Дар Душанбе озмоишгоҳи санҷиши мехсутуну асосҳои бино ва иншоот ба истифода дода шуд

ДУШАНБЕ, 17.06.2023 /АМИТ «Ховар»/. Дар шаҳри Душанбе озмоишгоҳи муосири санҷиши мехсутуну асосҳои бино ва иншоот дар шаҳру ноҳияҳои ҷумҳурӣ ба истифода дода шуд. Дар ин хусус ба АМИТ «Ховар» дар Кумитаи меъморӣ ва сохтмони назди Ҳукумати Ҷумҳурии Тоҷикистон хабар доданд.

Дар маросими ифтитоҳи он муовини Сарвазири Ҷумҳурии Тоҷикистон Усмоналӣ Усмонзода, Раиси Кумитаи меъморӣ ва сохтмони назди Ҳукумати Ҷумҳурии Тоҷикистон Низом Мирзозода ва намояндагони дигар идораву сохторҳои сохтмонию меъморӣ иштирок намуданд.

Озмоишгоҳ ҷиҳати дар муҳлатҳои муқаррарнамуда таъмин намудани иҷрои дастуру супоришҳои Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва бо мақсади баҳодиҳии риояи меъёру қоидаҳои шаҳрсозӣ, регламентҳои техникии сифати технологии корҳои сохтмонӣ, мавод ва маснуоти сохтмонӣ, инчунин дигар санадҳои қонунгузории шаҳрсозӣ дар бино ва иншооти сохташаванда бо мақсади таъмини зилзилатобоварии бинову иншоот барои санҷиши мехсутуну асосҳои бино ва иншоот дар шаҳру ноҳияҳои ҷумҳурӣ таъсис дода шуд.

Санҷиши мехсутунҳо дар майдони сохтмонӣ тибқи талабот, тартиб ва меъёру коидаҳои сохтмонӣ амалӣ карда мешавад. Мақсади асосии санҷиш ин муайян намудани қобилияти борбардории мехсутунҳо мебошад, ки баъди санҷиш бо натиҷаи ҳисоби конструктивӣ муқоиса карда мешавад.

Санҷиши мехсутунҳои оҳанубетонӣ бо ёрии таҷҳизоти махсуси муосир, яъне болорҳои филизӣ, домкратҳо, насоси гидравликӣ, фишорсанҷ (манометр), таҷҳизоти муайян намудани деформатсия (прогибомер) ва ғайра амалӣ мегардад.

Дар ҷамъбасти озмоиши мехсутунҳо хулосаи санҷишӣ бо дарҷи расмҳо, раванди озмоиш, муҳлати гузаронидани санҷиш ва дигар ҷараёнҳои вобаста ба устувории мехсутунҳо тартиб дода шуда, як нусхаи он ба фармоишгар дастрас мегардад ва нусхаи дигари он дар бойгонии Раёсати экспертизаи давлатии ғайриидоравии ҳуҷҷатҳои лоиҳавии шаҳрсозии Кумита то панҷ сол нигоҳ дошта мешавад.

Дар асоси фармоиши Раиси Кумитаи меъморӣ ва сохтмони назди Ҳукумати Ҷумҳурии Тоҷикистон аз 13 июни соли 2023 бо мақсади таъмини риояи меъёру қоидаҳои шаҳрсозӣ, регламентҳои техникии сифати технологии корҳои сохтмонӣ, бехатарии сейсмикии бино ва иншоот ҷиҳати баҳодиҳии эътимоднокии мехсутунҳое, ки ҳангоми сохтмони бино ва иншоот бунёд мегарданд, ба таври ҳатмӣ аз озмоиши соҳавӣ тибқи талаботи меъёру қоидаҳои шаҳрсозии Ҷумҳурии Тоҷикистон гузаронида мешаванд.

Фармоишгарон, таҳиягарони ҳуҷҷатҳои шаҳрсозӣ ва пудратчиён мутобиқатии корҳои иҷрошудаи сохтмониро ба лоиҳа ва сифати сохтмон таъмин намуда, ҷиҳати аз озмоиши соҳавӣ гузаронидани мехсутунҳо, ки ҳангоми сохтмони бино ва иншоот бунёд мегарданд, дар асоси фармоиши болозикр бояд чораҳои зарурӣ андешанд.

АКС: Кумитаи меъморӣ ва сохтмони назди Ҳукумати Ҷумҳурии Тоҷикистон