ФУТБОЛ. Замони баргузории бозии дастаҳои «Истиқлол» ва «Ал-Дуҳайл» муайян шуд

ДУШАНБЕ, 12.09.2023 /АМИТ «Ховар»/. Бозии даври аввали марҳилаи гурӯҳии Лигаи чемпионҳои Осиё дар мавсими 2023/24 байни дастаҳои футболи «Истиқлол»-и Тоҷикистон ва «Ал-Дуҳайл»-и Қатар 19 сентябр, соати 21:00 дар «Варзишгоҳи марказии шаҳри Душанбе» баргузор мегардад. Дар ин хусус шореҳи варзиши АМИТ «Ховар» бо истинод ба Федератсияи футболи Тоҷикистон хабар медиҳад.

Дар ҳайати дастаи футболи «Ал-Дуҳайл» собиқ футболбози дастаҳои «Ливерпул»-и Англия ва «Барселона»-и Испания Филиппе Коутинийо бозӣ намуда, дар бозӣ ба муқобили дастаи футболи «Истиқлол»-и Тоҷикистон ба майдон мебарояд.

Дастаи футболи «Истиқлол»-и Тоҷикистон тибқи қуръакашии Лигаи чемпионҳои AFC-2023/24 дар гурӯҳи «E» бо дастаҳои футболи «Персеполис»-и Эрон, «Ал-Дуҳайл»-и Қатар ва «Ал-Наср»-и Арабистони Саудӣ рақобат хоҳад намуд.

Бояд иброз намуд, ки аз рӯи натиҷагирии марҳалаи гурӯҳии Лигаи чемпионҳои Осиё ғолибони панҷ гурӯҳ дар ҳар минтақа, инчунин се дастаи нишондиҳандаҳояшон хубтари ҷойҳои дуюми гурӯҳҳо дар ҳар як минтақа, дар маҷмуъ 16 даста ба 1/8 –ниҳоӣ роҳ меёбанд.

АКС: Федератсияи футболи Тоҷикистон