ХИЗМАТРАСОНИИ ЭЛЕКТРОНӢ. «Саноатсодиротбонк» дар самти муомилоти ғайринақдӣ бо мизоҷон вохӯриҳои муштарак мегузаронад

ДУШАНБЕ, 26.05.2023 /АМИТ «Ховар»/. Дар филиали «Саноатсодиротбонк» дар шаҳри Бохтари вилояти Хатлон дар доираи тадбирандешӣ ҷиҳати гузаштан ба муомилоти ғайринақдӣ ва истифода аз замимаи ССБ-мобайл бо гурўҳи мизоҷон пайваста  вохӯрию суҳбатҳо  баргузор мегардад, хабар доданд ба АМИТ «Ховар» дар бонки мазкур. 

Дар вохўрии навбатӣ барои аз худ намудани ин хизматрасонӣ 20 нафар соҳибкорон-мизоҷони Бонк ба бинои филиал даъват шуданд. Аз ҷониби мутахассисон дастгоҳи марказии Бонк ва филиал осонии кор бо замимаи ССБ-мобайл ва анҷом додани хизматрасониҳои гуногун тариқи замимаи мазкур фаҳмонида шуд. Ба телефонҳои ҳамроҳи  ҳамаи иштирокчиён замимаи ССБ-мобайл боргирӣ шуда,  корҳои фаҳмондадиҳӣ гузаронида шуд.

Лозим ба ёдоварист, ки тариқи замимаи ССБ-мобайл зиёда аз 180 намуди амалиётҳо гузаронида мешавад. ССБ-мобайл осон,  қулай ва дорои имкониятҳои васеи анҷомдиҳии амалиётҳои бонкиро фарогир аст.

Ҳадафи асосии  ташкили чунин вохўриҳо гузаштан ба муомилоти ғайринақдӣ, дастрасӣ  ба хизматрасонии муосир ва кор бо замимаи ССБ-мобайл барои қавитар гардидани муошират  бо мизоҷон  мебошад.   Даст кашидан аз муомилоти нақдӣ ва анҷом додани ҳамагуна амалиётҳо бо муомилоти ғайринақдӣ тақозои замон буда,  корро барои муштариён осон мегардонад.

АКС: «Саноатсодиротбонк»