НИШАСТИ МАТБУОТӢ. Ба иқтисоди Тоҷикистон аз ҳама беш Қазоқистон, Чин ва Италия сармоягузорӣ намудаанд

ДУШАНБЕ, 11.08.2023 /АМИТ «Ховар»/. Ба иқтисоди Тоҷикистон дар зарфи се моҳи аввали соли равон аз ҳама беш Қазоқистон- 83,5 миллион доллар сармоя ворид намудааст. Дар зинаи дуюм Ҷумҳурии Мардумии Чин бо 59,6 миллион доллар қарор дорад. Ҳамзамон дар ин давра Италия ба иқтисоди мамлакат беш аз 44 миллион доллар, Ҳиндустон 22,1 миллион доллар, Русия 20,9 миллион доллар, Британияи Кабир 12,1 миллион доллар ва дигар давлатҳои хориҷӣ сармоя ворид намудаанд.

Дар ин хусус 10 август Раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон Саъдӣ Қодирзода зимни нишасти матбуотӣ маълумот дод.

Мавсуф дар посух ба саволи хабарнигори АМИТ «Ховар» дар мавриди он ки сармоягузорони хориҷӣ бештар ба кадом соҳаҳои афзалиятноки иқтисоди Тоҷикистон сармоягузорӣ намудаанд, иброз дошт, ки «сармоягузорони хориҷӣ бештар ба соҳаҳои саноати истихроҷ, саноати коркард ва сохтмон маблағгузорӣ намудаанд».

Марзия САИДЗОДА,
АМИТ «Ховар»

АКС: АМИТ «Ховар»