Дар доираи сафари давлатии Президенти Тоҷикистон ба Қазоқистон Ёддошти тафоҳум байни АМИТ «Ховар» ва ҶСҒ «Телерадиокомплекси Президенти Ҷумҳурии Қазоқистон» ба имзо расид

ДУШАНБЕ, 04.05.2023 /АМИТ «Ховар»/. Имрӯз дар доираи сафари давлатии Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Ҷумҳурии Қазоқистон дар шаҳри Остона Ёддошти тафоҳум оид ба ҳамкорӣ байни Агентии миллии иттилоотии Тоҷикистон «Ховар»-и назди Ҳукумати Ҷумҳурии Тоҷикистон (АМИТ «Ховар») ва Ҷамъияти саҳомии ғайритиҷоратии «Телерадиокомплекси Президенти Ҷумҳурии Қазоқистон» ба имзо расид.

Санади мазкурро Директори АМИТ «Ховар» Субҳиддин Шамсиддинзода ва Директори генералии ҶСҒ «Телерадиокомплекси Президенти Ҷумҳурии Қазоқистон» Раушан Кажибаева имзо намуданд.

Ёддошти тафоҳум бо мақсади таҳким бахшидани ҳамкорӣ дар самти табодули иттилоот ба тасвиб расид.

Дар асоси ин санад ҷонибҳо роҷеъ ба  рӯйдодҳои муҳими  ҳаёти дохилӣ ва хориҷии Тоҷикистон ва Қазоқистон ба ҳамдигар мавод пешниҳод намуда, ба хотири баланд бардоштани маҳорати касбии кормандон табодули таҷриба ва сафарҳои омӯзишӣ ба роҳ мемонанд.

Ёдовар мешавем, ки дар маҷмуъ дар доираи сафари давлатии Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Ҷумҳурии Қазоқистон аз ҷониби вазорату идораҳо 20 санади нави ҳамкорӣ ба имзо расид.

АКС: АМИТ «Ховар»