РУШДИ МАОРИФ. Дар Хатлон ду мактаби нав дари худро ба рӯи хонандагон боз намуд

ДУШАНБЕ, 29.03.2023. /АМИТ «Ховар»/. Дар рўзҳои ҷашнгирии Иди байналмилалии Наврўз дар вилояти Хатлон ду мактаби муосир – муассисаи таълимии миёнаи умумии №71 дар ноҳияи Ҷалолиддини Балхӣ ва муассисаи таълимии миёнаи умумии №11 дар ноҳияи Вахш сохта ба истифода дода шуданд, хабар медиҳад АМИТ «Ховар» бо истинод ба Мақомоти иҷроияи ҳокимияти давлатии вилояти Хатлон.

Муассисаи таълимии миёнаи умумии №71 Дар деҳаи «Чорбоғ»-и Ҷамоати деҳоти Навободи ноҳияи Ҷалолиддин Балхӣ воқеъ буда, аз ду ошёна, 10 синфхона, ошхона, китобхона ва ҳуҷраҳои иловагӣ иборат мебошад. Таълимгоҳи мазкур барои зиёда аз 600 нафар хонандагон дар ду баст пешбинӣ шудааст.

Муассисаи таҳсилоти миёнаи умумии №11 дар деҳаи «Инқилоб»-и Ҷамоати деҳоти «Тоҷикобод»-и ноҳияи Вахш бошад дар муҳлати се сол сохта ба истифода дода шуд.

Дар деҳаи мазкур солҳои тулонӣ масъалаи нарасидани ҷои нишаст барои хонандагон ва кам будани синфхонаҳои муҷҷаҳази таълимӣ омўзгорон ва волидайнро ба ташвиш оварда буд. Ба истифода додани таълимгоҳи мазкур камбудиҳои зикршударо аз байн бурда, ба беҳтар гардидани шароити таълиму тарбияи хонандагон мусоидат намуд.

Бояд гуфт, ки дар ноҳияи Вахш ба истиқболи Ҷашни 35- солагии Истиқлолияти давлатии Ҷумҳурии Тоҷикистон сохтмони зиёда аз 200 иншоот ба нақша гирифта шудааст, ки бештар аз 10 фоизи онро муассисаҳои таълимӣ, аз ҷумла синфхонаҳои иловагӣ ташкил медиҳад.

Мактабҳои мазкур дар асоси дастуру ҳидоятҳои Президенти мамлакат муҳтарам Эмомалӣ Раҳмон оид ба рушди соҳаи маориф аз ҷониби мақомоти маҳаллӣ дар ҳамдастӣ бо сокинони ин ноҳияҳо бунёд шудаанд.

Ёдовар мешавем, ки бо Қарори Ҳукумати Ҷумҳурии Тоҷикистон аз 31 октябри соли 2022 «Барномаи давлатии рушди муассисаҳои соҳаи маорифи вилояти Хатлон барои солҳои 2022-2027» ва нақшаи чорабиниҳо оид ба амалисозии барномаи мазкур тасдиқ гардид.

Тибқи барномаи мазкур, дар вилояти Хатлон то соли 2027 қариб 350 муассисаи таълимӣ бо маблағгузории 2 миллиарду 200 миллион сомонӣ сохта ба истифода дода мешаванд.

Хотиррасон мешавем, ки тибқи нақша, барномаи мазкур дар ду марҳила- солҳои 2022-2024 ва 2024-2027 амалӣ гардонида шуда, аз се замима иборат аст: сохтани муассисаҳои таълимие, ки дар ҳолати садамавӣ қарор дошта, ба синфхонаҳои иловагӣ ниёз доранд. Марҳилаи дуюм, муассисаҳои таълимие, ки дар деҳаҳои навбунёд ва деҳаҳое, ки шумораи аҳолиашон рӯ ба афзоиш аст, ба инобат гирифта мешаванд. Тибқи замимаи сеюм таъмиру навсозии муассисаҳои таълимие, ки биноҳои он ба таъмиру навсозӣ ниёз доранд, яъне биноҳои се-чор ошёна, ки ба таъмиру таҷдид ниёз доранд, навсозӣ мегарданд.

Рухсораи НУР,
АМИТ «Ховар»

АКС: Мақомоти иҷроияи ҳокимияти давлатии вилояти Хатлон