Дар Донишгоҳи давлатии Кӯлоб бахшида ба Рӯзи умумиҷаҳонии занон дар соҳаи илм конфронс баргузор шуд

ДУШАНБЕ, 11.02.2023. /АМИТ «Ховар»/. 10 феврал бахшида ба Рӯзи  умумиҷаҳонии занон дар соҳаи илм дар Донишгоҳи давлатии Кӯлоб ба номи Абуабдуллоҳи Рӯдакӣ конфронси вилоятии илмӣ-назариявӣ таҳти унвони «Занон ва рушди илми муосир» баргузор гардид. Дар ин ин хусус ба АМИТ «Ховар» дар донишгоҳи мазкур иттилоъ доданд.

Тазаккур дода шуд, ки дар даврони соҳибистиқлолии Тоҷикистон аз ҷониби Ҳукумати мамлакат ва Президенти Ҷумҳурии Тоҷикистон муҳтарам Эмомалӣ Раҳмон ҷиҳати ҷалби занону бонувон ба хизмати давлатӣ тадбирҳои зарурӣ ва саривақтӣ андешида шудаанд, ки ҳамаи ин иқдомот масъулияту нақши занону бонувонро дар рушду таҳкими Истиқлолияти давлатӣ ҷиддитар мегардонанд.

Дар конфронс устодони донишгоҳ дар мавзӯъҳои «Эҳтироми зан эҳтироми-миллат аст», «Махсусиятҳои диди бадеии Фирдавсӣ ва Низомӣ дар офариниши нақши занон (дар мисоли «Шоҳнома»-и Абулқосими Фирдавсӣ ва «Хамса»-и Низомии Ганҷавӣ)» ва «Фарҳанги рақамӣ-омили муҳим дар рушди касбияти мутахассиси замони муосир» маърӯзаҳо карда шуданд.

Зикр гардид, ки дар замони марҳилаҳои навин ягон самти фаъолиятро бидуни ширкати фаъоли занон тасаввур намудан ғайриимкон аст. Хусусан саҳми онҳо дар бахшҳои илму маориф, фарҳангу тандурустӣ ва дигар самтҳои ҳаёти иҷтимоиву иқтисодии кишвар торафт афзун мегардад. Ҳамзамон ҷиҳати баланд бардоштани ҳуқуқ ва озодии занону модарон, ҷалби васеи онҳо ба раванди татбиқи сиёсати давлатӣ, интихобу тарбия ва ҷобаҷогузории кадрҳои роҳбарикунанда аз ҳисоби занону бонувон рӯз аз рӯз такмил ёфта, равиши тоза мегирад.

АКС: Донишгоҳи давлатии Кӯлоб ба номи Абуабдуллоҳи Рӯдакӣ