Дар Ҷамоати деҳоти ба номи Ҷӯра Раҳмонови шаҳри Турсунзода Маркази саломатии деҳавии «Тойчӣ» ифтитоҳ ёфт

ДУШАНБЕ, 27.03.2023 /АМИТ «Ховар»/. Дар Ҷамоати деҳоти ба номи Ҷӯра Раҳмонов бо иштироки роҳбарияти  шаҳри Турсунзода Маркази саломатии деҳавии «Тойчӣ» ба истифода дода шуд. Дар ин хусус АМИТ «Ховар» бо истинод ба Мақомоти иҷроияи ҳокимияти давлатии шаҳри Турсунзода хабар медиҳад.

Сохтмони бинои бунгоҳи саломатӣ бо дастгирии мақомоти иҷроияи шаҳр ва шарикони рушд дар муддати 6 моҳ ба анҷом расид.

Бо ба истифода додани бинои нав, ки аз панҷ ҳуҷраи корӣ ва як ҳуҷраи бақайдгирӣ  иборат аст, барои расонидани кумаки аввалияи тиббӣ шароити хуби корӣ муҳайё гардид.

Бояд гуфт, ки дар арафаи таҷлили Ҷашни байналмилалии Наврӯз дар шаҳри Турсунзода аз 30 иншооти мавриди истифода қароргирифта се иншоот ба  соҳаи кумаки аввалияи тиббӣ тааллуқ дорад.

Ифтитоҳи бунгоҳи саломатии «Ғарав» дар деҳаи Ғарави Ҷамоати деҳоти Регар ва Бунгоҳи саломатии «Оққурғон» дар деҳаи Обида Нуъмоноваи Ҷамоати деҳоти ба номи Ҷӯра Раҳмонов, ки сохтмони онҳо бо дастгирии Мақомоти иҷроияи ҳокимияти давлатии шаҳри Турсунзода, шарикони рушд, соҳибкорони маҳаллӣ ва сарҷамъии мардуми деҳот анҷом дода шуд, ба баланд бардоштани сатҳи хизматрасонӣ ба мардум мусоидат намуд.

 АКС: Мақомоти иҷроияи ҳокимияти давлатии шаҳри Турсунзода