Се деҳаи ноҳияи Восеъ бо оби тоза таъмин карда шуд

Март 10, 2023 12:00

ДУШАНБЕ, 10.03.2023 /АМИТ «Ховар»/. 10 ҳазор аҳолии се деҳаи ноҳияи Восеъ бо оби тоза таъмин карда шуд.  Ҳайати Бонки ҷаҳонӣ дар якҷоягӣ бо Вазири молияи Ҷумҳурии Тоҷикистон дар ноҳияи Восеъ шабакаи нави обтаъминкуниро ба истифода дод, ки он дар доираи Лоиҳаи обтаъминкунӣ ва беҳдошт дар деҳот барқарор карда шуд. Шабакаи обтаъминкунии «Ҷавонӣ» 10 ҳазор аҳолии се деҳаро бо оби тоза таъмин намуд. 

Интизор меравад, ки бо дастгирии лоиҳа тақрибан 400 ҳазор нафар ба оби нӯшиданӣ дастрасӣ пайдо мекунад ва тақрибан 100 ҳазор нафар, асосан кӯдакон аз сармоягузорӣ дар иншооти WASH ва омӯзиши масъалаҳои гигиенӣ дар мактаб манфиат мебардорад.

Дар ноҳияи Данғара ҳайати меҳмонон аз Донишгоҳи давлатии тиббии Хатлон дидан намуд. Он яке аз 26 муассисаи таҳсилоти олии Тоҷикистон аст, ки дар чаҳорчӯбаи Лоиҳаи рушди таҳсилоти олӣ аз ҷониби Бонки ҷаҳонӣ маблағгузорӣ мешавад.

Донишгоҳ барои донишҷӯёни факултети тиббӣ чор озмоишгоҳи замонавиро таъсис ва муҷаҳҳаз намудааст, ки дар онҳо донишҷӯён метавонанд малакаҳои худро такмил диҳанд, нақшаҳои таълимии худро бозбинӣ намуда, таҷдид созанд. Ғайр аз ин, дар шакли онлайн сомона барои дастрас кардани лексияҳо ва дигар захираҳои таълимӣ ба доираи васеи шунавандагон ташкил шудааст. Донишҷӯёне, ки қаблан дар ҳуҷраҳои ҷарроҳӣ амалиёти ҷарроҳии пизишконро мушоҳида мекарданд, акнун метавонанд ин техникаро дар амал санҷанд, ки ин эътимоди онҳоро зиёд мекунад ва барои кор бо аҳолӣ беҳтар омода мешаванд.


Дар маҷмӯъ, тақрибан 28 ҳазор  донишҷӯ, ки қариб 40 дарсади онҳо духтар аст, аз татбиқи Лоиҳаи рушди таҳсилоти олӣ баҳра бурданд.

Дар айни замон Бонки ҷаҳонӣ 25 лоиҳаро ба маблағи умумии 1,59 миллиард доллари ИМА маблағгузорӣ мекунад.

Ёдовар мешавем, ки зимни сафар ба Тоҷикистон Ноиби Президенти Бонки Умумиҷаҳонӣ оид ба Аврупо ва Осиёи Марказӣ хонум Анна Бйерде бо Президенти Ҷумҳурии Тоҷикистон муҳтарам Эмомалӣ Раҳмон мулоқот намуда, ҷонибдории Бонки ҷаҳониро оид ба дастгирии ҳукумат ва мардуми Тоҷикистон, аз ҷумла таваҷҷуҳи махсус ба рушди сармояи инсонии мамлакат, инкишофи инфрасохтори «сабз» ва боло бурдани устуворӣ тавассути мутобиқшавӣ ба тағйирёбии иқлим ва ҳифзи иҷтимоӣ бори дигар тасдиқ кард.

Анна Бйерде гуфт, ки «бо назардошти вазъи демографӣ ва ҳадафҳои рушди мамлакат сармоягузорӣ ба сармояи инсонӣ афзалияти аввалиндараҷаи Бонки ҷаҳонӣ дар Тоҷикистон маҳсуб мешавад».

«Бо мақсади мусоидат ба ҷумҳурӣ дар бунёди иқтисодиёти бештар фарогир ва устувор имсол мо маблағгузории се лоиҳаи навро дар соҳаҳои маориф, тандурустӣ ва ҳифзи иҷтимоӣ интизорем»,-таъкид намуд Анна Бйерде.

Дар баробари мулоқот бо Президенти Тоҷикистон, вазирон ва дигар мақомоти давлатӣ Анна Бйерде инчунин бо чанд лоиҳае, ки аз ҷониби Бонки ҷаҳонӣ дар вилояти Хатлон маблағгузорӣ мешаванд, шинос шуд.

АКС: Намояндагии Бонки ҷаҳонӣ дар Тоҷикистон

Март 10, 2023 12:00

Хабарҳои дигари ин бахш

Дар шаҳри Омск Форуми 5-уми сарварони ҷавони Русия ва давлатҳои Осиёи Марказӣ оғоз ёфт
Масъалаи ба такмили ихтисос фаро гирифтани табибони тоҷик дар Эрон баррасӣ гардид
Дар Душанбе масъалаи густариши ҳамкории судӣ байни Тоҷикистон ва Арабистони Саудӣ баррасӣ гардид
Барои пешгирии заҳролудшавӣ аз дуди ангишт қоидаҳои муҳими истифодаи онро бояд риоя намуд
Доктор Ҳала бинти Мазид Ат-Тувайҷирӣ: «Дар «Стратегияи дурнамои рушди Арабистони Саудӣ то соли 2030» ҳифзи ҳуқуқи инсон ҷойгоҳи хос дорад»
Тавсеи ҳамкорӣ байни мақомоти Ваколатдор оид ба ҳуқуқи инсон дар Ҷумҳурии Тоҷикистон ва Кумитаи ҳуқуқи инсони Шоҳигарии Арабистони Саудӣ баррасӣ гардид
Ҳокимияти судӣ дар Тоҷикистон такягоҳи адолат ва пояи устувори қонун аст
Пешвои миллат: «Фалсафаи ҷашни Меҳргон инсонҳоро ба адолатхоҳӣ, баробарӣ ва меҳрубонӣ ҳидоят мекунад»
Дар Душанбе Форуми ёздаҳуми миллӣ оид ба волоияти қонун доир мешавад
Вазири меҳнат, муҳоҷират ва шуғли аҳолии Тоҷикистон дар Давҳа бо роҳбари ширкати қатарии «Jusour» мулоқот намуд
Дар Маркази ҷумҳуриявии илмии ҷарроҳии дилу рагҳо шуъбаи ҷарроҳии бариатрикӣ ва герниологӣ пас аз таъмиру азнавсозӣ ба истифода дода шуд
Ҳамкории Тоҷикистону Қатар дар самти меҳнат ва шуғли аҳолӣ тақвият меёбад