ДУШАНБЕ, 08.09.2023. /АМИТ «Ховар»/. Бахшида ба ҷашни 32- солагии Истиқлоли давлатӣ  дар Донишгоҳи давлатии молия ва иқтисоди Тоҷикистон Конференсияи илмию сиёсӣ таҳти унвони «32 соли Истиқлолияти давлатии Ҷумҳурии Тоҷикистон, 32 фасли дафтари худшиносии миллат» доир гардид, хабар доданд ба АМИТ «Ховар» дар Донишгоҳи мазкур.

Дар  конференсия гуфта шуд, ки маҳз истиқлолият ба мо имконият фароҳам овард, ки Ватани худро соҳибӣ кунем, давлатдории миллии хешро барпо намоем, суннату арзишҳои миллиамонро эҳё созем, ормонҳои деринаи халқамонро амалӣ гардонем ва зиндагии озодонаи мардумамонро таъмин намоем.

Ҷашн гирифтани 32 соли Истиқлоли давлатӣ ин худ дастоварди беназир аст, чунки дар замони шиддат гирифтани муборизаҳои абарқудратҳои ҷаҳон ва авзои геополитикӣ ва пайдо шудани ҳар гуна ҳаракатҳои ифротӣ нигоҳ доштани ин арзиши муқаддас  худ комёбӣ аст.

Таъкид шуд, ки дар ҳар як дастоварди даврони истиқлол саҳми Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бузург  аст. Тазаккур дода шуд, ки Тоҷикистони соҳибистиқлол имрўз аъзои комилҳуқуқи ҷомеаи башарӣ буда, хонаи умеди тамоми тоҷикони ҷаҳон маҳсуб меёбад.

Дар Ҷумҳурии Тоҷикистон танҳо 20 фоизи тоҷикони ҷаҳон зиндагӣ мекунанд, вале тоҷик будан ва тоҷик мондани аҳли чандинмиллионнафараи тоҷикони дунё аз ҳифзи истиқлоли давлатӣ ва саъю кўшиши ҳар як тоҷик вобаста аст, яъне нигоҳ доштани ҳувияти миллӣ ва худшиносии миллии тоҷикони дунё аз мавҷудияти Тоҷикистони соҳибистиқлол вобаста аст.

Дар охир раёсати Донишгоҳ ба ифтихори 32-солагии Истиқлоли давлатӣ устодону кормандонро, ки дар фаъолияти кориашон давтоварҳои назаррас доранд,  бо мукофотпулӣ дар ҳаҷми 500 сомонӣ қадрдонӣ намуд.

АКС: Донишгоҳи давлатии молия ва иқтисоди Тоҷикистон