷи мамлакат ташкил медиҳад.

Ёдовар мешавем, ки дар поёни соли 2022 ҳамкорӣ бо арфанавоз аз Санкт-Петербург Катерина Бабочкина оғоз гардид. Давоми ду моҳи охир вай на танҳо дар саҳнаи театр якканавозӣ карда, дар ҳайати оркестр дар якчанд намоиш ва барномаҳо ҳунарнамоӣ намуд, балки ба таълими навозандагони ҷавон низ шурӯъ кард. Сарояндаи маъруф донишу маҳорати худро ба донишҷӯён, ки намояндаи насли Тоҷикистони соҳибистиқлол мебошанд, меомӯзад.

Дар театр аллакай дарсҳо оғоз шудаанд, навозандагони ҷавон ба дарсҳои амалии Катерина Бабочкина номнавис карда мешаванд ва  мутмаинанд, ки орзуяшон- фатҳи «маликаи саҳна» — арфа ҳатман амалӣ хоҳад шуд.

Катерина Бабочкина узви Ҷамъияти арфаҳои Русия, чор маротиба барандаи ҷоизаи аввал дар номинаи «Арфаҳои классикӣ» дар озмунҳои байналмилалӣ (Вена 2019, Санкт-Петербург 2018, 2022), инчунин озмуни умумирусиягӣ (Петрозаводск 2022), номинаҳои «Арфаҳои классикӣ» (Сербия, Москва, Петрозаводск) ва «Арфа Леверс» (Санкт-Петербург) мебошад. Вай дар Чин (Шанхай), ИМА (Гейнсвилл, Атенс, Уиллоу стрит, Хазелтон, Энн-Арбор, Флемингтон) дар ҳайати оркестрҳо, инчунин бо барномаҳои якканавозӣ дар Қатар (Давҳа) ҳунарнамоӣ кардааст.

Аз моҳи декабри соли 2022 якканавози оркестри Театри давлатии академии опера ва балети Тоҷикистон ба номи С.Айнӣ мебошад.

 

________

Арфа*- асбоби  тордори  мизробии мусиқӣ, ки аз ду чорчӯбаи дар кунҷ ҷойгиршуда иборат буда, байни онҳо торҳои зиёде кашида шудаанд.

АКС: Театри давлатии академии опера ва балети Тоҷикистон ба номи С.Айнӣ

Январь 23, 2023 16:32

Хабарҳои дигари ин бахш

Пагоҳ дар вазоратҳои энергетика ва захираҳои об, кишоварзӣ, фарҳанг ва Хадамоти алоқа оид ба ҷамъбасти соли 2022 нишасти матбуотӣ доир карда мешавад
«ДАРВОЗАИ НАВРӮЗ АСТ ҶАШНИ САДАИ МЕҲАН!». Имрӯз дар Душанбе ҷашни Сада бо шукӯҳу шаҳомат таҷлил карда шуд
Дар Вилояти Мухтори Кӯҳистони Бадахшон иди Сада бошукӯҳ таҷлил карда шуд
Сардори Раёсати Маркази тадқиқоти стратегӣ Зубайдулло Давлатов: «Номи ҷашни Сада аз рақами 100 гирифта шуда, панҷоҳ шабонарӯзро то фарорасии Наврӯз дар бар мегирад»
«НАҚШИ ОСОРХОНАИ МИЛЛӢ ДАР ТАРБИЯИ ВАТАНДӮСТИИ ШАҲРВАНДОН». Дар ин мавзўъ конфронси ҷумҳуриявӣ доир гардид
Дар Душанбе китобномаи профессор Аҳмад Абдуллоев рӯнамоӣ карда шуд
МАРҲАМАТ БА ҶАШНГОҲ! Пагоҳ дар Боғи фарҳангӣ-фароғатии ба номи Абдулқосим Фирдавсии шаҳри Душанбе иди Сада таҷлил мегардад
Кишоварзони вилояти Хатлон ҷашни Садаро бо дастовардҳои назаррас пешвоз гирифтанд
Дар ноҳияи Рӯдакӣ ҷашни Садаро бо намоиши маҳсулоти кишоварзӣ ва ҳунарҳои мардумӣ таҷлил карданд
Дар Истаравшан бо афрӯхтани гулхани рамзӣ ҷашни Садаро бо шаҳомат таҷлил намуданд
«Андоз аз блогерон. Он чӣ гуна ситонида мешавад?», — шарҳи матбуоти даврии Тоҷикистон
Китоби «Tajik Linguistics» («Забоншиносии тоҷик») дар Аврупо ба нашр расид