Дар Бадахшон барои беҳдошти шароити муассисаҳои маорифу тандурустӣ, нақлиёт ва обёрӣ 16 лоиҳаи давлатии сармоягузорӣ амал менамояд

ДУШАНБЕ, 27.08.2023. /АМИТ «Ховар»/. Дар ҳудуди Вилояти Мухтори Кӯҳистони Бадахшон барои беҳдошти шароити муассисаҳои маорифу тандурустӣ, нақлиёт, обёрӣ ва корҳои соҳилмустаҳкамкунӣ 16 лоиҳаи давлатии сармоягузорӣ татбиқ шуда истодааст. Дар ин хусус ба АМИТ «Ховар» дар Мақомоти иҷроияи ҳокимияти давлатии Вилояти Мухтори Кӯҳистони Бадахшон хабар доданд.

Гуфта шуд, ки маблағи то ба имрӯз азхуднамуда дар доираи ин лоиҳаҳо беш аз 1,3 миллиард сомониро ташкил медиҳад, ки нисбат ба ҳамин давраи соли гузашта 703,1 миллион сомонӣ зиёд мебошад.

Ба иттилои манбаъ, давоми 6 моҳи соли 2023 94 корхона ва коргоҳҳои саноатии вилоят тибқи ҳисоботи оморӣ ба маблағи 93 миллиону 223 ҳазор сомонӣ истеҳсоли маҳсулот ва хизматрасониро ба роҳ мондаанд. Ин нисбат ба ҳамин давраи соли гузашта 3,8 фоиз ё 4 миллион сомонӣ зиёд мебошад.

АКС: АМИТ «Ховар»