Иҷлосияи сенздаҳуми Маҷлиси вакилони халқи шаҳри Душанбе, даъвати шашум баргузор гардид

Март 17, 2023 21:52

ДУШАНБЕ, 17.03.2023 /АМИТ «Ховар»/. Имрӯз дар пойтахти мамлакат иҷлосияи сенздаҳуми Маҷлиси вакилони халқи шаҳри Душанбе, даъвати шашум бо роҳбарии Раиси маҷлиси вакилони халқи шаҳри Душанбе муҳтарам Рустами Эмомалӣ доир гардид.

Дар кори иҷлосия муовинон, роҳбари дастгоҳи Раиси шаҳр, роҳбарони воҳидҳои сохтории дастгоҳ, корхонаву муассисаҳои шаҳрӣ, раисони ноҳияҳои шаҳр, сардорони мақомоти ҳифзи ҳуқуқ, сохторҳои маҳаллии мақомоти марказии ҳокимияти иҷроия ва намояндагони васоити ахбори омма иштирок намуданд.

Дар оғоз вакилон котиботи иҷлосияро интихоб намуда, масъалаҳои рӯзнома ва тартиби кори онро тасдиқ намуданд.

Вакилон масъалаи таъмини иҷрои нақшаи чорабиниҳои мақомоти иҷроияи ҳокимияти давлатии шаҳри Душанбе доир ба муҷаҳҳаз намудани инфрасохтори партовгоҳҳо, қабули саривақтӣ ва кашонидани партовҳои сахти маиширо мавриди баррасӣ қарор дода, дар робита ба ин гузориши муовини якуми Раиси шаҳри Душанбе шунида шуд.

Муҳтарам Рустами Эмомалӣ  муовини якуми Раиси шаҳри Душанбе, раисони ноҳияҳои шаҳр, корхонаҳои партовкашонии ноҳияҳои шаҳри Душанбе ва дигар сохторҳои дахлдорро баҳри таъмини фаъолияти самараноки соҳаи идоракунии партовҳои сахти маишӣ, амнияти санитариву экологӣ, ба низом даровардани реҷаи баровардани партовҳо аз маҳаллаю шаҳракҳо ва гузаронидани корҳои фаҳмондадиҳӣ бо сокинони шаҳр вобаста ба риояи фарҳанги шаҳрнишинӣ дар самтҳои бақайдгириву тақвият бахшидани кори системаи биллингӣ дастуру супоришҳои мушаххас доданд.

Вакилон дар идома иҷрои «Барномаи рушди муассисаҳои томактабӣ ва таҳсилоти миёнаи умумии хусусӣ барои солҳои 2022-2027»-ро муҳокима намуда, вобаста ба ин масъала муовини Раиси шаҳри Душанбе ҳисобот дод.

Раиси шаҳри Душанбе дар ин робита ба  муовини якум, муовинони Раиси шаҳри Душанбе, раисони ноҳияҳои пойтахт, роҳбарони воҳидҳои сохтории дастгоҳ ва мақомоти иҷроияи ҳокимияти давлатии шаҳри Душанбе супориш доданд, ки дар ҳамкорӣ бо сохторҳои дахлдор корҳоро ҷиҳати фарогирӣ ба таълиму тарбияи томактабӣ, фароҳам овардани шароити мусоид барои ҷалби сармояи мустақим баҳри бунёди муассисаҳои хуштарҳу замонавӣ, таҳия ва роҳандозӣ намудани механизми ҳамкории муштарак бо соҳибкороне, ки фаъолияти онҳо ба рушди муассисаҳои томактабӣ ва таълимии хусусӣ равона шудаанд, ҷоннок намоянд.

Ҳамчунин ба масъулин ҷиҳати дар ин муассисаҳо ба таври ҳатмӣ ба роҳ мондани омӯзиши забони давлатӣ ва таърихи халқи тоҷик, инчунин таъминоти онҳо бо кадрҳои ихтисосманд  дастурҳои мушаххас дода шуд.

Дар идомаи маҷлис вакилони халқи шаҳри Душанбе ваколати вакил аз ҳавзаи интихоботии рақами №21 Гуреззода Умедро бо сабаби ба дигар мансаб гузаштанаш пеш аз муҳлат қатъ карданд.

Бинобар ин, дар ҳавзаи интихоботии рақами №21 14 майи соли 2023 интихобот муқаррар гардида, комиссияи шаҳрии интихобот таъсис дода шуд.

Вакилон ҳамчунин якчанд қарорҳои қабулнамудаи Раиси шаҳри Душанберо дар масъалаи кадрӣ ва дигар соҳаҳои муҳими шаҳрдорӣ баррасӣ ва тасдиқ карданд.

Дар ҷамъбасти кори иҷлосия Раиси шаҳри Душанбе муҳтарам Рустами Эмомалӣ вакилон ва кулли ҳозиринро бо иди байналмилалии Наврӯз табрик намуда, ба онҳо сарбаландӣ, хонаободӣ, саодатмандӣ, бурдборӣ ва ба Тоҷикистони азиз пешравию шукуфоӣ таманно намуданд.

Бо ҳамин иҷлосияи сенздаҳуми Маҷлиси вакилони халқи шаҳри Душанбе, даъвати шашум кори худро анҷом дод.

АКС: АМИТ «Ховар»

Март 17, 2023 21:52

Хабарҳои дигари ин бахш

Раиси шаҳри Душанбе бо губернатори Ҳукумати мардумии музофоти Шенсии Чин мулоқот намуданд
Рустами Эмомалӣ бо Сафири Ҷопон дар Тоҷикистон Кейко Фурута мулоқот намуданд
Дар Тоҷикистон экспедитсияи сайёҳии «Саёҳат ба қалби Авруосиё-2025» баргузор мешавад
Рустами Эмомалӣ бо Кетрин Мери Рассел мулоқот намуданд
Раиси шаҳри Душанбе Рустами Эмомалӣ бо Раиси Шурои директорони шабакаи телевизионии «Евронюс» Педро Варгас Сантос Давид мулоқот намуданд
Бахшида ба Рӯзи ҷавонони Тоҷикистон ҳамоиши табибони ҷавони шаҳри Душанбе баргузор шуд
Шаҳри Душанбе то соли 2028 пурра ба нақлиёти мусофиркаши барқӣ мегузарад
Даври шаҳрии Озмуни ҷумҳуриявии «Оилаи беҳтарин» баргузор мегардад
«RED BUS TOURS». Дар Душанбе мавсими хатсайрҳои сайёҳии дохилишаҳрӣ оғоз мегардад
Туҳфаи Президенти Тоҷикистон ба иштирокчиёни Ҷанги дуюми ҷаҳонӣ дар ноҳияи Сино супорида шуд
Дар Душанбе ба пешвози меҳмонон-иштирокдорони Конфронси байналмилалии сатҳи баланд оид ба ҳифзи пиряхҳо омодагӣ мегиранд
Бо қарори Раиси шаҳри Душанбе Рӯзи ҷавонони Тоҷикистон дар сатҳи баланд таҷлил мегардад